ወኔ እና ቅኔ -(ፈይሠል አሚን)

2022-10-13 11:45:41 የማለዳ ማስታወሻ #143
.
ሰው ዐይቻለሁ፣ሁሉንም ዓይነት ሰው። ለመልዓክ ከተጠጋ ንፁህ እ ስከ ግብረ-ሰይጣን ድረስ ዐይቻለሁ። ይኼን ሁሉ ዓይነት ሰው ከማየት አንድ ነገር ቀሰምኩ። ጎልተው በአዕምሯችን የሚመጡት፣ ከልሳናችን የማይጠፉት፣ ክፉ ሰዎች ናቸው። ክህደታቸው፣ ውሸታቸው፣ ክፋታቸው፣ ምቀኝነታቸው እና ራስ ወዳድነታቸው ዛሬም ድረስ ስናስበው ቢያልፍም ይጠዘጥዘናል፣ ቁጭት መንፈሳችን ላይ ጠባሳውን ጥሎ ስለሚያልፍ አንረ ሳቸውም። ስለ ጭካኔ፣ ስለ አረመኔነት ሲነሣ ሰርክ ዓይነ-ሕሊናችን ላይ ይውላሉ። ሰዎች ነንና የቱንም ያኽል ይቅርታ አድርገን በምሕረት ብናልፍ እንኳ ከይቅርታ ጋር ከልባችን የሚወነጨፍ የእርግማን ፍላፃ ወደ ሕይወታቸው ይወረወራል።
.
መጥፎ እና አረመኔ ሰዎች ዕድሜያቸው ረዥም ነው። የነኩት የሚበዛ፣ የዳበሱት የሚወዛ መሻታቸውን የሚያገኙ ኾነው እናያለን። ክፋታቸው ወይም መጥፎ ግብራቸው ተረስቶ ሳይኾን ከአወዳደቅ በፊት ለቅጽበት የሚደምቅ አቋቋም ስላለ ነው። ይወፍራሉ፣ ለመገርጠት አንድ ሐሙስ ሲቀራቸው። ያካብታሉ፣ ለመደኽየት እርምጃ ሲቀርባቸው። ደግሞም ይረጋጋሉ፣ ለመተራመስ አንዲት ንጋት እስክትመጣ።
.
ሰዎችን ዐይተናል። ዙሪያችን ያሉ መልዓክትን ግን የረጋ ቦታ አልሠጠናቸውም። በሚነቃነቅ ድልድይ ላይ እጃቸውን የዘረጉልንን፣ በነዲድ በረሃ ውኃ ያ ስጎነጩንን፣ ነገን ለማየት አቅም አንሶን አንጠራርተው የነገን ጀምበር የጠቆሙንን ብዙ አንልላቸውም። ሲያልፍ ካለፈ ቀን ጋራ ባሉበት ጥለን ወደፊት እንጓዛለን። ሰው ነን።
.
ሁሉንም ዓይነት ሰው ስታዩ፣ ሰው መኾንን አትርሱ። በእኛ ሕይወት ውስጥ የሚዘረጋ እጅን ስንፈልግ በሌላው ሕይወት ውስጥ ግን እጅ የሚዘረጋ መልዓክ ነን። የቀረው ይቅር እንጂ ለቅጽበት ሰይጣንን አትኹኑ። ሰዎቹ ይቅር ቢሉን የጊዜ ሚዛን የፍርድ አረሩን ይዞ ያሳድዳችኋል። ሕይወት ቀላል ነው። እንደገና የመጀመር ብዙ ዙሮች ያሏት አጭር ሻማ ናት። መልዓኮቻችንን እያከበርን፣ ከታደልንም መልዓክ እየኾንን ነገን እንጠብቃለን። በእነዚህ አጭር ዙሮች ሊጥሉን የባተሉ ሰይጣናት እንደ ሾላ ሲረግፉ እያየን ጉዟችን ላይ ትንሽ መረማመጃ እናበጃለን። ብሩህ ቀን ከፊታችን እየጠበቀን ለምን በሰይጣን ሰዎች ምክንያት እንቆማለን?
.
(#ፈይሠል_አሚን)
.
@huluezih
@huluezih ክፈት / አስተያየት ይስጡ

2022-10-11 17:29:52 "ግመሎች ይሔዳሉ፣ውሾች ይጮኻሉ!"
.
(#ፈይሠል_አሚን)
.
የአጎብዳጅ እውነት. . .
በጩኸት!
የሰርጓጅ እምርታ. . .
በዝምታ!
ግመሎች ይሔዳሉ፣
ውሾች ይጮኻሉ!
ኡኡታም ሲረክስ
በዝንጀሮ ክስ. . .
እስክስ!!!!
ወደ ላይ ሲታገል፣ንፋስን ሲጋፈጥ፣
ወጡን ያባክናል፣ቅመም ለማጣፈጥ!
.
(Inspired by: Ayub Adem)
.
@huluezih
@huluezih ክፈት / አስተያየት ይስጡ

2022-10-10 17:12:33 . . .of the day! ክፈት / አስተያየት ይስጡ

2022-10-07 13:32:23 . . .of the day! ክፈት / አስተያየት ይስጡ

2022-10-03 21:08:20 እንቆቅልሽ መፍቻ!
.
(#ፈይሠል_አሚን)
.
ሲዛነፍ ውላችን፣
ያሳለፍነው ጊዜ ጣዕሙ ተረሳ፣
ፀጋ በረከቱ ከእጃችን ተነሣ።
የሉም የነበሩት. . .
ጊዜዬን የገበሩት!
.
አሁን ላይ. . .
ልሙት ወይም ልኑር?
ልውደቅ ወይም ልቁም?
በፍፁም አያውቁም!
.
አልፈርድም በማንም፣
ጊዜ እና ሰው አላምንም!
.
እንቆቅልሽ መፍቻ፣
መች ታደልኩኝ አቅም?
ልሙት? ወይም ልኑር?
እኔ ራሴም አላውቅም።
.
@huluezih
@huluezih ክፈት / አስተያየት ይስጡ

