TIKVAH-MAGAZINE

አዋሽ-መኢሶ መንገድ ጥገና እየተደረገለት ነው

የኢትዮ-ጅቡቲ ዋና መንገድ አካል የሆነው አዋሽ-መኢሶ 70 ነጥብ 5 ኪ.ሜ መንገድ የመስመሩን ከፍተኛ የትራፊክ ፍሰት በበቂ ሁኔታ ለማስተናገድ በሚያስችል መልኩ ከባድ ጥገና እየተደረገለት መሆኑ ተነግሯል።

ጥገናውን ሀገር-በቀሉ 'ዮንአብ ኮንስትራክሽን' በ 478,385,156 ብር በሆነ ወጪ በማከናወን ላይ ሲሆን ወጪው ሙሉ በሙሉ በኢትዮጵያ መንግስት እንደሚሸፈን ታውቋል።

የመንገዱ መሠረት እና  ትከሻ ላይ ብልሽት በመስተዋሉ እንዲሁም መንገዱ ከአነስተኛ እስከ ከባድ መጠን ባላቸው ጉድጎዶች(deep holes) እና በሌሎች ነገሮች በመጎዳቱ የጥገና ሥራ እየተከናወነለት ይገኛል ተብሏል።

በእስከ አሁኑ የግንባታ እንቅስቃሴ የ3 ነጥብ 6 ኪ.ሜ የኦቨርሌይ አስፋልት ንጣፍ፣ የተለዋጭ መንገድ እና ሌሎች ሥራዎች  በመከናወን ላይ ሲሆኑ በዚህም ከአጠቃላይ የግንባታ ሥራው 18 በመቶ መከናወኑ ተገልጿል።

መንገዱ የሀገሪቱ የገቢ እና ወጪ ንግድ ዋና መስመር እና ከከባድ እስከ ቀላል ተሽክከርካሪዎች የሚተላለፉበት እንደመሆኑ፥ የአርሶ-አደሩን ኢኮኖሚያዊ ተጠቃሚነት ይጨምራል ተበሏል።

የዚህ መንገድ ትስስር አካል የሆነው ከአዳማ-አዋሽ (ኪ.ሜ 60) ከባድ ጥገና ፕሮጀክት በግንባታ ላይ የሚገኘ ሲሆን፣ ከመኢሶ- ቁልቢ- ሀረር  ያሉት መንገዶች በጨረታ ሂደት ላይ ናቸው ተብሏል።

ይህ በእንዲህ እንዳለ፥ የኢትዮ-ጅቡቲ የትራንስፖርት መስመር የሀገሪቱ 90 ከመቶ በላይ የገቢ እና ወጪ ንግድ የሚተላለፍበት እንደመሆኑ ያለውን የትራፊክ ፍሰት ይበልጥ ደረጃውን በጠበቀ መልኩ ሊያስተናግድ የሚያስችል የፍጥነት መንገድ አዳማ-አዋሽ 60 ኪ.ሜ ምዕራፍ አንድ ግንባታ መጀመሩ ይታወቃል፡፡

መረጃው፦የኢትዮጵያ መንገዶች አስተዳደር ነው።

@tikvahethmagazine

በውርስ ከተያዙ ተሽከርካሪዎች ላይ ሰሌዳ እየፈታ ለህገ-ወጥ ተግባር ሲያከራይ የነበረ ግለሰብ ተያዘ።

የድሬዳዋ ቅርንጫፍ የጉምሩክ የውርስ መጋዘን ፀሀፊ የነበረው በውርስ ከተያዙ ተሽከርካሪዎች ሰሌዳ እየፈታ ለህገ-ወጥ ተግባር ሲገለገልበት እጅ ከፍንጅ መያዙን የኢትዮጵያ ፌደራል ፖሊስ ገለጸ፡፡

ተጠርጣሪው ወንጀሉን የፈፀመው የድሬዳዋ ቅርንጫፍ የጉምሩክ የውርስ መጋዘን ፀሀፊ ሆኖ እየሰራ ባለበት በሥራ አጋጣሚ በውርስ ከተያዙ ተሽከርካሪዎች ሠሌደ ቁጥር እየፈታ ለደላሎችና በዚህ ህገ-ወጥ ተግባር ላይ ለተሰማሩ ሰዎች በ15 ሺህ ብር ያከራያል።

