Ministry of Education Ethiopia

ለወላይታ ሶዶ ዩኒቨርሲቲ የአዲስ አመራር ምደባ ተካሄደ
................................................
ለወላይታ ሶዶ ዩኒቨርሲቲ የአዲስ አመራር ምደባ ተካሂዷል።

ዶክተር ጉቼ ጉሌ ሱላ የወላይታ ሶዶ ዩኒቨርስቲ ተጠባባቂ ፕሬዝዳንት ሆነው እንዲሰሩ ከጥቅምት 16/2016 ዓ.ም ጀምሮ በትምህርት ሚኒስቴር ተመድበዋል።

የዩኒቨርስቲው ቦርድ በበኩሉ ዶክተር አክበር ጩፋን የወላይታ ሶዶ ዩኒቨርስቲ ተጠባባቂ አካዳሚክ ምክትል ፕሬዝዳንት እንዲሁም ዶክተር ዘውድነህ ቶማስን የወላይታ ሶዶ ዩኒቨርስቲ ተጠባባቂ የምርምርና ቴክኖሎጂ ሽግግር ጉዳዮች ምክትል ፕሬዝዳንት ሆነው እንዲሰሩ መድቧል።

አዲስ የተመደቡት አመራሮች ከቀድሞው የዩኒቨርሲቲው አመራሮች ጋር የስራ ርክክብ አካሂደዋል።

የትምህርት  ሚኒስተሩ ፕሮፌሰር ብርሃኑ ነጋ ከኢትዮጵያ መምህራን ማህበር አመራሮች ጋር ውይይት አካሄዱ።
....................................................ጥቅምት 19/2016 ዓ.ም (ትምህርት ሚኒስቴር)  የኢትዮጵያ መምህራን ማህበር  36ኛ መደበኛ የምክር ቤት ስብሰባውን በጅግጅጋ ከተማ አካሂዷል።

የትምህርት ሚኒስትሩ በስብሰባው ማጠቃለያ ፕሮግራም ላይ በመገኘት ከሁሉም ክልሎች ከመጡ የመምህራን ተወካዮች ጋር ውይይት አድርገዋል።

ፕ/ር ብርሃኑ ነጋ የመምህራን ማህበር የመምህራንን  ክብር ወደ ነበረበት ለመመለስ ጠንክሮ መሥራት ይኖርበታል ብለዋል።

የመምህራንን ክብር ለመመለስ የማስተማር ፍቅርና ችሎታው ያላቸውን መምህራንን ወደ ሙያው ላይ እንዲመጡ ማድረግና ያለ ችግር መኖር የሚያስችላቸው ደመወዝ መክፈል ይገባል ብለዋል።

የሙያ ማህበሩም በበኩሉ የመምህሩን  የትብብር    ጉልበት ተጠቅሞ እንደ ኮኦፕሬቲቭ ባንክ  የመሣሠሉትን በራሱ አባላት በማቋቋም የመምህራን ኑሮ ለማሻሻል መስራት ይኖርበታል ያሉ ሲሆን ትምህርት ሚኒስቴርም አስፈላጊውን ድጋፍ እንደሚያደርግ ገልፀዋል።

አሁን ባለንበት ሁኔታ ሀገራዊ ችግር ውስጥ የገባነው የትምህርት ስርዓታችን በመውደቁ ነው ያሉት ሚኒስትሩ እንደ መምህራን ማህበር ችግሩን በግልፅ ተነጋግሮ ለመፍትሄው በጋራ መስራት ይጠበቃልም ብለዋል።

የሙያ ማህበሩም የሙያውን ክብር ለመመለስ ከማህበረሰቡ ጋር ውይይት ማድረግና ተጠያቂነት እንዲሰፍን መሥራት እንደሚኖርበት ጠቁመዋል።

ሙሉ ዜናው

https://m.facebook.com/story.php?story_fbid=pfbid0D3kfj6BaB8Sqzh2NFyReJfPtERzutYb7mVpgJNhkzSrVPF8CNwXCJTzGUAAFwfURl&id=100064682287722&mibextid=9R9pXO።

"የትምህርት ስብራቱን ለማከም ከታች ጀምሮ በየደረጃው መሠራት ያለባቸው ብዙ የቤት ስራዎች አሉብን " ፕ/ር ብርሃኑ ነጋ

የ12ኛ ክፍል ማጠናቀቂያ ብሄራዊ ፈተና ውጤትን አስመልክቶ መግለጫ ተሰጠ
.............................
መስከረም 28/2016ዐ ዓ.ም (የትምህርት ሚኒስቴር)የ12ኛ ክፍል ማጠናቀቂያ ብሄራዊ ፈተና ውጤት አስመልክቶ በትምህርት ሚኒስቴር መግለጫ ተሰጥቷል።

