2023-03-08 00:21:58
ከስጋዊ ወደ ተፈጥሯዊ
ምንጭ ፦ የህይወት ኬሚስትሪ (ሳድጉሩ)
ትርጉም ፦ ሀኒም ኤልያስ
ባዮሎጂን ቅዱስም ሆነ ቆሻሻ ማድረግ የለብህም፣ እርሱ የሕይወት መሳሪያ ነው፡፡
ህልውና በማይገለጥ እና በተገለጠው መካከል ያለ ጭፈራ ነው። በሚገለጥበት ቅጽበት ሁለትነት፣ በማይገለጥበት ጊዜ ደግሞ አንድነት አለ። ምንም እንኳን አንድነት የፍጥረት መሠረታዊ ነገር ቢሆንም፣ ሁለትነት ገጽታን፣ ዲዛይንና ቀለምን ያመጣል፡፡ ዛሬ እንደ ሕይወት የምትመለከታቸው የተለያዩ መገለጫዎች በመሠረታዊነት በሁለትነት ውስጥ የተተከሉ ናቸው። ሁለት ስለሆኑ ብዙ መገለጫዎች አሏቸው- ብርሃንና ጨለማ፣ ወንድና ሴት፣ ሕይወትና ሞት... ወዘተ። አንድ ብቻ ቢሆን ኖሮ፣ ህልውና ብቻ ይሆን ነበር። ሁለት ከሆኑ በኋላ የሕይወት ጨዋታ ይጀምራል።
አንድ ጊዜ ሁለትነት ሲጀምር፣ ወሲብ ይጀምራል። ወሲብ ብለን የምንጠራው አንድ ለመሆን የሚጥሩትን የዚህን ሁለትነት ሁለት ክፍሎች ነው:: በእነዚህ የሁለትዮሽ ግንኙነት ሂደት ውስጥ፣ ተፈጥሮ ልታሟላቸው የምትፈልጋቸው እንደ መራባትና የዝርያ መቀጠል ያሉ ተግባራትም አሉ፡፡
የአካል አንድነትን በተመለከተ ምንም ብታደርግ ሥጋዊ አካላት ሁልጊዜ ሁለት ሆነው እንደሚቀሩ ማስታወስ ያስፈልጋል፡፡ ሁለት ሰዎች በአንድነት ስሜት የሚመጡት ለጥቂት ጊዜ ነው፤ ከዚያ ይለያያሉ፡፡ ፍቺ ካልለያቸው፣ ሞት ይለያቸዋል፤ ይህ ደግሞ መከሰቱ
አይቀርም፡፡
ወሲብ ብለን የምንጠቅሰው ጉዳይ አጠቃላይ ሂደት ሁለት ተቃራኒዎች አንድ ለመሆን የሚሞክሩበት ነው᎓᎓ የአንተ ግለሰባዊ ማንነት ማለት በአንተ አእምሯዊ ማዕቀፍ ውስጥ በአንተ መውደድና አለመውደድ፣ ማፍቀርና መጥላት ወዘተ መልክ ያስቀመጥከው የውሸት ድንበር ብቻ ሳይሆን፣ በራስህ አካላዊ ሰውነት ድንበር ውስጥም መታሰር ማለት ነው፡፡ ሆን ብለህ ላታውቀው ትችላለህ፤ ነገር ግን በአንተ ውስጥ ያለው ሕይወት ነፃ ለመውጣትና ከእነዚህ ድንበሮች ባሻገር ለመሄድ የሚጓጓ ነው፡፡ የአእምሮ ድንበሮችህን ለማቋረጥ ስትፈልግ ግን፣ ኮስተር ያለ ውይይት ለማድረግ ወይም መጽሐፍ ለማንበብ፣ አልኮል ለመጠጣት፣ አደንዛዥ እጽ ለመውሰድ ወይም አንድ አስፈሪ ነገር ለማድረግ ልትናፍቅ ትችላለህ፡፡ አካላዊ ድንበሮችን ለማቋረጥ ደግሞ ራስህን መበሳት ወይም መነቀስ፣ ፀጉርህን ማቅለም ወይም የድሮውን የወሲብ መንገድ መጠቀም ትፈልግ ይሆናል።
