ሪፖርተር (Ethiopian Reporter)

አቶ ግርማ ዋቄ ከአየር መንገድ ቦርድ ሰብሳቢነት ለቀቁ

- በምትካቸው ሌተናል ጄነራል ይልማ መርዳሳ ተሹመዋል

የኢትዮጵያ አየር መንገድ የቦርድ ሰብሳቢ የነበሩት አቶ ግርማ ዋቄ ከሃላፊነታቸው መልቀቃቸው ታወቀ፤ የፌደራል ባለስልጣናት ግን የለቀቁበትን ምክንያት እስካሁን ይፋ አላደረጉም።

አቶ ግርማ ከኢትዮጵያ አየር መንገድ ቦርድ ሰብሳቢ ሆነው እያገለገሉ እንዳልሆነ ለሪፖርተር አረጋግጠዋል። ነገር ግን ከኃላፊነታቸው የለቀቁበትን ምክንያት በተመለከተ ማብራሪያ ለመስጠት ፈቃደኛ አልሆኑም።

በአቶ ግርማ ዋቄ ምትክ የኢትዮጵያ አየር ኃይል ዋና አዛዥ የሆኑት ሌተናል ጄነራል ይልማ መርዳሳ የኢትዮጵያ አየር መንገድ የቦርድ ሰብሳቢ ሆነው መሾማቸውን ምንጮች ለሪፖርተር ገልጸዋል።

የቀድሞው የኢትዮጵያ አየርመንገድ ዋና ሥራ አስፈጻሚ አቶ ተወልደ ገብረማርያም በድንገት ከላፊነት መልቀቃቸውን ተክትሎ መንግሥት ስመ ጥሩን የአቪዬሽን ባለሙያ አት ግርማ ዋቄ በመጥራት በአየርመንገዱ የተከሰተውን የስልጣን ክፍተት እንዲቀርፉና ጤናማ ሽግግር እንዲያመቻቹ ባለፈው ዓመት መጋቢት ወር ላይ የአየርመንገዱ የቦርድ ሊቀመንበር አድርጎ መሾሙ ይታወሳል።

አቶ ግርማን የተኩት ሌተናል ጀነራል ይልማ መርዳሳ ላለፉት ሁለት ዓመታት የአየርመንገዱ ቦርድ አባል ሆነው አገልግለዋል።