Commercial Bank of Ethiopia - Official

ከአጭበርባሪዎች ይጠንቀቁ!
************
አጭበርባሪዎች የተለያዩ ዘዴዎችን በመጠቀም የስርቆት ተግባር ይፈፅማሉ፡፡ ከቅርብ ጊዜ ወዲህ በተለይ የማህበራዊ ትስስር ገፆችን በመጠቀም እና አሳሳች ማስታወቂያዎችን በማሰራጨት የማጭበርበር ሙከራዎች በስፋት እየታዩ ነው፡፡ ‘የኦንላይን ሥራ በመሥራት ገንዘብ ታገኛላችሁ’ በማለት የሚያጭበረብሩት ከነዚህ ውስጥ ይገኙበታል፡፡

ከሥር ባያያዝናቸው ምስሎች እንደሚታየው ‘Chelezo Heights’ በሚል ስያሜ በተከፈተ የፌስቡክ ገፅ እንዲሁም ‘ETHIOPIAN ONLINE WORKS’ በሚል ስያሜ በተከፈተ የቴሌግራም ገፅ አጭበርባሪዎች በኦንላይን ሥራ ገንዘብ አግኙ የሚል አሳሳች መልእክት እያስተላለፉ ናቸው፡፡

እነዚህ ገፆች ETHIOPIA ONLINE JOBS በሚል በኢትዮጵያ ንግድ ባንክ ከተከፈተ ሂሳብ ለተጠቃሚዎች ገንዘብ የተላለፈ በማስመሰል የተሠሩ ሀሰተኛ የሂሳብ እንቅስቃሴ መግለጫዎችን በማጋራት ላይ ናቸው፡፡ ነገር ግን ETHIOPIA ONLINE JOBS በሚል በባንካችን የተከፈተ ሂሳብም የለም የሂሳብ እንቅስቃሴ መግለጫዎቹም ሀሰተኞች ናቸው፡፡
በመሆኑም ውድ ደንበኞቻችን በመሰል አሳሳች መልእክቶች እንዳትጭበረበሩ እያሳሰብን ማንኛውም የባንካችን ደንበኛ መሰል ሁኔታ ሲገጥመው ሳያረጋግጥ ምንም አይነት እርምጃ ከመውሰድ በመቆጠብ ስለሁኔታው ማጣራት እንዳለበት እንጠቁማለን። ለበለጠ መረጃ በአቅራቢያ ወደሚገኝ ቅርንጫፍ በመሄድ አሊያም በ951 የባንኩ የደንበኞች ጥሪ ማዕከል በመደወል መረጃ መጠየቅ ይቻላል።

በሕዝብ ተወካዮች ምክር ቤት የመንግስት ልማት ድርጅቶች ጉዳዮች ቋሚ ኮሚቴ ለኢትዮጵያ ንግድ ባንክ አስፈላጊውን ድጋፍ እንደሚያደርግ ገለፀ፡፡
******************
ይህ የተገለፀው መጋቢት 16፣ 2016 በኢትዮጵያ ንግድ ባንክ ዋና መሥሪያ ለተገኘው በሕዝብ ተወካዮች ምክር ቤት የመንግስት ልማት ድርጅቶች ጉዳዮች ቋሚ ኮሚቴ የባንኩ የ2023/24 በጀት ዓመት የግማሽ ዓመት የሥራ አፈጻጸም ሪፖርት በቀረበበት ወቅት ነው፡፡

የቋሚ ኮሚቴው ሰብሳቢ የተከበሩ ፕሮፌሰር መሐመድ አብዱ እንዳሉት የኢትዮጵያ ንግድ ባንክ ለሀገር የልማት እንቅስቃሴ ከፍተኛ እገዛ እያደረገ ያለ ባንክ ነው፡፡

ባንኩ በሀገር ኢኮኖሚ ግንባታ ውስጥ የሚጠብቀበትን እየተወጣ እንዲቀጥል እና በዓለም ዓቀፍ ደረጃ ተወዳዳሪ ለመሆን ያስቀመጠውን ግብ ለማሳካት ይረዳው ዘንድ ደግሞ የባለድርሻ አካላት የፖሊሲን ጨምሮ ተገቢውን ድጋፍ ሊያደርጉለት እንደሚገባ ዋና ሰብሳቢው አሳስበው፣ ቋሚ ኮሚቴው አስፈላጊውን ሁሉ እንደሚያደርግ ቃል ገብተዋል፡፡

የተከበሩ ፕሮፌሰር መሐመድ ባንኩ በወለድ አልባ የባንክ አገልግሎት ዘርፍ የሠራው ሥራ የሚያስመሰግነው እንደሆነም ነው የገለፁት፡፡ ከዚህ በተጨማሪም ባንኩ ማህበራዊ ኃላፊነቱን የሚወጣበትንም መንገድ ዋና ሰብሳቢው አድንቀዋል፡፡

የቋሚ ኮሚቴው አባላት የባንኩን የሥራ አፈጻጸም ሪፖርት መነሻ በማድረግ ላነሷቸው ጥያቄዎች የባንኩ ፕሬዚዳንት አቶ አቤ ሳኖን ጨምሮ የሚመለከታቸው የባንኩ ምክትል ፕሬዚዳንቶች ሰፊ ማብራሪያና ገለጻ መስጠታቸው እና የቋሚ ኮሚቴው አባላት ሳምንቱን ሙሉ ለ24 ሰዓት የሚሠራውን የኢትዮጵያ ንግድ ባንክ የመረጃ ደህንነት ሥርዓት ተዘዋውረው መጎብኘታቸው ይታወሳል፡፡