Dr. Eyob Mamo

2024-03-18 19:28:23 መፍትሄ ለማይሰጥህ ሰው ችግርህን አታጋራ

ችግርህን ላገኘኸው ሰው ሁሉ የመንገር ልማድናጥማት ካለብህ ያንን ጥማት ለጊዜው ከማርካት ውጪ ከሁኔታው ምን ጥቅም እንደምታገኝና እንዲያውም ሊጎዳህ እንደሚችል ላስታውስህ፡፡ ችግርህን ምንም መፍትሄ ለማይሰጥህ ሰው የመናገር ጥማቱ ግን ረክቶ ስለማይረካ እንደገና ችግርህን የምታወራበት መስክ ፍለጋ መዞርህና መጦዝህ አይቀርም፡፡

ችግርህን ባገኘህበት ስፍራ የመናገር ሌላው መዘዝ ለሰሚዎቹ የግል አመለካከት ራስህን የማጋለጥና የሰዎች ፍልስፍና ማራገፊያ የመሆን ችግር ነው - አንዳንዴ ደግሞ የወሬኛ ሰው ሰለባ ትሆናለህ፡፡

ለሰዎች ችግርህን ስትነግር እነዚያ ሰዎች ከሁለቱ አቅም ቢያንስ አንዱ ሊኖራቸው ይገባል፡ 1ኛ) ችግርህን ከሰሙ በኋላ ያንን ችግር የማቃለልና መፍትሄ የመስጠት አቅም፤ 2ኛ) ችግርህን ከሰሙ በኋላ ምንም እንኳን የማቃለል አቅም ባይኖቸውም አንተን ከነሸክምህና ከነሚስጥርህ የመሸከም አቅም ሊኖራቸው ያስፈልጋል፡፡

እነዚህን ሁለት መመዘኛዎች ያለመጠቀም ምርጫ ከተከተልክ በየስፍራው ችግርህን ከማዝረክርክ ልማድህ የሚመጣውንም ሌላ ችግር ለመቀበል ዝግጁ መሆን የግድ ነው፡፡

ትምህርቶቼን በ YouTube የመከታተል ምርጫ አላችሁ::
Subscribe፡-

https://m.youtube.com/user/naeleyob623 ክፈት / አስተያየት ይስጡ

2024-03-18 04:59:59 እናስብ!

ዛሬ የምንገለገልበትን አምፖል (መብራት) እንደፈጠረ የሚነገርለት ቶማስ ኤዲሰን (Thomas Edison) እንዲህ ብሎ ተናግሮ ነበር፡-

"አምስት በመቶ (5%) የሚሆነው ሕዝብ ብቻ ያስባል፤ አስር በመቶ (10%) የሚሆነው ሕዝብ እንደሚያስብ ያስባል፤ ሰማንያ አምስት በመቶ (85%) የሚሆነው ሕዝብ ግን ከሚያስብ ቢሞት ይሻለዋል፡፡"

አብዛኛው ችግራችን የማይፈታው ፈጣሪ በሰጠን አእምሮ ከማሰብ ይልቅ በስሜት ብቻ ምላሽ ስለምንሰጥ ይሆን?

አብዛኛው እቅዳችን ሳይጀመር የሚቀረው ወይም ተጀምሮ የሚቆመው ማሰብ በሚገባን መልኩ ስለማናስብ ይሆን?

• ስለሕይወታችን እየተጨነቅን እንቅልፍ ከምናጣ፣ ሕይወታችንን እንዴት መለወጥ እንደምንችል እናስብ፡፡

• የሰዎችን አስቸጋሪ ባህሪይ እያወጣንና እያወረድን ከምንጨናነቅ፣ ከእነሱ አስቸጋሪ ባሪይ በላይ ሆነንና ተሽለን የምንገኝበትን መንገደስ እናስብ፡፡

• ስለነገ ከምንፈራ፣ ነገን በእቅድና በዝግጅት ለመጋፈጥ እናስብ፡፡

• የኑሮ ውድነት እየናረ በመሄዱ ምክንያት ቁጭ ብሎ ከመጨነቅ፣ አላስፈላጊ ወጪዎችን ስለመቀነስና ገቢያችንን ስለመጨመር እናስብ፡፡

ስናስብ ግን . . .