የወሲብ ፍላጎት በጣም ጥሩ ቢሆንም ሰዎችን አንድ የማድረግ ዘዴው ግን ተስፋ የለሽ ነው፡፡ ወሲብ ደስታ ስላለበት፣ ሰዎች እርስ በርስ እንዲሳሳቡ ያነሳሳል እንጂ በፍጹም አንድነትን አያመጣም:: ለምሳሌ “ተመሳሳይ ነገሮችን እንወዳለን፣ አንድ አይነት አይስክሬም እንወዳለን፣ ሁለታችንም ቆንጆዎች ነን፣ ሁለታችንም ፊልም እንወዳለንና ሁለታችንም አንድ አይነት መጽሐፍ እንወዳለን” ወዘተ የሚሉ አይነት የጋራ አቋም ለማግኘት ትሞክራለህ፡፡ እንደዚህ ስታደርግ እርስ በርስ ለመሳሳብና ለመገናኘት የምትሞክረው በሌሎች የስሜታዊነትና የማሰብ ዘርፎች ስለሚሆን መቼም ቢሆን አንድነትን አያመጣም፡፡ አንድ መሆን እንደማትችል እስካልተረዳህ ድረስ ደግሞ መደሰትን አትማርም፡፡
በሰው ዘር ውስጥ 'ወንድ' እና 'ሴት' ብለን የምንጠራቸው እነዚህ ሁለት ኃይሎች ሁልጊዜ አንድ ላይ ለመሆን ከመናፈቅ በስተቀር ተቃራኒዎች ናቸው። እነርሱ በአንድ ጊዜ ወዳጆችም፣ ጠላቶችም ናቸው። የሚያመሳስሏቸውን ነገሮች የሚፈልጉ ከሆነ፣ ያላቸው የጋራ ነገር በጣም ትንሽ ይመስላል፤ የተቃራኒዎች መሳሳብ ግን ሁልጊዜም አለ፡፡ ወሲብ ተፈጥሯዊና በሰውነት ውስጥ ያለ ነው፡፡ ወሲባዊነት ግን አንተ የፈጠርከውና ስነ ልቦናዊ ነው። ወሲብ በአካል ውስጥ ከሆነ፣ መልካም ነው፤ ቆንጆ ነው፡፡ ወደ አእምሮህ በገባ ቅጽበት ጠማማ ይሆናል፤ ምክንያቱም ከአእምሮህ ጋር ምንም ሥራ የለውም። ወሲብ የአንተ ትንሽ ገፅታ ቢሆንም፣ ግን ዛሬ በጣም ትልቅ ሆኗል። ለብዙዎች እንዲያውም- እሱ ራሱ ሕይወት ሆኗል፡፡
ዘመናዊ ማህበረሰቦችን ብትመለከት፣ ምናልባት ዘጠና በመቶው የሰው ጉልበት የሚውለው ወሲብን ለመከታተል ወይም ለማስወገድ ነው፡፡ ወሲብ ተፈጥሮ ለመራባት የፈጠረችው ዘዴ ነው᎓᎓ እኛ ግን ይህንን አካላዊ ሂደት ብዙ ያልሆነውን ነገር ልናደርገው እየሞከርን ነው፡፡ ይህ የተቃራኒዎች መሳሳብ ባይኖር ኖሮ ዝርያ ይጠፋ ነበር። አሁን ግን ወንድና ሴት ሁለት የተለያዩ ዝርያዎች እንደሆኑ አድርገን ለይተናል። በፕላኔታችን ላይ እንደ ሰው ከወሲብ ጋር በተገናኘ እንደዚህ አይነት ችግር