EBC (Ethiopian Broadcasting Corporation)

ከ10 ዓመታት በኋላ የአፍሪካ ጂኦተርማል ኢነርጂ የማመንጨት አቅም ከአውሮፓ እንደሚበልጥ ይጠበቃል
*****************

በሪስታድ ኢነርጂ የቅርብ ጊዜ ትንበያ መሠረት፥ የአፍሪካ የጂኦተርማል ዘርፍ በ2050 ቢያንስ 35 ቢሊዮን ዶላር ኢንቬስትመንት ይስባል ተብሎ ይጠበቃል።

በዚህም በፍጥነት እያደገ የመጣውን የአህጉሪቱን የኃይል ፍላጎት ለማሟላት ዘርፉ ወሳኝ ሚና መጫወት ይጀምራል።

በዚሁ ትንበያ መሠረት፥ በአፍሪካ የጂኦተርማል ኢነርጂ ዘርፍ ላይ እየፈሰሰ ያለው መዋዕለ ንዋይ በዚሁ ከቀጠለ፤ ከአስር ዓመታት በኋላ የአፍሪካ ጂኦተርማል ኢነርጂ የማመንጨት አቅም ከአውሮፓ እንደሚበልጥ ይጠበቃል።

ምንም እንኳ የአፍሪካ ጂኦተርማል ኢነርጂ የማመንጨት አቅም አሁን ላይ የአውሮፓን ግማሽ ወይም ወደ 1 ጊጋ ዋት ገደማ ብቻ ቢሆንም፤ እኤአ በ2030 የአፍሪካ ጂኦተርማል ኢነርጂ የማመንጨት አቅም በእጥፍ ያድጋል።

በነገራችን ላይ፥ ይህ ስሌት ታሳቢ ያደረገው እስካሁን ይፋ የተደረጉ የጂኦተርማል ኢነርጂ ፕሮጀክት ዕቅዶችን ብቻ ነው፤ ወደ ፊት ይፋ የሚደረጉ የጂኦተርማል ኢነርጂ ፕሮጀክት ዕቅዶች ሲታከሉበት እኤአ በ2030 የአፍሪካ የማመንጨት አቅም በሁለት እጥፍ ሊድግ ይችላል።

እኤአ በ2050 የአፍሪካ ጂኦተርማል ኢነርጂ የማመንጨት አቅም ወደ 13 ጊጋ ዋት እንደሚያድግ ይጠበቃል፤ ይህም በተጠቀሰው ወቅት አውሮፓ ትደርስበታለች ተብሎ ከሚጠበቀው የ5.5 ጊጋዋት አቅም ጋር ሲነፃፀር ከእጥፍ በላይ ነው።

በተጠቀሰው ወቅት፥ ኢትዮጵያ እና ኬንያ 90 ከመቶ የሚጠጋውን የአፍሪካን ጂኦተርማል ኢነርጂ የማመንጨት አቅም ጠቅልለው በመያዝ የአህጉሪቱን የጂኦተርማል ኢነርጂ ዘርፍ ዕድገት ይመራሉ ተብሎ ይጠበቃል።

በኔፓል በደረሰ የመሬት መንቀጥቀጥ አደጋ ከ100 በላይ ሰዎች ህይወታቸው አለፈ
******

በምዕራብ ኔፓል በደረሰ የመሬት መንቀጥቀጥ አደጋ ከ100 በላይ ሰዎች ህይወታቸው ማለፉ ተገልጿል፡፡

የመሬት መንቀጥቀጡ ከዋና ከተማዋ ካታማንዱ በ500 ኪ.ሜ ርቀት ላይ የሚገኙ ጃጃርኮት እና ሩኩም የተባሉ ከተሞችን መምታቱ ተነግሯል፡፡

በርዕደ መሬት መለኪያ 5.6 ማግኒቲዩድ ሆኖ የተመዘገበው የመሬት መንቀጥቀጡ ንዝረቱ እስከ ጎረቤት ሀገር ህንድ ድረስ ተሰምቷል ነው የተባለው፡፡

በአደጋው ጉዳት የደረሰባቸው በርካታ ሰዎች በጃጃርኮት ሆስፒታል እርዳታ እየተደረገላቸው እንደሚገኝም ተመላክቷል፡፡

የሀገሪቱ ጠቅላይ ሚኒስትር ፑሽፓ ካማል ዳሃል ጉዳት የደረሰበትን ክልል የጎበኙ ሲሆን የተጠናከረ የነብስ አድን ስራ እንዲሰራ ትዕዛዝ ማስተላለፋቸውንም ቢቢሲ ዘግቧል፡፡

በሶማሌ ክልል በተከሰተ የጎርፍ አደጋ የሰዎች ሕይወት መጥፋቱን የክልሉ አደጋ ስጋት ስራ አመራር ቢሮ ገለፀ
*********

በክልሉ ሰሞኑን እየዘነበ በሚገኘው ከባድ ዝናብ ሳቢያ በተለያዩ አካባቢዎች ከባድ የጎርፍ አደጋ መከሰቱን በቢሮው የቅድመ ማስጠንቀቂያ አስተባባሪ በሺር አረፕ አስታውቀዋል።

በጎርፍ አደጋው እስካሁን ከ20 በላይ ሰዎች ሕይወታቸው ማለፉን የገለፁት ሀላፊው፤ ከ12 ሺህ በላይ አባወራዎች መፈናቀላቸውንም ተናግረዋል።

በተጨማሪም በእንስሳት ሀብት፣ በሰብል እና በንብረት ላይም ጉዳት መድረሱን ገልፀዋል።

የሶማሌ ክልል መንግሥት እና በክልሉ የሚንቀሳቀሱ ግብረሰናይ ድርጅቶች የዕለት ደራሽ እርዳታዎችን ለማድረስ እየሰሩ ቢሆንም፤ ድልድዮችና መንገዶች በጎርፉ በመወሰዳቸው ስራውን አስቸጋሪ አድርጎታል ብለዋል አስተባባሪው።

እየጨመረ ያለው የዝናብ መጠን እና ትንበያዎች እንደሚያሳዩት የጎርፍ አደጋው ስጋት አሁንም ከፍተኛ ነው።

በሞላ አለማየሁ