1. ስናስብ ግን በእውቀትና በመረጃ እናስብ!

2. ስናስብ ግን ተግባራዊ ማድረግ የምንችላቸውን ነገሮች እናስብ!

3. ስናስብ ግን ወደ ፈጣሪ የመጸለይንም ልምምድ ሳንዘነጋ እናስብ!

https://t.me/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/ ክፈት / አስተያየት ይስጡ

2024-03-17 17:11:36 ጥያቄ፡-

ሰላም ጤና ይስጥልኝ ዶ/ር፡፡ የ3 ልጆች እናት ነኝ የመጀመሪያዋ 3 አመት ከ5 ወር፣ ሁለተኛዉ የ2 አመት ሶስተኛዉ ደግሞ የ20 ቀን ልጆች ናቸው፡፡ ሁለተኛዉን ስወልድ የመጀመሪያዋ በጣም ባህሪዋ ተቀየረ አልቃሻ ሆነች እስካሁንም አልተመለሰም ባህሪዋ፡፡ ያዉ ቅናት ነዉ በሚለዉ ይዤ ማለት ነዉ። አሁን ደግሞ ሁለተኛዉም ሰሞኑን ስወልድ የባህሪ ለዉጥ አመጣ ማልቀስ ብቻ እንደ መጀመሪያዋ ሆኖ እንዳይቀር ምን ማድረግ አለብኝ ? የምር ቅናት ነዉ ባህሪያቸዉን ሚቀይረዉ?

መልስ፡-

የልጆችሽ ባህሪይ የመለወጡን ምክንያት በትክክል አግኝተሸዋል፡፡ አዲስ ሕጻን ሲወለድ የቀደመው ሕጻን በፊት ያገኘው የነበረውን ትኩረትና አድንቆት እንደሚያጣ ስለሚያስብ፣ በእርግጥም ሊያጣ ስለሚችል ይጨናነቃል፡፡ በፊት የቤቱ ሃሳብ በሙሉ በእሱ ዙሪያ እንደነበረ ያውቅ ነበር፣ አሁን ግን ትኩረት ወደሌላ ሆኗል፡፡ ይህ ደግሞ ጤናማ ሂደት ነው፡፡ ጥንቃቄ ግን ያስፈልገዋል፡፡

ይህ ባህሪያቸው እድሜያቸው እየጨመረ ሲሄድ እየጠፋ መሄዱ አይቀርም፡፡ እስከዚያው ግን ልጆችሽ አዲስን ልጅ መወለድ ሁኔታ በምን መልኩ መያዝ እንዳለባቸው ስለያውቁበት ሁኔታውን በጥበብ መያዙ የእናንተ ድርሻ ነው. . .

1. ማስተማር፡- አዲስ ከተወለደው ልጅ ጋር በምን ልኩ ሊቀርቡ እንደሚገባቸው አብሮ በመሆን ማሳየት፡፡

2. መጠበቅ፡- ቅንአት አንዳንድ ጊዜ ስሜትን ሊያነሳሳ ስለሚችል አዲስ የተወለደውን ልጅ እንዳይጎዱት ጥንቃቄ ማድረገ፡፡

3. ማመስገን፡- አዲስ የተወለደውን ልጅ ስለሚወዱትና ስለሚጠነቀቁለት ማመስገን፡፡

4. ግልጽ መሆን፡- አዲስ ከተወለደው ልጅ የተነሳ ሁኔታዎች እንደተለወጡና ትኩረታችሁ እንደተሳበ፣ እነሱም የተወለዱ ጊዜ ሁኔታው እንደዚያ እንደነበረ በሚገባቸው ቋንቋ እውነቱ መንገር፡፡

5. ሕጻኑን እንደምክንያት አለመጠቀም፡- ቀድሞ ለእነሱ ይደረጉ የነበሩትን ነገሮች አሁን ማድረግ ያልተቻለው ሕጻኑ ስላለ እንደሆነ ከሚያሳይ ንግግርና ሁኔታ መቆጠብ፡፡