ያለበት ሌላ ፍጡር የለም:: እንስሳትን በተመለከተ፣ በሆነ ጊዜ ፍላጎቱ በአካላቸው ውስጥ ይከሰታል፤ አለበለዚያ ከእርሱ ነፃ ናቸው፡፡ ሰዎችን በተመለከተ ግን ሁልጊዜ በአእምሮአቸው ላይ ነው። ይህ የሆነበት አንዱ ምክንያት ቀደም ባሉት ጊዜያት ብዙ እምነቶች ቀለል ያለ አካላዊ ሂደት የሆነውን ይህንን ፍላጎት እጅግ አስቀያሚ እንደሆነ እስኪቆጠር ድረስ መካዳቸው ነው፡፡ የሰውን ልጅ ባዮሎጂ እንኳን መቀበል ስላልቻልን ከሥነ ሕይወታዊ ሂደት ውሱንነት ባሻገር ከመመልከት ይልቅ ለመካድ ሞክረናል።
ኃይማኖት ማለት ነፃነት ማለት ነው፣ አይደል? ታዲያ ባዮሎጂን እንኳን መቀበል ካልቻልን እንዴት ነፃነት ሊኖር ይችላል? በባዮሎጂ ላይ ችግር ባይኖረን ኖሮ፣ ሁሉም ሰው ያለው ዋጋ ምን ያህል እንደሆነ ያውቅ ነበር:: አንድ ሰው ወንድ ሆነ ሴት ችግሩ ምንድን ነው? የሴቶች አጠቃላይ ጭቆና የሚጀምረው በወንድና በሴት መካከል ያለውን አካላዊ ልዩነት መቀበል በማትችልበት ጊዜ ነው፡፡
ባዮሎጂ አንተ የተፈጠርክበት የሕይወት መሳሪያ በመሆኑ እርሱን ቅዱስም ሆነ ቆሻሻ ማድረግ የለብህም፡፡ ባዮሎጂን ሳታጋጊጠው ወይም አስቀያሚ ሳታደርገው እንዴት እንደምትኖር ካወቅክ፣ የራሱ የሆነ ውበት ያለው ነው፡፡
አሁን ራስህን ሰው' ብለህ ለይተህ የምታስብ ከሆነ፣ ሃሳብህና ስሜትህ ሁሉ ከዚያ ማንነት የሚመነጭ ይሆናል። ወይም ራስህን በዜግነትህ ወይም በዘርህ ከለየህ፣ ሀሳብህና ስሜትህ ሁሉ ከእነዚያ ማንነቶች የሚፈስስ ይሆናል፡፡ ምንም አይነት ሀሳቦችና ስሜቶች ቢኖሩህ፣ እነርሱ የሆነ ጭፍን ጥላቻን የሚወክሉ ናቸው፡፡ አእምሮህ ራሱ የተወሰነ የጭፍን ጥላቻ አይነት ነው:: ራስህን በምንም ነገር የለየህ ሁን፣ ሞት በመጣ ጊዜ ሁሉም ይጠፋል፡፡ አእምሮ ካለህ አሁን ትማራለህ፤ አሁን ካልተማርክ ሞት ያስተምርሃል፤ ስለዚያ አትጠራጠር፡፡ አንድ ሰው ራሱን እንደ ወንድ ወይም እንደ ሴት ካልተመለከተ፣ የማሰብ ችሎታውን በማናቸውም መለያዎች ማለትም በአካል፣ በቤተሰብ፣ በችሎታ፣ በማህበረሰብ፣ በጎሳ፣ በእምነት፣ በዘር፣ በብሔር፣ ዝርያና ሌሎች በሚሊዮን የሚቆጠሩ ማንነቶች ካልለየ፣ ወደ መጨረሻ ተፈጥሮው ይሄዳል።
@Zephilosophy
@Zephilosophy
1.2K views21:21
ፍ