2022-09-28 20:50:53 ለአዳ'ኝ ሰባሪዎች
.
(#ፈይሠል_አሚን)
.
የድባቴ ገደል ሐዘን እንዲበላኝ፤
የድቅድቅ ጎራዴ፣ ስለት እንዲቀላኝ፤
ጥረው ጡብ አቆሙ. . .
አዋጡልኝ ጠጠር፣
የፍካቴን ዕድሜ፣
ዘመን ለማሳጠር ።
መስበር. . .
ማጨለም፣
ማድቀቅ. . .
ማነከት. . .
ፈገግታ ለውሶ፣ተስፋ ለመፈንከት!
እውነቱ ግን ወዲህ፣
እንቅጩ ግን እንዲህ፣
.
.
.
"ምሬትን ተላምዶ፣የሰው ነፍስ ሲለግም፣
የተሰበረ ልብ አይሠበርም ዳግም!"
.
@huluezih
@huluezih ክፈት / አስተያየት ይስጡ

2022-09-28 07:43:51 የማለዳ ማስታወሻ #142
.
ሩቅ ነኝ። ከቆምኩበት መሬት እንደ ሰማይ የራቅኩ ያክል ይሰማኛል። ከግቤ የተሰደድኩ ያክል እየሸሸሁ፣ ከዓላማዬ የተኳረፍኩ ይመስለኛል። ራሴን የሌለሁበት ቦታ ላይ የምፈልግ፣ አሁን የተገኘሁበት ሥፍራ ላይ እንግዳ የኾንኩ ያክል ባይተዋርነት ይወርረ ኛል። ዓለም የጠበበችኝ አልያም የሰፋችኝ ይመስለኛል። አጥር አልባ ሕይወት ውስጥ፣ ድንበር የለሽ ክበብ ውስጥ ራሴን ደጋግሜ አገኘዋለሁ። ሕጎች ስብዕናዬን የማያከብሩ ያክል ይጨቁኑኛል። የኑሮ ዑደቶች እየዞሩ ወደ ነበርኩበት የውዥቀት ዳስ ውስጥ ይመሉሱኛል። ራሴን እስክጠላው፣ ሰው መኾኔን እንደ መቅሰፍት እስክቆጥር ድረስ እወርዳለሁ። ወድቄ ለመነሣት ስል ደጋግሜ እወድቃለሁ። መሞከር ይደክመኛል። እያንዳንዱ ሙከራዎች ሌላ ህመም የሚፈለፍሉ መንገዶች ኾነው ይሰሙኛል። የትም የለሁም፣ የትም እገኛለሁ። ሁለት ዓይነት መንገዶች በትንሿ መቆሚያዬ ላይ ይታዩኛል። ወዴትም ባልሔድ እንኳ የየትኛውም ጎዳና እሳት ወደ እኔ የተረጨ ያክል ያቃጥለኛል። የቱም የእኔ አይደለም። የእኔ ጉዳይ ያልኾኑ ነበልባሎች ግን ወደ እኔ ከመስፈንጠር አይቦዝኑም። ገፈት ቀማሽ ነኝ።
.
ከዚህ ሁሉ ረመጥ ውስጥ የማይለየኝ አንድ ስሜት ብቻ ተስፋ ይሠጠኛል። የኾነ የማይታየኝ መፍትሔ እንዳለ ውስጤ ይነግረኛል። ከዚህ የእኔ ከማልለው ክበብ ውስጥ እንደምወጣ ይሰማኛል። የኖርኳት እፍኝ የማትሞላ ዕድሜ ሕይወት ላይ እና ታች እንዳላት አስተምራኛለች። ይኼ የሕይወት አንዷ የታች ገጽታ እንጂ የማይናውዝ ቋሚ ምስሏ እንዳልኾነ ይገባኛል። አንድ ቀን "የእኔ" የምለውና የሚመጥነኝ የነፍሴን ሥፍራ አገኘዋለሁ። የገፋኝ ሁሉ በጠመደው ወጥመድ ሊስበኝ ይሞክራል። ትናንቴን ረስቶ የጣለኝ ይሸከመኛል። አሁን ሩቅ ነኝ። ቅርበት ግን ሩቅ እንዳልኾነ ልቤ ይነግረኛል። ጊዜ ከአምላክ በታች ያለ ሌላ አምላክ ነው። የታቹን ወደ ላይ፣ የላዩን ወደ ታች የማድረግ ሥልጣን ተሠጥቶታል። የራቅኩትን ያክል ወደ ራሴ የምቀርብበት ጊዜ ይመጣል። ጊዜ ሁሉን ይለውጣል፣ ራሱ ጊዜም ይለወጣል።
.
(#ፈይሠል_አሚን)
.
@huluezih
@huluezih ክፈት / አስተያየት ይስጡ

2022-09-22 13:16:10 . . .of the day! ክፈት / አስተያየት ይስጡ

2022-09-21 15:34:09 ‹‹ሣቅሽ እና ነገ››

(#ፈይሠል_አሚን)
.
@huluezih
@huluezih ክፈት / አስተያየት ይስጡ

2022-09-17 20:55:57 . . .of the day! ክፈት / አስተያየት ይስጡ