2022-11-11 08:54:34
የማለዳ ማስታወሻ #145
.
ሕልም የሌላትን ሴት እፈራለሁ። ሕልሟ አግብቶ መውለድ ብቻ የኾነች ሴት ሳይ ደግሞ እሸማቀቃለሁ። አግብቶ መውለድ በተፈጥሮ የተሠጠ መንገድ እንጂ ሕልም መኾን አይችልም። ድመትም ፍየልም ሳያልሙ በተሠጣቸው አጭር ዕድሜ ውስጥ ወልደው ያልፋሉ። መጠለያ የሌላቸው የጎዳና ተዳዳሪ ሴቶችም ይወልዳሉ። ምክንያቱም መውለድ የተፈጥሮ ሕግ እንጂ ሕልም ስላለኾነ።
.
የማሕበረሰብ ቀውስ መድኃኒትም መርዝም ሴት ልጅ ናት። ሴት ቁሳዊ ስትኾን፣ እናት ለልጇ ዋጋ ስትተምን ቀሪው ማሕበረሰብ ቁስ አዳኝ ይኾናል። ተምራ፣ሠርታ እና ለፍታ መኪናም ኾነ ቤት መግዛት እንደምትችል ያልተነገራት ሴት ደስተኛ ቤተሰብ መመሥረት አይቻላትም። ደስተኛ ካልኾነ ቤተሰብ የወጣ ልጅስ ለማሕበረሰቡ ብሎም ለሐገሩ ምን መሥጠት ይችላል?(ከጨለምተኝነት ውጪ?)
.
አንጋፋው የራሺያ ደራሲ ማክሲም ጎርኪ "ሴት ልጅ ሁለተኛ ነፍስህ ናት!" በሚለው አምናለሁ። ከማመንም አልፎ ሴት ልጅ ከወንድ አንድ ደረጃ ከፍ ብላ የተቀመጠች ባለማዕረግ መኾኗን እቀበላለሁ።
.
ዘመናችን የሴቶችን ማዕረግና ክብር ከራሳቸው ከሴቶቹም የሸሸገ ይመስላል። አግብቶ ለመውለድ የተፈጠሩ እስኪመስል ድረስ ሕልም አልባ አድርጓቸዋል። ሴትነታቸው ፈተና እንጂ ፀጋ እንዳልኾነ ሁሉ በትዳር ውስጥ ከትግል ለመራቅ ሲጥሩ ይታያል።ይመስላቸው ይኾናል እንጂ ትዳር ውስጥ ያለው ፈተና ቢከፋ እንጂ አያንስም። ትዳር ውስጥ ያለውን ፈተና የሚቋቋም ትከሻቸው ሕልማቸውን ለመኖር ለሚጎሽማቸው የውጪው ዓለም ፈተናም ብቁ ስለመኾኑ ይጠራጠራሉ።
.
ትዳር በትክክለኛው ጊዜ፣ ከትክክለኛው የነፍስ አጋር ጋር ሲኾን ቅዱስ እና ብሩክ ነው። ሕልምን የሚሰዉበት ሳይኾን ሕልምን ለማሳካት የኃይል ስንቅ የሚቋጥሩበት ዓለም ነው።
.
ከአጠገባችን ብዙ ሴቶች እንደፈረስ የፊቱን ብቻ እያዩ ከነ ልጓማቸው ተድረዋል። ቤት ንብረት እና ገንዘብ ስላለው ብቻ አግብተው፣ሕልማቸውንና ዕውቀታቸውን ሰውተው በአንድ ጎጆ ውስጥ ይኖራሉ። ቤት እንደሚፈርስ፣ ንብረት እንደሚወድም፣ ገንዘብ እንደሚጠፋ አለማሰባቸው ውስጥ የማሕበረሰቤን ውደቀት አስተውለላሁ። ሐገር ለማቆም፣ መንገድ ለማቅናት መፍትሔ መኾን የሚችሉ እንስቶች "አልችልም" በሚል መረብ ራሳቸውን አጥምደው ሳይ አዝናለሁ። የሴት ልጅ የመጀመሪያው መስፈርት "ምን ታበላኛለህ?" የኾነ ጊዜ ነበር እንደማሕበረሰብ የከሸፍነው። ወንድ ልጅም የትዳር ጥያቄውን ተንበርክኮ በክብር ጥያቄ ሊያቀርብላት ለሚገባው ሴት " ከገንዘብ፣ ከመኪና፣ ከቤት ውጪ ምን ትፈልጊያለሽ?" ሲላት መውደቂያችን ላይ ተደላድለናል ማለት ነው።
.
ሴት ልጅ ሕልም ይኑራት፣ ለዓለም የሚተርፍ ሕልም። ሴት ልጅ ልብ ይኑራት፣ ለሐገር የሚበቃ። ሴት ልጅ ምንም ማድረግ እንደምትችል ስታምን የሚያገባት ወንድ ሳይኾን የምታገባውን ወንድ በልቧ ፈልጋ ታገኛለች።
.
(#ፈይሠል_አሚን)
.
@huluezih
@huluezih
486 viewsFa, 05:54
ወ
