Stalin Gebreselassie

ህፃን አርሴማ ጎይቶኦም ትባላለች በ2013 ዓ/ም በትግራይ ላይ በተከፈተው ግልፅ ጦርነት ወደ ንፁሃን ኢላማ ባደረጉ የከባድ መሳርያ ድብደባዎች ሰለባ ከሆኑት የትግራይ ህፃናት መካከል ነች።

የ10 አመት ታዳጊ የሆነችው ህፃን አርሴማ በጦርነቱ ጉዳት ከደረሰባቸው ወገኖች መካከል ስትሆን ህፃንዋ የማይጨው ከተማ ነዋሪ ነች። በተፈፀመው የከባድ መሳርያ ድብደባ ራስዋን ጨምሮ ሁለት እህቶችዋ እና አባትዋ ላይ ከፍተኛ ጉዳት መድረሱን ትናገራለች።

በ2013 ዓ/ም ነው የተመታሁት፣ ከብቶች ስጠብቅ ውየ ወደ ቤት ስገባ ቤታችን ላይ ባረፈው የከባድ መሳርያ ቁምቡላ ነው የተመታሁት፣ እህቶቼም ነበሩ አባቴ ደግሞ ልጆቼ መጡ ብሎ ወደ ቤት ግቡ እያለን እያለ ነው የተመታው፣ ሁላችንም ተመትተን ብዙ ደም ከፈሰሰን ብኋላ ነው ጎረቤቶቻችን አንስተውን ወደ ማይጨው ሆስፒታል የወሰዱን ትላለች ህፃን አርሴማ።

ህፃን አርሴማ እኔ ጭንቅላቴ፣ እግሬን እንዲሁም ሆዴን በጣም ነው የተጎዳው ትላለች፣ ጣቶቼ አብዛኛዎቹ ተቆርጠዋል፣ አንደኛዋ እህቴ እግርዋ ነው የተመታችው እንደ እኔ ታነክሳለች። ሌላኛዋ እህቴ ግን በቅፅበት ህይወትዋ አልፏል በማለት የነበረው አስከፊ ሰቆቃ ትገልፃለች።
አባቴ ደግሞ እስካሁን ራሱን አያውቅም፣ ጭንቅላቱ ላይ ጉዳት ስለደረሰበት ምንም ነገር አያስታውስም ሁሉንም ነገር ረስቷል ትላለች።

ጉዳቱ ከደረሰብኝ ብኋላ ለሁለት ወራት ያክል ራሴን አለውቅም ነበር፣ በፅኑ የህሙማን ማቆያ ክፍል እንደነበረች የገለፀችው ህፃን አርሴማ ሁለት ወር ሙሉ ምንም ነገር አልናገርም ነበር፣ ሀኪሞቹም ይሁኑ ቤተሰቦቼ ትሞታለች እንጂ ትድናለች ብለው አላሰቡም ነበር ስትል ታወሳለች።