6. ፍቅርንና ትኩረትን መጨመር፡- አዲስ የተወለደው ሕጻን በሚተኛበት ጊዜም ሆነ በተገኘው አጋጣሚ ለታላላቆቹ ሙሉ ትኩረትን መስጠት፣ እንደሚወደዱ መንገርና ጊዜን ማሳለፍ፡፡

7. ማሳተፍ፡- ለሕጻኑ በሚደረገው እንክብካቤ ላይ እንዲሳተፉ በማድረግ ታላቅነታቸውን ማሳየት፡፡

https://t.me/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/ ክፈት / አስተያየት ይስጡ

2024-03-17 05:46:55 መፍራት ስትጀምሩ መኖር ታቆማላችሁ!

• ፈራችሁም አልፈራችሁም መኖራችሁ ካልቀረ፣ ገና ለገና እሞታለሁ በሚልፍ ፍርሃት ታስራችሁ ከምትኖሩ ቀና ብላችሁ ብትኖሩ ይመረጣል፡፡

• ፈራችሁም አልፈራችሁም መነገዳችሁ ካልቀረ፣ ገና ለገና እከስራለሁ በሚል በፍርሃት ታስራችሁ ከምትነግዱ በአዎንታዊነት ተነቃቅታችሁ በትነግዱ ይሻላል፡፡

• ፈራችሁም አልፈራችሁም መማራችሁ ካልቀረ፣ ገና ለገና ፈተና እወድቃለሁ በሚል ፍርሃት ታስራችሁ ከምትማሩ እችለዋለሁ በሚል እምነትና ትጋት ብትማሩ የላቀ ነው፡፡

• ፈራችሁም አልፈራችሁም አንድን ሰው ማፍቀራችሁ ካልቀረ፣ ገና ለገና ይገፉኛል በሚል ፍርሃት ታስራችሁ ከምታፈቅሩ ጤናማ በራስ መተማመን ይዛችሁ ብታፈቅሩ እጅግ ተመራጭ ነው፡፡

መፍራት ስትጀምሩ መኖር ታቆማላችሁ! ቀና ብላችሁ መኖር ስትጀምሩ ደግሞ መፍራት ታቆማላችሁ!

ቀና ብላች ኑሩ እንጂ አትፍሩ!

https://t.me/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/ ክፈት / አስተያየት ይስጡ

2024-03-16 17:52:05 ራሴን ሳየው!

ስለራሳችሁ “እንዲህ ነኝ” ብላችሁ በምታስቡትና በምትገምቱት መልኩ ሰዎችም እንደዚያ የሚያስቧችሁና የሚገምቷችሁ እንደሚመስላችሁ ታውቃላችሁ?

• አዋቂ እንደሆናችሁ የምታስቡ ከሆነ ሰዎችም አዋቂ እንደሆናችሁ የሚያስቧችሁ ስለሚመስላችሁ ብዙ እንዳወቃችሁ ለማሳየት የመታገል ሁኔታ ይንጸባረቅባችኋል፡፡

• መልከ-ጥፉ እንደሆናችሁ ካሰባችሁ ሰዎችም እንደዚያ እንደሆናችሁ የሚያስቧችሁ ስለሚመስላችሁ ያለመፈለግ ስሜት ያጠቃችኋል፡፡

• ማራኪ (attractive) ነኝ ብላችሁ ካሰባችሁ ሰዎችም እንደዚያ እንደሆናችሁ የሚያስቧችሁ ስለሚመስላችሁ በሰዎች ላይ አጉል የመፈለግና ኮራ የማለትን ሁኔታ ማሳየት ታበዛላችሁ፡፡

እያለ ይቀጥላል . . .

