Ethiopian Press Agency/አማርኛ /

የትግራይ ክልልን የንግድ እንቅስቃሴ ለማነቃቃት የሚያስችል ተጓዠ ባዛር ሊካሄድ ነው
*******************
(ኢ.ፕ.ድ)

የትግራይ ክልልን የንግድ እንቅስቃሴን የማነቃቃት ዓላማ ያለውና "ሰላም ትግራይ ተጓዠ ባዛር ለቀጠናዊ ሰላም" በሚል መሪ ቃል ይካሄዳል፡፡

የንግድና ቀጠናዊ ትስስር ሚኒስቴር የንግድ ሥርዓት ዘርፍ ሚኒስትር ዲኤታ አቶ ተሻለ በልሁ ዛሬ በሰጡት መግለጫ እንደገለጹት፤ ባዛሩ ባለፋት ጊዜ ተቋርጦ የነበረውን የትግራይ ክልል የንግድ ሥርዓት ወደ ነበረበት ለመመለስ የሚያስችል ነው፡፡

ተጓዥ የንግድ ባዛሩ ሚያዝያ 21 ቀን 2015 ዓ.ም የፌዴራልና የክልል ከፍተኛ ባለሥልጣናት በተገኙበት በመቀለ ከተማ እንደሚከፈትም ሚኒስትር ድኤታው ገልፀዋል፡፡

ባዛሩ በተለያዩ የክልሉ ከተሞች ማለትም በመቀለ፣ በውቅሮ፣ አዲግራትና በማይጨው ከተሞች ይካሄዳል ብለዋል፡፡

በባዛሩ መሰረታዊ የምግብ፣ የንጽህና መጠበቂያን ጨምሮ የተለያዩ ምርቶች ለተጠቃሚዎች የሚቀርቡ መሆኑንም አመልክተዋል፡፡

የንግድና ማህበራት ዘርፍ ተወካይ ዶክተር ደገላ ኤርገኖ በበኩላቸው ባዛሩ ተቋርጦ የነበረውን የንግድ እንቅስቃሴ ለማነቃቃት የሚያስችልና ለአንድ ወር የሚቆይ ነው ሲሉ ገልጸዋል፡፡

በማርቆስ በላይ

የአንድ ሺ 444ኛው ዒድ አል-ፊጥር የሶላትና የተክቢራ ስነስርአት ተጠናቀቀ
*****************
(ኢ.ፕ.ድ)

በእስልምና እምነት ተከታዮች ዘንድ በድምቀት የሚከበረው አንድ ሺ 444ኛው የዒድ አል-ፊጥር የሶላትና የተክቢራ ስነስርአት በአዲስ አበባ ትንሿ ስታዲየም ተካሂዷል።

በዒድ ሶላት መርሃግብሩ  የኢትዮጵያ እስልምና ጉዳዮች ጠቅላይ ምክር ቤት ፕሬዚዳንት ሼይክ ሀጂ ኢብራሂም ቱፋ፣ የገንዘብ ሚኒስትሩ አቶ አህመድ ሽዴ፣ ኡስታዞች፣ ኢማሞችና የእምነቱ ተከታዮች ተገኝተዋል።

በሞገስ ተስፋ

በአዲስ አበባ ትንሿ ስታዲየም የ"ተክቢራ" ስነ ስርዓት እየተከናወነ ይገኛል
***************
(ኢ.ፕ.ድ)

የ"ተክቢራ" ስነ ስርዓት በእስልምና እምነት ተከታዮች ዘንድ አምላክን የማወደስ፣ የማስታወስና የማላቅ ሃይማኖታዊ የክንውን ስርዓት ነው።

ይህንኑ ሥነ ስትዓት ህዝበ ሙስሊሙ በአሁኑ ሰዓት በአዲስ አበባ ትንሿ ስታዲየም እያከናወነ ይገኛል።

በመቀጠል የስግደት ስነ ስርዓት የሚከናወን ይሆናል።

በዓሉ የአንድነት፣ የፍቅርና የመተሳሰብ ባህልን የሚያጠናክር መሆኑንም የእስልምና እምነት ተከታዮች ተናግረዋል።

በሳሙኤል ወንድወሰን

"አገር ሰላም ሆና ዒድ አል- ፊጥርን በደማቅ ሁኔታ እያከበርን መሆናችን ታላቅ መንፈሳዊ ደስታን ፈጥሮልናል"
- የእስልምና እምነት ተከታዮች
******************
(ኢ.ፕ.ድ)

አገር ሰላም ሆና አንድ ሺ 444ኛውን ዒድ አል- ፊጥርን በደማቅ ሁኔታ እያከበርን መሆናችን ታላቅ መንፈሳዊ ደስታ ተሰምቶናል ሲሉ አስተያየታቸውን ለኢትዮጵያ ፕሬስ ድርጅት የሰጡ የእስልምና እምነት ተከታዮች ገለጹ።

በአዲስ አበባ ትንሿ ስታዲየም ዒድ አል-ፊጥርን እያከበሩ ያገኘናቸው አህመዲን ሁሴን እንደገለጹት፣ በኢትዮጵያ የነበረው የድርቅ፣ የግጭትና መሰል ችግሮች ተቀርፈው ዒድን በሰላም እያከበርን ነው። የእምነትን አስተምሮ በመከተል ዒድን ማክበር የሚቻለው አገር ሰላም ስትሆን ነው። ስለዚህ አገራችን ሰላም በመሆኗ ኢድን በማክበራችን ታላቅ መንፈሳዊ ደስታ ተሰምቶናል ብለዋል።

ሌላው የበዓሉ ታዳሚ አህመድ ሁሴን በበኩሉ በእስልምና ዒድ አል-ፊጥር የመከባበር፣ የመቻቻል የመደጋገፍ እሴት የሚታይበት ነው። ስለሆነም ዒድንየተቸገሩትን በመደገፍ፣ የታመሙትን በመጠየቅ የምናከብረው ነው ብሏል።

ኢትዮጵያ ሰላም ስለሆነች ኢድን በሰላም ማክበር ችለናል ነው ያሉት የበዓሉ ታዳሚዎች።

በሞገስ ተስፋ

የጠቅላይ ሚኒስትር ዐቢይ አሕመድ መልዕክት
ሰላም የሁሉም መልካም ነገር መሠረት እንደመሆኑ፣ ያለ ሰላም ልማት የማይታሰብ ነው። ሕዝባችን ሰላሙን በማረጋገጥ ፊቱን ወደ ልማት እንዲያዞር የማድረግ የጋራ ኃላፊነት አለብን:: በነቀምት ለነበረኝ ቆይታ እና ውይይት ሕዝቡን አመሰገናለሁ።

ጠቅላይ ሚንስትር ዐቢይ አሕመድ ነቀምቴ ከተማ ገቡ
***************
(ኢ.ፕ.ድ)

ጠቅላይ ሚንስትር ዐቢይ አሕመድ ዛሬ ጠዋት ነቀምቴ ከተማ ገብተዋል።

ጠቅላይ ሚኒስትሩ ነቀምት ሲገቡ አባ ገዳዎች፣ ሐደ ሲንቄዎች፣ የሃይማኖት አባቶች፣ አመራሮችና ሌሎች የኅብረተሰብ ክፍሎች ደማቅ አቀባበል እንዳደረጉላቸው የጠቅላይ ሚኒስትር ጽህፈት ቤት ዘግቧል::