2022-10-13 20:21:19
መቶ በመቶ እርግጠኛ!
አንድ እጅግ በጣም የተራበ ተኩላ አንድን ከጓደኞቿና ከእረኛዋ የተለየች በግ ከሩቅ ተመለከተ፡፡ መልካም ራት እንዳገኘ ቢያስብም ከሩቁ አይታው የመደንበር ምልክት ስላሳየች ቢሮጥ ሊደርስባት እንደማይችል ስላሰበ እያግባባ ርቀቱን ለማሳጠርና በቀላሉ ለመያዝ በሚመቸውና ማምለጥ በማትችልበት ክልል ውስጥ ለመቅረብ አሰበ፡፡
ትንሽ እርምጃ ጠጋ አለና ድምጹን ከፍ አድርጎ፣ “የዛሬ ሁለት አመት በጣም ተዳፍረሽኝ ነበር” አላት፡፡ በጊቱ ለማምለጥ ሲቃጣት “የዛሬ ሁለት ዓመት” በማለት ስለዋሸ አበሳጭቷት፣ “ምንድን ነው የምታወራው፣ የዛሬ ሁለት አመት እኮ እኔ አልተወለድኩም ነበር” አለችው፡፡
ተኩላው እንደገና ትንሽ እርምጃዎችን ከጨመረ በኋላ፣ “ባለፈው አመት የመጫወቻ ሜዳየን ሳር በልተሽ የጨረስሽው አንቺ መሆኑን ሰምቻለሁ” አላት”፡፡ በጊቱ ጊዜ ሳታባክን ማምለጥ እንዳለባት ቢገባትም አሁንም ለዚህ ቅድ ውሸቱ ተገቢውን ምላሽ መስጠት እንዳለባት ስላሰበች፣ “የዛሬ አመት ሳር የሚባል ነገር አልቀመስኩም፣ እሺ!!!” አለችው፡፡
ተኩላው ዓላማው የተሳካለት መሆኑ ስለገባው፣ አሁንም ትንሽ ጠጋ ብሎ፣ “ከስድስት ወር በፊት እኛ ተኩላዎች ብቻ ከምንጠጣበት ምንጭ ተደብቀሽ ስትጠጪ ቆሻሻሽን አራግፈሽ አደፍርሰሽብናል” አላት፡፡ በጊቱም፣ “አሁንስ አበዛው፣ አንድ ጊዜ ጠጋ ብዬ በጩኸት ልክ ልኩን እነግረውና እሮጣለሁ” ብላ በማሰብና የተወሰኑ እርምጃዎችን ጠጋ በማለት፣ “አሁንስ አበዛኸው! የዛሬ ስድስት ወር ገና የእናቴን ጡት በመጥባት ላይ ስለነበርኩ ውኃ መጠጣት አልጀመርኩም” ብላ ጮኸች፡፡ በዚህ ጊዜ በጊቱ ማምለጥ የማትችልበት ቅርበት ውስጥ ራሷን ስላቀረበች ተኩላው ያቀደውን እቅድ ፈጸመ፡፡
አብዛኛው የሕይወት ክስተቶች በመደራደር፣ በመከራረከርና እስከመጨረሻው ሃሳብን በመለዋወጥ ሊያዙ የሚገባቸው የመሆኑ እውነታ እንደተጠበቀ ሆኖ፣ አንዳንድ ጊዜ ግን ጊዜ ሳናባክን ካልተለየን ራሳችንን ለወጥመድ አሳልፈን የምንሰጠጥባቸው ሁታዎች እንዳሉ ማስታወስ ተገቢ ነው፡፡
• መቶ በመቶ ማድረግ እንዳለብህና ጊዜውም ትክክለኛ እንደሆነ ያመንክበት ነገር ካለ አታዘግየው፡፡
• መቶ በመቶ መወሰን እንዳለብህና ጊዜውም ትክክለኛ እንደሆነ ያመንክበት ነገር ካለ አንድ ቀን አታሳድረው፡፡
• መቶ በመቶ መለየት የሚገባህ ሰው ወይም ሁኔታ እንዳለ ካመንክና ጊዜውም ትክክልኛ እንደሆነ ካመንክ አንድ ቀን አታሳድረው፡፡
• መቶ በመቶ እንደማያዛልቅህ እርግጠኛ በሆንክበት ስፍራና ሁኔታ ውስጥ ምን ታደርጋለህ?
• እንደማያስቀጥልህና እንደማያዛልቅህ በሚገባ እርግጠኛ ከሆንክበት ሰው ጋር ለምን ትደራደራለህ?
መወሰን፣ መውጣት፣ ማቆም ፣ መለየት . . . እንደሚገባህ መቶ በመቶ እርግጠኛ ሆነህ በመደራደር ያከረምከው ጉዳይ፣ ከትንሽ ጊዜ በኋላ ሳታስበው መውጣት የማትችልበትን ሁኔታ ፈጥሮ እንደሚቆይህ አትዘንጋ፡፡
Dr-Eyob-Mamo
@gasha_tube
2.2K views𝖊𝖙𝖍𝖎𝖔 𝖆𝖑𝖎𝖇𝖆𝖇𝖆 Тєαм, 17:21
ጋ