ራሳችሁን በሆነ መልኩ ማሰባችሁ ችግር ባይኖረውም፣ ችግሩ ያለው ያልሆናችሁትን እንደሆናችሁ ስታስቡና ስትገምቱ ነው፡፡ ምክንያቱም ሰዎች ሁሉ በዚያ መልክ እንደሚያስቧችሁና እንደሚገምቷችሁ ስለሚመስላችሁ የቅዠት ሕይወት ውስጥ ትገባላችሁ፡፡

ሁኔታውን የሚያወሳስበው ደግሞ እናንት “እንዲህ ነኝ” ብላችሁ የምታስቡትና የምትገምቱት ከትክክለኛ ማንነታችሁ ጋር ሲጣረስ፣ ሁኔታችሁ ለሌሎች በግልጽ የመነበቡ ጉዳይ ነው፡፡

ራስን ማወቅ፣ ራስን መቀበል፣ ራስን መሆን፣ ከሰዎች ጋር አለመፎካከርና ቀለል ያለ አመለካከትና የሕይወት ዘይቤ መኖር ልንወስዳቸው ከምንችላቸው የማስተካከያ እርምጃዎች ጥቂቶቹ ናቸው፡፡

https://t.me/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/ ክፈት / አስተያየት ይስጡ

2024-03-16 17:08:47 ጥያቄ፡-

ሰላም ዶክተር አንድ ነገርና ላማክርህ ነበር፡፡ 25 አመቴ ነው እና ብዙ ግዜ ወንዶች ለትዳርም ሆነ ለፍቅር ግንኙነት ሲቀርቡኝ እላፊ መስፈርት አበዛለው እናም ይሄ ነገሬ እየጎዳኝ እንደሆነ ይሰማኛል፡፡ እና እባክህ ምክርህ ያስፈልገኛል?

መልስ፡-

ፍቅረኛ በመምረት ሂደትም ሆነ በፍቅር ግንኙነት ውስጥ ልንሰራቸው ከምንችላቸው የተለመዱ ስህተቶች መካከል አንደኛው ምንም መስፈር ያለመኖርና ለመጣሁ ሁሉ የመገኘት ዝንባሌ ሲሆን፣ ሌላኛው ደግሞ ይህ አንቺ ያልሺው ልክ ያጣ መስፈርት ማብዛት ነው፡፡ እነዚህ ሁለቱም ዝንሌዎች ከፍተኛ የሆነን ቀውስ ይፈጥራሉ፡፡

ይህ ሁኔታ ከተለያዩ የስነ-ልቦና ምልከታዎች ሊመጣ ይችላል፡፡

1. በራስ ላይ ያለ አጉል ከፍ ያለ አመለካከት፡፡

በተለያየ ምክንያት በራስሽ ላይ ያለሽ ምልክታ ሰዎች እንደማይመጥኑሽና ከሁሉም የተሻልሽ እንደሆንሽ ካሰብሽ ያንን የሌለ አለም ለማሟላት የሌለ መስፈርት ልታመጪ ትችያለሽ፡፡ ይህንን ሁኔታ ለመቅረፍ በራስሽ ላይ ያለሽን አመለካከት ሚዛናዊ ማድረግ አስፈላጊ ነው፡፡

2. በራስ ላይ ያለ ዝቅተኛ አመለካከት፡፡

ራስሽን ያለመቀበልና የሆነ የሚጎድልሽ ነገር እንዳለ የማሰብ ዝንባሌ ካለብሽ፣ ሰዎችን ከቀረብሻቸው በኋላ እንዳይገፉሽ ስለመትፈሪ፣ ምክንያትና መስፈርት በማብዛት በዚያ ውስጥ ትደበቂያለሽ፡፡ ይህንንም ሁኔታ ለማስተካከል በራስሽ ላይ ያለሽን የወረደ አመለካከት ሚዛናዊ ማድረግ አስፈላጊ ነው፡፡

