ቦሌ ኮሚዩኒኬሽን/Bole Communication

“ሰላምን ለማረጋገጥ የምክር ቤት አባላት
የሕዝብ ተወካይነት ሚናቸውን ሊወጡ ይገባል”

የቦሌ ክፍለ ከተማ ምክር ቤት አባላት በወቅታዊ የሰላም ጉዳዮች ዙሪያ ውይይት አደረጉ፡፡

በውይይቱ ላይ የምክር ቤቱ አፈ ጉባኤ አቶ መሥፍን ኃይሌ ባደረጉት ንግግር ኅብረ ብሔራዊነት የኢትዮጵያዊያን አንዱ መገለጫ መሆኑን አውስተው፣ “የአንዱ መኖር ለሌላው ዋስትና እንጂ ሥጋት አይደለም” ብለዋል፡፡ አንዳንድ አካላት የሕዝቡን በሰላምና በአብሮነት የመኖር እሴቶች ለመናድ እያደረጉ ያሉት አፍራሽ እንቅስቃሴ ሊወገዝ የሚገባው መሆኑን የተናገሩት አፈ ጉባኤው፣ በተለይ ትውልድ በሚታነጽባቸው ትምህርት ቤቶች የሚራገቡ ፖለቲካዊ አጀንዳዎችን በመከላከል ሰላማዊ የመማር ማስተማር ሂደት እንዲኖር እና አጠቃላይ ሰላምም እንዲረጋገጥ የምክር ቤት አባላት ድርሻቸውን ሊወጡ እንደሚገባ አስገንዝበዋል፡፡


በውይይቱ ላይ የተሳተፉ የምክር ቤት አባላት በሰጡት አስተያየት አዲስ አበባ የሁሉም ብሔር ብሔረሰቦች ከተማ መሆኗን ሁሉም አካል አምኖ መቀበል እንዳለበት ገልጸው፣ ፖለቲካዊ አጀንዳዎችን በትምህርት ቤቶች ለማራመድ የሚደረገው ሙከራ ትክክል አለመሆኑንና ይህንን በሚያደርጉ አካላት ላይ ተገቢው ሕጋዊ እርምጃ ሊወሰድ እንደሚገባ አስገንዝበዋል፡፡ የሚፈጠሩ ችግሮችን ለመፍታት የፍትህ አካላትና በየደረጃው የሚገኙ አደረጃጀቶች ተግባራቸውን በአግባቡ ሊወጡ እንደሚገባቸው ያሳሰቡት አባላቱ፣ ወላጆች፣ ተማሪዎች፣ መምህራን እና አጠቃላይ ማኅበረሰቡን ያሳተፉ የውይይት መድረኮችን እስከ ብሎክ ድረስ በማካሄድ ችግሮች በግልጽ ቀርበው ምላሽ የሚያገኙበትን መንገድ መፍጠር ብሎም የመልካም አስተዳደር ችግሮች ምላሽ እንዲያገኙ መሥራት የመንግሥት ተግባር ሊሆን እንደሚገባ አክለው ተናግረዋል፡፡