አዲስ መረጃ

ህወሃት ከባድ መሳሪያ ማስረከብ ጀምሯል
በህወሓት እና በፌደራል መንግስቱ መካካል የተደረሰው የሰላም ስምምነት ተከትሎ በአፍሪካ ህብረት አስተባባሪነት የተቋቋመው የቁጥጥር እና ክትትል ቡድን ስራውን በይፋ መጀመሩን አስታወቀ።

የቡድኑ አበላት ዛሬ ለጋዜጠኞች በሰጡት መግለጫ እንደተገለፀው በተደረሰው የሰላም ስምምነት መሰረት የከባድ መሳርያ ርክክብ ስራ መጀመሩን ገልፃል።
በጋዜጣዊ መግለጫው የቁጥጥር እና ክትትል ቡድን አባላት ጨምሮ የሁለቱም ወገኖች ወታደራዊ አመራሮች የተገኙ ሲሆን ለሰላም ስምምነቱ ተግባራዊነት አሁንም ጥረታቸውን አጠናክረው እንደሚቀጥሉ ገልፀዋል።
የሰላም ስምምነቱ በቀጣይነት ተግባራዊ እንዲሆን ሌሎች ከፍተኛ ትኩረት እና ስራ የሚሹ ጉዳዮች እንዳሉም በመግለጫው ተመላክቷል።

=====================

የኢትዮጵያ ፌደራል ፖሊስ ስልክ የሚጠልፍ ቴክኖሎጂ እየተጠቀመ መሆኑ ተገለጸ

ረቡዕ ታሕሳስ 12 ቀን 2015 (አዲስ ማለዳ) ኢትዮጵያ ‹‹ዩኤፍ ኢዲ›› የተሰኘ ከግለሰቦች የእጅ ስልክ መረጃ በድብቅ በቀላሉ ለማግኘት የሚያስችለውን ቴክኖሎጂ ከእስራኤል መግዛቷ ተሰምቷል፡፡

የኢትዮጵያ ፌደራል ፖሊስ ቴክኖሎጂውን ከእስራኤሉ የዲጂታል መረጃ (ሴሌብሪቲ) ድርጅት የገዛ ሲሆን፣ ይህም በተለይ የተቃዋሚ ኃይሎችና ጋዜጠኞችን የእጅ ስልክ ለመጥለፍ  በእጅጉ ያግዛል ተብሏል፡፡

የኢትዮጵያ ፌደራል ፖሊስ ከፈረንጆች 2021 ጀምሮ በማዕከላዊ መንግስቱና በትግራይ ኃይሎች መካከል በተካሄደው የእርስ በእርስ ጦርነት ወቅት ይህን ቴክኖሎጂ ሲጠቀም መቆየቱም ተነግሯል፡፡

ቴክኖሎጂው በይለፍ ቃል የታሰሩና የተያዙ ስልኮችን ለመጥለፍ ባለስልጣናት የሚጠቀሙበት ሲሆን፣ የሚዲያ ፋይሎችን እና የፅሁፍ መልዕክቶችን፣ የጥሪ ታሪኮችን፣ እውቂያዎችን እና ሌሎችንም ጨምሮ በስልኮች ውስጥ የተከማቸውን ሁሉንም መረጃዎች እንዲያገኙ ያስችላል፡፡

ሃሬትዝ ድረገጽ ይዞት በወጣው ዘገባ፣ የእስራኤሉ የቴክኖሎጂ ተቋም ደንበኞች ጨቋኝ ስርዓት የነበራቸው እንደ ቤላሩስ፣ ቻይና፣ ሆንክ ኮንግ፣ ኡጋንዳ፣ ቬንዙዌላ፣ ኢንዶኔዥያ እና ፊሊፒንስ ይገኙበታል፡፡

እስራኤላዊው የሰብዓዊ መብት ጠበቃ ኢታይ ማክ ለእስራኤል መከላከያ ሚኒስቴርና ለሴሌብሪቲ ኩባንያ በላኩት ደብዳቤ፣ “ኩባንያው ለኢትዮጵያው አፋኝ ስርዓት የሚያደርገውን የቴክኖሎጂ ሽያጭ እንዲያቆም” ጠይቀዋል ተብሏል፡፡

‹‹ዩኤፍ ኢዲ›› የሚባለው እስራኤል ሰራሽ የሶፍትዌር ቴክኖሎጂ ሰላዮች የግለሰቦችን የስልክ መረጃ በቀላሉ እንዲያገኙ የሚያስችላቸው ቴክኖሎጂ ነው፡፡