2022-05-12 08:53:02
အားလုံးရဲ့ အားကိုးစွာ အကူအညီတောင်းခံကြမှုကို ကျေးဇူးတင်စွာ လက်ခံရရှိပါတယ်ရှင်။ ကျွန်မအနေနဲ့ အခုအချိန်မှာ ဘီလျံနာ မီလျံနာကြီး ဖြစ်မနေတာကိုပဲ အားမရဖြစ်ရပါတယ်။
ဝန်နဲ့အား မမျှတဲ့အခါ ခါးပါ ကျိုးချင်လာပါပြီ။ အကူအညီတောင်းခံမှုတွေကို မတတ်သာစွာ အကြောင်းမပြန်နိုင်တော့တိုင်း ကိုယ့်ကိုယ်ကိုယ် အသုံးမကျဘူးလို့ တရစ်ချင်း ခံစားမိလာတယ်။ စိတ်တွေပါ ကျလာမိတယ်။
ကျွန်မအနေနဲ့ ဒေါ်လာသန်းနဲ့ချီ ရှာဖွေပေးနိုင်တာတွေဟာ ကျွန်မစီမံခန့်ခွဲမျှဝေလို့ရတဲ့ ငွေတွေ မဟုတ်ပါဘူး။ ဥပမာပြောရရင် NUG Bond ကို အေးဂျင့်အနေနဲ့ ဒေါ်လာသန်းချီရောင်းချပေးနိုင်ခဲ့ပါတယ်။ ဒါပေမယ့် NUG Bond ရောင်းရငွေဟာ NUG ရဲ့ ဘဏ္ဍာရေးဝန်ကြီးဌာနကို တစ်ပြားတစ်ချပ်မကျန် ပြန်လည်ပေးပို့ရပါတယ်။ ကျွန်မ စီမံမျှဝေခွင့် မရှိပါ။
Project Dragonfly ဒေါ်လာနှစ်သန်းကျော် ရှာဖွေနိုင်ခဲ့ပါတယ်။ ဒါပေမယ့် ရရှိငွေအားလုံးကို ငှက်ကင်အတွက် သက်ဆိုင်ရာဌာနကို ပေးပို့ရပါတယ်။ ကျွန်မစီမံခန့်ခွဲမျှဝေခွင့် မရှိပါ။ အခြားသော ကျွန်မပါဝင် Fund Raise လုပ်နေတဲ့ Campaign တွေဟာလည်း ကျွန်မက တော်လှန်ရေးအတွက် Promoter အနေနဲ့ ပါဝင်ရုံမှတပါး ကျွန်မစီမံခန့်ခွဲခွင့် မရှိပါ။
ကျွန်မစီမံခန့်ခွဲမျှဝေနေတဲ့ ငွေဆိုတာက ကျွန်မအကောင့်ကနေ အလှူခံပြီး ရရှိတဲ့ ငွေပမာဏပဲ ရှိပါတယ်။ အဲ့ဒီ့က ရရှိငွေနဲ့ ကျွန်မ လစဉ်ထောက်ကန်နေရတဲ့ အဖွဲ့တွေဆီ ပေးပို့ရသလို အသစ်ထပ်မံအကူအညီတောင်းခံလာသူထဲကလည်း စိစစ်ပြီး မျှဝေရပါတယ်။
တော်လှန်ရေးကာလကြာမြင့်လာတဲ့အမျှ လိုအပ်ချက်တွေလည်း များပြားလာသလို ထောက်ပို့ငွေရှာဖွေနိုင်စွမ်းကလည်း ယခင်ထက်ပိုပါးလျလာတာ အားလုံးအသိပါ။ ကျွန်မလည်း အပြောအဆို အတိုက်အခိုက်တွေကြားက အားမလျှော့ဘဲ ရှာဖွေထောက်ပို့နေပါတယ်။
