Housing in Addis Ababa የአዲስ አበባ ቤቶች

የአዲስ አበባ ከተማ አስተዳደር ለመምህራን የጋራ መኖሪያ ቤት እጣ የማውጣት መርሃ ግብር አካሄደ፤
-----------
የከተማ አስተዳደሩ የመምህራንን ማህበራዊ እና ኢኮኖሚያዊ ችግሮች ለመፍታት በየወቅቱ የተለያዩ እርምጃዎችን እየወሰደ ሲሆን ከዚህ በፊት ለመምህራን ተላልፈው የነበሩ እና በተለያየ መልኩ በህገ ወጥ ተይዘው የነበሩ 435 የጋራ መኖሪያ ቤቶች ለመምህራን በእጣ እንዲተላለፉ በመወሰኑ ነው እጣ የማውጣት መርሃ ግብሩ የተካሄደው።

በእጣ አወጣጥ ሥነ-ስርዓቱ ላይ የተገኙት ከንቲባ አደነች አቤቤ ሀብቶችን በፍትሃዊነት እና በግልጸኝነት ለሁሉም ተጠቃሚነት ማዋል ስለሚገባ ከዚህ በፊት ለመምህራን ተላልፈው ከነበሩ 5ሺ ቤቶች የተለያዩ የመልካም አስተዳደር ጥያቄዎች ሲነሱባቸው የነበሩ ቤቶች ተጣርተው በግልጸኝነት በእጣ ለመምህራን እንዲተላለፉ መወሰኑን ተናግረዋል።

ከንቲባ አዳነች አክለውም፣ የመኖሪያ ቤት አቅርቦት የመምህራን ብቻ ሳይሆን የበርካታ የከተማዋ ነዋሪዎች ጥያቄ ነው ያሉ ሲሆን የመኖሪያ ቤት ጥያቄን መንግስት በሚያቀርበው መርሃ-ግብር ብቻ መመለስ አይቻልም ብለዋል።

በመሆኑም የተለያዩ የቤት አቅርቦት አማራጮች መቀመጣቸውን አና ከነዚህ ውስጥ አንዱ በሆነው በማህበር ተደራጅቶ ቤት የመገንባት አማራጭ መምህራን ቅድሚያ ተጠቃሚ እንዲሆኑ መወሰኑን ከንቲባ አዳነች አስታውቀዋል።

ቤቶቹ በፍትሃዊነት የመምህራኑን የአገልግሎት ዘመን፣ የአካል ጉዳተኞች እንዲሁም የሴቶችን ልዩ ተጠቃሚነት ታሳቢ ያደረገ ሲሆን በእጣው የተካተቱ ከ9 ዓመት ጀምሮ እስከ ከ35 ዓመት በላይ በአራት የተለያዩ እርከኖች  አገልግሎት ያላቸው መምህራን በእጣው ውስጥ መካተታቸውም ተገልጿል።

በዛሬው እለት 435 የጋራ መኖሪያ ቤቶችን ለመምህራን በዕጣ  እንዲተላለፉ አድርገናል።

ከዚህ በፊት ለመምህራን ተላልፈው ከነበሩ 5 ሺሕ የጋራ መኖሪያ ቤቶች ውስጥ ውል ሳይፈጸምባቸው የቆዩ 435 ቤቶችን በማጣራት ከለየን በኋላ ዛሬ በዕጣ ለቤት እድለኞቹ አስተላልፈናል።
ያለንን ውስን ሃብት በግልፀኝነትና በፍትሃዊነት በተገቢ ሁኔታ ለህዝባችን እንዲደርስ እያደረግን መስራታችንን እንቀጥላለን።

ፈጣሪ ኢትዮጵያን እና ህዝቦቿን ይባርክ

ከንቲባ አዳነች አቤቤ