3. ያለፈ ልምምድ አሉታዊ ተጽእኖ፡፡

ከዚህ በፊት በነበረሽ የፍቅር ግንኙነት ወንዶች ደጋግመው ጎድተውሽ ከነበረ፣ አሁንም ይጎዱኛል ብለሽ ስለምትፈሪ፣ ያንን ፍርሃት ለመቀነስ ሁሉንም ነገር አጣርተሸና “ፍጹም” መሆኑን አረጋግጠሸ ወደ ግንኙነት የመግባትን ዝንባሌ ልታዳብሪ ትችያለሽ፡፡ ይህንን ዝንባሌ ለማሸነፍ፣ ካለፈው ቁስል ተጽእኖ ነጻ የምትሆኚበትን ምክርና የአመለካከት ለውጥ ማምጣት አስፈላጊ ነው፡፡

4. የቤተሰብ ግፊት፡፡

ቤተሰቦችሽ አንቺ ማግባት ያለብሽን አይነት ሰው አስመልክቶ ያስቀመጧቸው መስፈርቶች ካሉና ሳታውቂው ያንን ማሟላት እንዳለብሽ ካሰብሽና እነሱን የማስደሰት ግፊት ካለብሽ ይህ ሁኔታ ሊያጠቃሽ ይችላል፡፡ ይህንን ሁኔታ ለማለፍ፣ የቤተሰቦችሽን ፍላጎትና የራስሽን ምርጫ አስታርቀሽ የምትሄጂበትን ጥበብ ማዳበር የግድ ነው፡፡

ልክ ያጡ መስፈርቶችሽን አሁኑኑ ካላስተካከልሻቸው፣ ተፈልጎ የማይገኝን ሰው ስትጠብቂ እድሜሽን ልታባክኚና መጨረሻ ላይ ከተገቢው የወረደ መስፈርት ማስተናገድሽና በአመለካከቱና በሕይወት ዘይቤው ለማይመጥንሽ ሰው ወድቀሽ ራስሽን ማግኘትሽ አይቀርም፡፡

https://t.me/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/ ክፈት / አስተያየት ይስጡ

2024-03-16 17:08:44 ወንዶች ለትዳርም ሆነ ለፍቅር ግንኙነት ሲቀርቡኝ እላፊ መስፈርት አበዛለው ክፈት / አስተያየት ይስጡ

2024-03-16 10:12:25 ጥያቄ፡-

ባለቤቴ ጋ ከተጋባን 7 አመታት ሆነን፤ አንድ ልጅ አለን፡፡ ልጅ የመውለድ ሀሳብ የለውም ባጠቃላይ አይፈልግም፡፡ አብሮኝም አይተኛም ከተጋባን 5 ወይም 6 ጊዜ ቢሆን ነው አብረን የተኛነው፡፡ ሌላ ጊዜስ እርግዝና ፈርቶ ነው ልበል፡፡ እርጉዝም ሆኜ ምንም የለም፡፡

1ኛ ጥያቄ፡- እግዚአብሄርን አሳዝነዋለው ብዬ ፈራለሁ፡፡ ብፈታው እግዚአብሔር ያዝናል?

2ኛ ልጄ ብቻውን ይቀርብኛል ወንድም እህት ሳይኖረው ብዬ ፈራለሁ ደግሞስ ማግባት ሳልችል ብቀር ከአባቱ ለይቼው ብዬ ፈራለሁ፡፡ እባክህን እርዳኝ ዶክተር

መልስ፡-

ከተጋባችሁ ሰባት ዓመት ሆኗችሁ ባለቤትሽ ከአንቺ ጋር ለመተኛት ወይም ወሲብ ለመፈጸም የፈለገው ስድስት ጊዜ ብቻ መሆኑ በምንም መስፈርት ጤናማ አይደለም፡፡

መልሴ ትንሽ ሙሉ እንዲሆን አንዳንድ ተጨማሪ መረጃዎችን ማግኘት ይኖብኛል፡፡ ለምሳሌ ከጋብቻ በፊት በፍቅር ግንኙነት ያሳለፋችሁት ጊዜና በዚያን ጊዜ የነበራችሁ የግንኙነት ጥልቀት እዚህ ጋር ትልቅ ትርጉም ይሰጣል፡፡

ያም ሆነ ይህ ትንሽ መላ ምቶችን መሰንዘር እንችላለን . . .