ሰሌዳውን የሚከራዩት ግለሰቦች ይህንን ሰሌዳ ቁጥር እየተጠቀሙ ከሶማሌ ላንድ ሠነድ አልባ ተሽከርካሪዎችን በህገ-ወጥ መንገድ ወደ ሀገር ውስጥ እንዲገቡ ሲያደርጉ እንደነበር ተገልጿል፡፡

ተጠርጣሪው በቁጥጥር ስር የዋለው 15 ሺህ ብር ተቀብሎ በውርስ ከተያዘ ተሸከርካሪ ሠሌዳ ፈቶ ሲሰጥ በድሬዳዋ ፌደራል ፖሊስ ወንጀል ምርመራ እጅ ከፈንጅ ተይዞ ፖሊስ ምርመራ እያጣራበት እንደሆነ ከፌደራል ፖሊስ የተገኘው መረጃ ያመላክታል፡፡

@tikvahethmagazine

በህገወጥ የማዕድን ዝዉዉር የተጠረጠሩ ግለሰቦችና ቁሳቁሶች በቁጥጥር ስር ዋሉ

በደቡብ ምዕራብ ኢትዮጵያ ምዕራብ ህዝቦች ክልል ኦሞ ዞን ቤሮ ወረዳ በተደረገዉ ድንገተኛ ፍተሻ የተለያዩ ማዕድን ዉጤቶችና መሳሪያዎች መገኘቱ ተገልጿል።

በዚሁ መሠረት 2,260(ሁለት ሺ ሁለት መቶ ስልሳ) ግራም ወርቅ፣ 3 የወርቅ መጠቆሚያ ማሽን ፣2 ክላሽ 1 ሽጉጥ ከ76 መሠል ጥይቶችና 2,129,100(ሁለት ሚሊዬን አንድ መቶ ሀያ ዘጠኝ ሺ አንድ መቶ ብር) በፖሊስ በቁጥጥር ስር ዉሏል።

ከጉዳዩ ጋር በተያያዘ 21 ሠዎች በቁጥጥር ስር ውለው ምርመራ በመጣራት ላይ የሚገኝ ሲሆን የህግ ማስከበሩ ስራ ተጠናክሮ እንደሚቀጥልም ከክልሉ ፖሊስ ኮሚሽን ያገኘነው መረጃ ያመለክታል።

@tikvahethmagazine

ለህንፃ ግንባታ በተቆፈረ ጉድጓድ ምክንያት አለት ተደርምሶ የአንድ ሰው ህይወት አለፈ

በቂርቆስ ክ/ከተማ ወረዳ 08 ልዩ ስሙ 31አምሳ ቆርቆሮ ተብሎ በሚጠራ ስፍራ ዋልያ ኮንስትራክሽን በሚያስቆፍረው የህንፃ መሰረት ድንገት አለት ተደርምሶ የአንድ ግለሰብ ህይወት አልፏል።

የመደርመስ አደጋው የደረሰው ዛሬ ረፋድ 4:30 አካባቢ ሲሆን፤ ህይወቱ ያለፈው ግለሰብ ታማሚና ከቤት ወጥቶ የማያውቅ እንዲሁም በሰዓቱ ምንም አይነት የቁፋሮ ስራ አለመኖሩ ተጠቁሟል።

ሆኖም ስጋት ስለነበረ በአካቢው የሚኖሩ ሰዎች እንዲነሱ በሚደረግበት ወቅት አደጋው መድረሱ ተገልጿል። የሟች አስከሬን የእሳት አደጋ ሰራተኞች ከፍርስራሽ ውስጥ በማውጣት ለአዲስ አበባ ፖሊስ ያስረከቡ ሲሆን፤ ወደ ሚኒልክ ሆስፒታል መሸኘቱን ወረዳው አስታውቋል።

@tikvahethmagazine