အကူအညီတောင်းခံလာသမျှ အဖွဲ့တိုင်းကို ကူညီပါမယ်လို့ ကတိကဝတ် မပေးထားပါဘူး။ အဖွဲ့တိုင်းကိုလည်း မကူညီနိုင်ကြောင်း ဝန်ခံထားပါတယ်။ ဒါပေမယ့် ကျွန်မထောက်ပို့နေတဲ့ အဖွဲ့တွေကို မျက်မြင်မြင်နေရပါလျက်နဲ့ ငါတို့ကိုတော့ မပေးရကောင်းလားဆိုပြီး အမြင်လွဲတာမျိုးတွေလည်း ခံရပါတယ်။
အချို့ကတော့ အခက်အခဲတွေကို နားလည်ပေးကြပေမယ့် အချို့ကတော့ ခင်ဗျားက ဒေါ်လာသန်းချီရှာနိုင်နေလျက်နဲ့ မကူညီရကောင်းလားဆိုပြီး ဆဲဆိုသွားတာတွေလည်း ကြုံရပါတယ်။ ဒါ့ကြောင့် ကျွန်မအနေနဲ့ ဒေါ်လာသန်းချီဟာ ကျွန်မကိုင်တွယ်စီမံခွင့်မရှိကြောင်း တသီးတသန့်ပြောပြဖို့ လိုအပ်တယ်လို့ ယူဆလို့ပါ။
အချို့စိတ်ဓါတ်ဆိုးဝါးသူတွေဆိုရင် သူတို့ကို မထောက်ပို့မိတာနဲ့ ကျွန်မကို ပိုစ့်တွေတင် ဆဲဆို၊ မဟုတ်မမှန်တွေ ဆက်တိုက်သိက္ခာချ၊ အညှိုးတကြီးနဲ့ ခြေထိုးခံနေတာတွေလည်း မြင်ရပါတယ်။ ကျွန်မအနေနဲ့ သူတို့အဖွဲ့ကို မထောက်ပို့နိုင်လိုက်ပေမယ့် ကျွန်မထောက်ပို့မှုကို ရနေတဲ့အဖွဲ့တွေ မျက်မြင်ရှိနေကြလျက်နဲ့ ဘာလို့ ဒါမျိုးတွေ လုပ်နိုင်ကြလဲ မစဉ်းစားတတ်အောင်ပါပဲ။
တစ်ဖွဲ့စီက လာအကူအညီတောင်းကြတယ်ဆိုပေမယ့် အကူအညီတောင်းခံခံရသူ ကျွန်မအနေနဲ့က တစ်ယောက်တည်းပါ။ တကယ်ကို မနိုင်နင်းနိုင်တာပါ။ အကူအညီတောင်းခံသံတွေကြားမှာ ကူကယ်ရာမဲ့ပါပဲ။
ကျွန်မလည်း ရှိသမျှမာန အကုန်ပစ်ချပြီး တစ်ဖက်က သိက္ခာချ တိုက်ခိုက်မှုမှန်သမျှ အဖက်မလုပ်ဘဲ ကိုယ်စွမ်းဥာဏ်စွမ်းရှိသမျှ အကုန်ရှာဖွေ ထောက်ပို့နေပါတယ်။ အားလုံးကို မထောက်ပို့နိုင်တဲ့အတွက်လည်း ဝမ်းနည်းရပါတယ်။ ဒီလောက်လေးပဲ စွမ်းနိုင်တဲ့အတွက်လည်း တောင်းပန်ပါတယ်။
ကျွန်မရဲ့ စွမ်းဆောင်နိုင်မှုဟာ အထောက်အပံ့တစုံတရာလေး ဖြစ်ခဲ့မယ်ဆိုရင် ကျွန်မရဲ့မစွမ်းဆောင်နိုင်မှုတွေကိုလည်း နားလည်ပေးကြဖို့ပါ။
ကျွန်မ ဒီ့ထက် ပိုကြိုးစားကြည့်ဖို့ အားယူချိန်လေး ပေးကြပါ။
22.0K views05:53
ပ