1. አንዳንድ ወንዶች ስንፈተ-ወሲብ (Sexual Incompetence) ካለባቸው ወሲብ ለማድረግ መነሳሳት ወይም ከተነሳሱ በኋላ እንደዚያ ለማቆየት አለመቻላቸው በጣም ያሳፍራቸዋል ወይም ሞራላቸውን ይነካዋል፡፡ እንደዚህ አይነት ሰዎች ወሲብ ማድረግ እየፈለጉም ከዚያ ይሸሻሉ፡፡ ይህንን ሁኔታ ለማወቅ ከፈለግሽ ከዘህ በፊት ወሲብ በፈጸማችሁበት ጊዜ የነበረውን ሁኔታ በማጤን መለየት ትችያለሽ፡፡

ለምሳሌ በወሲብ ጊዜ አለመነሳሳት፣ ከተነሳሳ በኋላ አለመቆየት ወይም ደግሞ ይህ ሁኔታ እንዳይታወቅበትና መሳሳቱ ሳይበርድ ተጣድፎ መጨረስና የመሳሰሉት፡፡

2. አንዳንድ ወንዶች ወሲብ-ነክ ምስሎችና (Pornography) የማየት ድብቅ ሱስ ይኖርባቸውና ይህ ሲስ ከትዳር አጋራቸው ጋር ያላቸው የወሲብ ፍላጊትና ሂደት ያዛባበቸዋል፡፡ ይህንን ለማወቅ የማሕበራ ሚዲያ ልማዱን መከታተል፣ ስልኩ ወይም ኮምፒውተሩ ውስጥ በመግባት የተመለከታቸውን ገጾች ማየትና የመሳሰሉትን ሁኔታዎች መሞከር ይቻላል፡፡

3. አንዳንድ ወንዶች ካለምንም የመሳብ ሁኔታና ፍቅር (Sexual attraction) ወደ ትዳር ይገቡና ለዚያ ነገር ምንም መነሳሳቱ አይኖራቸውም፡፡ ይህንን ለመለየት፣ ከአንቺ ጋር ለማሳለፍ የመፈለጉን ሁኔታ፣ ምንም እንኳን ከአንቺ ጋር ወሲብ ባይፈጽምም ከዚያ ውጪ የሆነ አካላዊ ቅርርብ የመኖሩን ሁኔታ፣ ከመጋባታችሁ በፊት ከነበረው የተቃራኒ ጾታ ግንኙነት ጋር አሁን ያለው ንክኪ ካለ ማጤንን ይጠይቃል፡፡

እነዚህን ሃሳቦች የማጤኑ ሁኔታ እንደተጠበቀ ሆኖ፣ ለፍቺ ከመቸኮልሽ በፊት ስሜትሽን በግልጽ መናገርና ውይይትን መፍጠርን የመሰለ ነገር የለም፡፡

በነገራችን ላይ የትዳር ትርጉምንና ዓላማን አስመልክቶ ዋና ዋና ቦታዎች ካላቸው ነገሮች መካከል የወሲብ ግንኑነት ይገኝበታል፡፡ ወሲብ አንድነታችሁን ያጠናክራል፣ ፍቅራችሁንና መሳሳባችሁን ለመግለጽ ይጠቅማል፣ እርካታን ይሰጣል፣ ቤተሰብን ለመመስረት መንገድ ያመቻቻል . . . ፡፡ ወሲብ የጎደለው ትዳር ጤናማነቱ አጠራጣሪ ስለሆነና አንቺን በጣም ሊጎዳሽ ስለሚችል በነገሩ በከባዱ ማሰብሽና መረበሽሽ ትክክለኛ ስሜት ነው፡፡


https://t.me/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/ ክፈት / አስተያየት ይስጡ

2024-03-15 05:01:42 “ያለማሰብ ውሳኔ”

“እውነትን በራስህ አይኖች ማየትን ተማር፡፡ አንድ ሰው የነገረህን ነገር ብቻ እውነት አድርገህ በፍጹም አትቀበል”

በአሁን ሰዓት በአንድ አንተ በማታውቀው ቦታ ሁለት ሰዎች ተገናኝተው እጅግ በጣም ስሜታዊ በሆነ መልኩ ስለአንተ እየተነጋገሩ ነው እንበል፡፡ እነዚህ ሰዎች በሚነጋገሩበት ነገር ላይ ያለህን አመለካከት ወይም ስሜት ተናገር ብትባል ምን ትላለህ?

