Injibara University

ለአማራ ፖሊስ ኮሌጅ መምህራን ከፍተኛ ዲፕሎማ (HDP) ስልጠና መስጠት ተጀመረ፡፡
እንጅባራ ዩኒቨርሲቲ ለአማራ ፖሊስ ኮሌጅ 40 መምህራን የከፍተኛ ዲፕሎማ ፕሮግራም (HDP) ስልጠና በዛሬው እለት መስጠት ጀምሯል፡፡
በስልጠናው የእንጅባራ ዩኒቨርሲቲ አካዳሚክ ጉዳዮች ም/ፕሬዝዳንት አዕምሮ ታደሰ(ዶ/ር) የእንኳን ደህና መጣችሁ መልዕክት ካስተላለፉ በኋላ ስለ ዩኒቨርሲቲው አጭር ገለጻ ያደረጉ አድርገዋል፡፡ እንጅባራ ዩኒቨርሲቲ ከተለያዩ የሀገር ውስጥ እና የውጭ አጋር አካላት ጋር በጋራ ለመስራት የተለያዩ የመግባቢያ ስምምነቶችን እንደተፈራረመ ጠቅሰው ከአማራ ፖሊስ ኮሌጅ ጋር በተፈራረመው ስምምነት መሰረትም ይህን የከፍተኛ ዲፕሎማ (HDP) ስልጠና ለኮሌጁ መምህራን እንዲሰጥ ማድረጉን ተናግረው ሰልጣኞች ስልጠናውን በትኩረት እንዲከታተሉ አሳስበዋል፡፡
ስልጠናውን ያስጀመሩት የአማራ ክልል ፖሊስ ኮሚሽን ም/ኮሚሽነር እና የአማራ ፖሊስ ኮሌጅ ዋና ዳይሬክተር ም/ኮሚሽነር አንማው አለሜ እንደተናገሩት ኮሌጁ ባለፈው ዓመት ከእንጅባራ ዩኒቨርሲቲ ጋር የመግባቢያ ስምምነት መፈራረሙን ገልጸው ኮሌጁ በከፍተኛ ዕድገት እንዲሸጋገር ዩኒቨርሲቲው የተለያዩ ድጋፎችን ለኮሌጁ ማበርከቱን ተናግረዋል፡፡ ስልጠናው ለኮሌጁ የተሻለ የሰው ኃይል እንዲኖረው የሚያደርግ በመሆኑ ሰልጣኝ መምህራን ስልጠናውን በመውሰድ ወደ ተግባር መቀየር ይገባቸዋል ብለዋል፡፡
በዩኒቨርሲቲው ለተከታታይ 16 ቀናት የሚቆየው ስልጠና ለ40 መምህራን የሚሰጥ ሲሆን አሰልጣኞችም ስንታየሁ በላይ(ዶ/ር) ስርዓተ ትምህርት መምህር፣ አበበ ፈንታሁን (ረ/ፕሮፌሰር) ታሪክ እናቅርስ አስተዳደር መምህር፣ ታደለ ሽፈራው(ረ/ፕሮፌሰር) የፊዚክስ መምህር እና አስናቀ ተሻገር(ረ/ፕሮፌሰር) እንግሊዝኛ መምህር ናቸው፡፡
ጥቅምት 18/2015 ዓ.ም ፤ እንጅባራ ዩኒቨርሲቲ

ለሦስት ቀናት ሲሰጥ የነበረው የመጀመሪያው ዙር ፈተና በሰላም ተጠናቀቀ፡፡
---------
በእንጅባራ ዩኒቨርሲቲ ለሦስት ተከታታይ ቀናት ሲሰጥ የነበረው የማኅበራዊ ዘርፍ የ12ኛ ክፍል ማጠናቀቂ ፈተና ሰላማዊ በሆነ መንገድ ዛሬ መጠናቀቁን የዩኒቨርሲቲው ፕሬዝደንት ጋርዳቸው ወርቁ (ዶ/ር) ገልፀዋል፡፡ ፈተናውን የወሰዱት ከ9ሺ በላይ ተማሪዎች ሲሆኑ ቀድሞ በተደረገላቸው ገለፃ እና አቅጣጫ ስድስቱንም ፈተና በሰላም አጠናቀዋል፡፡
ዶ/ር ጋርዳቸው አያይዘው እንደገለጹት የፈተና ሂደቱ ስኬታማ እንዲሆን የዩኒቨርሲቲው ከፍተኛ አመራሮች፣ የፈተና ግብረ ኃይል ኮሚቴዎች፣ ከትምህርት ሚኒስቴር የተላኩ ፈተና አስፈጻሚዎች እና የፀጥታ ኃይሎች በጋራ የመሥራት ውጤት መሆኑን ተናግረዋል፡፡
ፈተናቸውን ያጠናቀቁ ተማሪዎች ጥቅምት 2 እና 3/2015 ዓ.ም መኪና ተዘጋጅቶላቸው ወደ ቤተሰቦቻቸው እየተሸኙ ሲሆን ጥቅምት 4/2015 ዓ.ም የሚገቡትን የተፈጥሮ ሳይንስ ተማሪዎች ተቀብሎ ለማስፈተን ዩኒቨርሲቲው ሙሉ ዝግጅት ማጠናቀቁንም አክለው ገልጸዋል፡፡
እንጅባራ ዩኒቨርሲቲ ለሁሉም ለተፈታኝ ተማሪዎች በሙሉ መልካም ውጤት ይመኛል!
መስከረም 2/2015 ዓ.ም፤ እንጅባራ ዩኒቨርሲቲ