ተማሪዎች ውጤታቸውን ከነገ ጠዋት መስከረም 29 ቀን 2016 ዓ.ም ጀምሮ በድረ-ገጽ እና በአጭር የፅሁፍ መልዕክት ማወቅ እንደሚችሉ የትምህርት ሚኒስትሩ ፕ/ሮ ብርሀኑ ነጋ ዛሬ ለመገናኛ ብዙሃን በሠጡት ጋዜጣዊ መግለጫ አስታውቀዋል።

ሚኒስትሩ እንደተናገሩት በ2015 የትምህርት ዘመን የ12ኛ ክፍል ማጠናቀቂያ ብሄራዊ ፈተና ከወሰዱ 845 ሺህ 188 ተማሪዎች ውስጥ 27 ሺህ ተማሪዎች ከ50 በመቶ በላይ በማምጣት የማለፍያ ውጤት ማስመዝገባቸውን ገልፀዋል።

ፈተናውን ከወሰዱት ውስጥ 3.2% ተማሪዎች ብቻ ማለፋቸውን የገለፁት ሚኒሰትሩ ውጤቱ ከባለፈው አመት ጋር ሲነፃፀር በ0.01 መቀነሱንም አብራርተዋል።

ዘንድሮ 3 ሺህ 106 ትምህርት ቤቶች ፈተና ያስፈተኑ ሲሆን፣ ከነዚህ ትምህርት ቤቶች ውስጥ 1 ሺህ 328 ትምህርት ቤቶች አንድም ተማሪ ማሳለፍ አለመቻለቸውን መታየት ያለበት ጉዳይ መሆኑን ገልጸዋል።
በዚህም 42.8 ከመቶ ትምህርት ቤቶች ምንም ተማሪ አለማሳለፋቸው ነው የተገለፀው።

የዘንድሮው ትልቁ የፈተና ውጤት 649 ሲሆን ይኸውም በተፈጥሮ ሳይንስ ትምህርት መስክ በሴት ተማሪ የተመዘገበ ሲሆን በማህበራዊ ሳይንስ ደግሞ 533 ከ600 ከፍተኛ ውጤት ሆኖ በወንድ ተማሪ የተመዘገበ መሆኑ ተገልጿል።

ሙሉ መግለጫውን ለማግኘት

https://rb.gy/244bs

የትምህርት ሚኒስትሩ ፕ/ር ብርሃኑ ነጋ በትምህርት ዘርፉ አካታችነት ዙሪያ ከኢትዮጵያ አካል ጉዳተኞች ማህበራት ፌዴሬሽንና የኢትዮጵያ ሰብአዊ መብቶች ኮሚሽን ጋር ተወያዩ
…………………………..//………………………

መስከረም 26/2016ዓ/ም (የትምህርት ሚኒስቴር) የኢትዮጵያ አካል ጉዳተኞች ማህበራት ፌዴሬሽንና የኢትዮጵያ ሰብአዊ መብቶች ኮሚሽን አመራሮች ከትምህርት ሚኒስትሩ ፕሮፌሰር ብርሀኑ ነጋ ጋር ተወያይተዋል።

የሀገሪቱ የትምህርት ስርዓት አካል ጉዳተኞችን ተደራሽ እና አካታች ከማድረግ አንፃር ያለበትን ችግር ተወካዮቹ ለፕሮፌሰር ብርሃኑ አብራርተዋል ።

የትምህርት ሚኒስትሩ ፕሮፌሰር ብርሃኑ ነጋም በትምህርት ፖሊሲው አካል ጉዳተኞችን በሚመለከት የሚስተዋሉ ችግሮችን ለመቅረፍ ትኩረት እንደተደረገ ገልጸዋል።

ይሁን እንጂ በመርህ ደረጃ የትምህርት ስርዓቱን አካታች ለማድረግ ስምምነትና ፍላጎት ቢኖርም በትግበራ ወቅት እንደ ሃገር ያለውን የመንግስት የአቅም ውስንነት ከግንዛቤ በማስገባት አቅም በፈቀደ መጠን ደረጃ በደረጃ የሚተገበር መሆኑን አስረድተዋል።