ምናልባት መልስህ፣ “ምንም አመለካከት ወይም ስሜት የለኝም” የሚል ይሆናል ብዬ እገምታለሁ፡፡ ምክንያቱም፣ ስለሁኔታው ምንም የምታውቀው ነገር ስለሌለህ ነው፡፡

ሰዎቹ ተገናኝተው ስለአንተ አወሩ እንጂ አንተ ጋር ምንም የደረሰ ነገር የለም፡፡ በተጨማሪም፣ ስለአንተ የሚለዋወጡት ጠንካራ ስሜትን ያዘለ ንግግር መልካም ይሁን ክፉ የምታውቀው ነገር የለህም፡፡ ስለሆነም፣ በሁኔታው ላይ ምንም አይነት አመለካከትም ሆነ ስሜት ሊኖርህ አይችልም፡፡

ከዚህ እውነታ ሁለት ነገሮችን መመልከት እንችላለን፡፡

አንደኛው፣ የምትሰማቸውንና የምታያቸውን አሉታዊ ነገሮች በቀነስክ ቁጥር ጠንካራ ስሜቶችና አመለካከቶችን ትቀንሳለህ፡፡ ስለሆነም፣ ለሕይወትህ ሕልውናና እድገት አስፈላጊ ከሆኑን ነገሮች ውጪ መስማትና ማየት የማይገቡህን ነገሮች ማጣራትና አላስፈላጊውን ማስወገድ ታላቅ ጥበብ ነው፡፡

በሁለተኛ ደረጃ ልታስብ የሚገባህ ጉዳይ፣ አንዳንድ ጊዜ ስለአንተ የሚባለውን ሁሉ ላለመስማት የማትችልበት ጊዜ እንዳለ ማስታወስ አለብህ፡፡ ስለዚህም፣ ልክ ከላይ እንደጠቀስነው ስለነገሮቹ ፈጽሞ በማትሰማበት ጊዜ የሚኖርህን አይነት ኃይልና አቅም እንዲኖርህ ከፈለግህ፣ በምትሰማውና በምታየው ነገር አንጻር የግድ ጠንካራ ስሜትና አመለካከት ልትይዝ እንማይገባህ ማሰብ ትችላለህ፡፡


ያም ሆነ ይህ የምታንሸራሽራቸው ስሜቶችና ለመግለጽ የምትፈልጋቸው አመለካከቶች በተበራከቱ ቁጥር ያንን ለማድረግ ለዋናው ዓላማህ ሊውል ከሚገባው ጉልበትና ጊዜ ላይ መቀናነስ እንደሚገባህ አትዘንጋ፡፡ በአንዳንድ ሁኔታዎች ላይ በአይኖችህ ካላየህና በማስረጃ ካላረጋጋጥክ በስተቀር መረጃን በጆሮህ ሰምተህ ብቻ ከማመን ተጠበቅ፡፡ በተጨማሪም፣ በአይኖችህ አይተህ ሙሉ ለሙሉ አረጋግጠህ ያላመንክበትን ነገር በአንደበትህ በመናገር ከማስተጋባትም ራስህን ጠብቅ፡፡

በተጨማሪም፣ በውስጥ በአይኖችህ አይተህ ሙሉ ለሙሉ ያላመንክበትን ነገር በአንደበትህ በመናገር ከማስተጋባትም ራስህን ጠብቅ፡፡

“የጥበብ መንገድ” ከተሰኘው የዶ/ር ኢዮብ መጽሐፍ የተቀነጨበ፡፡

https://t.me/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/ ክፈት / አስተያየት ይስጡ

2024-03-15 04:59:01 “ያለማሰብ ውሳኔ” ክፈት / አስተያየት ይስጡ