Ethiopian Press Agency/አማርኛ /

አቶ ደመቀ መኮንን በቤላሩስ የኢትዮጵያ የክብር ቆንስል ከሆኑት ሚስተር ዲሚትሪ ሉካሼንኮ ጋር ተወያዩ
******************
(ኢ ፕ ድ)
ምክትል ጠቅላይ ሚኒስትር እና የውጭ ጉዳይ ሚኒስትር አቶ ደመቀ መኮንን በቤላሩስ የኢትዮጵያ የክብር ቆንስል የሆኑትን ሚስተር ዲሚትሪ ሉካሼንኮን በጽ/ቤታቸው ተቀብለው አነጋግረዋል።
የክብር ቆንስሉ በምስራቅ አውሮፓዊቷ ሀገር ኢትዮጵያንና ህዝቧን በመወከል እያበረከቱት ስላለው አስተዋጽኦ አቶ ደመቀ ምስጋና አቅርበዋል።
ኢትዮያ እና ቤላሩስ በተለይ በኢንቨስትመንት፣ ቱሪዝም፣ ግብርና ሜካናይዜሽን እና ማዕድን ዘርፎች የሁለትዮሽ ትብብራቸውን ይበልጥ ማጠናከር ይገባቸዋል ብለዋል። "ይህን ለማሳካት በእኛ በኩል የምንችለውን እናደርጋለን" ብለዋል።
ሚስተር ዲሚትሪ ሉካሼንኮ በበኩላቸው በሁለቱ ሀገራት መካከል ያለውን ታሪካዊ ግንኙነት ወደ ላቀ ደረጃ ለማሸጋገር ያላቸውን ቁርጠኝነት መግለጻቸውን ከውጭ ጉዳይ ሚኒስቴር የቲዊተር ገጽ ያገኘነው መረጃ ያመለክታል።

መልካም ዕ ድል

የኢጋድ አባል ሃገራት የሕዝብ መገናኛ ብዙሃን በጋራ ለመሥራት ተስማሙ
******************
(ኢ ፕ ድ)

ከስድስት የኢጋድ አባል ሃገራት የተውጣጡ የሕዝብ መገናኛ ብዙሃን መረጃን በጋራ ለመጠቀም የሚያስችል የጋራ መግባቢያ ስምምነት በጅቡቲ ተፈራርመዋል።

የሰምምነቱ ፈራሚዎች የጋዜጠኝነት ሙያዊ ግዴታዎችን በጠበቀ መልኩ በየሃገራቸው የሚሠሩ ሥራዎችን በተመለከተ መረጃ የሚያጋሩበትና ወሰደው የሚጠቀሙበት ነው። የመግባቢያ ስምምነቱ 14 አንቀጾችን የያዘ ነው ተብሏል።

የጋራ ስምምነቱን ለማጽደቅ በተዘጋጀው የውይይት መድረክ ላይ የተገኙት የኢጋድ ሊቀመንበር ወርቅነህ ገበየሁ በቋንቋ፣ በባህልና በታሪክ በተሳሰሩት የኢጋድ አባል ሃገራት የሚገኙ መገናኛ ብዙኃን በጋራ አብረው መሥራታቸው ልማትን ለማፋጠን፤ ሕዝቦቹን ለማቀራረብ ወሳኝ ነው ብለዋል።

የኢጋድ አባል ሃገራት እንቅስቃሴ በዋናነት መዘገብ ያለበት በራሳቸዉ በአባል ሃገራቱ መገናኛ ብዙሃን መሆኑ ጥቅሙ የጎላ ነው ሲሉ የኢጋድ ሊቀመንበር ገልጸዋል።

የጋራ ስምምነቱን የፈረሙት የኢትዮጵያ፣ የጅቡቲ፣ የኬንያ፣ ዑጋንዳ፣ ሶማሊያና ደቡብ ሱዳን የሕዝብ መገናኛ ብዙኃን ናቸው።

#ከአፕድ_ማህደር
ፋንቱ ያለሰፈሯ ሌሊት ስትዞር ተይዛ ታሰረች
ወይዘሮ ፋንቱ ወልደማሪያም የተባለች በንፋስ ስልክ አካባቢ የምትኖር ሴት ያለሰፈሯ ከምሽቱ በ10 ሰዓት በየካቲት 12 አደባባይ ስትዘዋወር በመገኘቷ ተይዛ የሶስተኛ ወረዳ ፍርድ ቤት የአንድ ወር እስራት የቀጣት መሆኑን አስታውቋል፡፡
ወይዘሮ ፋንቱ ስትዘዋወር መገኘቷንና ተላላፊ መኪናዎችንም አድርሱኝ በማለት ማስቸገሯን ፖሊሶች መመስከራቸው ታውቋል፡፡
ተከሳሿም ፍርድ ቤት ቀርባ በተጠየቀች ጊዜ በአድራጎቷ ጥፋተኛ መሆኗን ስላመነች፤ ፍርዱ ተሸሽሎላት በ30 ብር መቀጫ ወይም በአንድ ወር እስራት እንድትቀጣ ተደርጎ መቀጫውን መክፈል ስላልቻለች አንድ ወር እንድትታሰር ወደ ወህኒ ወርዳለች ሲል ከአንደኛ ፖሊስ ጣቢያ አካባቢ ከሶስተኛ ወረዳ ፍርድ ቤት የተገኘ ዜና ያስረዳል፡፡
ጥቅምት 7 ቀን 1963 ዓ.ም በአዲስ ዘመን ጋዜጣ የታተመ
በኃይማኖት ከበደ

ጠቅላይ ሚኒስትር ዶክተር ዐቢይ አሕመድ የደቡብ ሱዳን ፕሬዚዳንት ልዩ መልዕክተኛን ዛሬ በጽሕፈት ቤታቸው ተቀብለው ማነጋገራቸውን በማህበራዊ ትስስር ገጻቸው አስታውቀዋል።