Natnael Mekonnen

በአዲስ አበባ ከተማ በኤሌክትሪክ የሚሰሩ ተሽከርካሪዎች ቁጥር ከጊዜ ወደ ጊዜ እየጨመረ ይገኛል፡፡ የአዲስ አበባ ከተማ አስተዳደር ከብክለት ነፃ የሆኑ በኤሌክትሪክ የሚሰሩ የሚኒባስ ተሽከርካሪዎችን ከማዕከል እስከ ወረዳ ላሉ ተቋማት አስረክቧል።

ብክለትን በመከላከል ረገድ ፋይዳቸው ጉልህ የሆኑ በኤሌክትሪክ የሚሰሩ ተሽከርካሪዎችም ከተማዋን ፅዱ ለማድረግ እንዲሁም ወጪም ለመቆጠብ የሚያስችሉ ሲሆን የኤሌክትሪክ ተሽከርካሪዎች ግዥና ስርጭትም አዲስ አበባን ውብና ፅዱ እንዲሁም ከአካባቢ ስነምህዳር ጋር የተስማማች ከተማ የማድረግ ውጥን አካል እንደሆነ ክብርት ከንቲባ ኣዳነች ኣቤቤ ተነግሯል። ኣክለውም ከዚህም ባሻገር ያለንን የኤሌክትሪክ ሀይል በመጠቀም ለነዳጅ የሚወጣው የውጭ ምንዛሬ ለመቀነስ ስለሚያስችለን ፊታችንን በኤሌክትሪክ ወደ የሚሰሩ ተሽከርካሪዎች ማዞር እንደሚገባ መግለፃቸውን አዲስ ሚዲያ ኔትዎርክ ዘግቧል።

የጦር ሃይሎች ጠቅላይ ኤታማዦር ሹም ፊልድ ማርሻል ብርሀኑ ጁላ የተሽከርካሪ መገጣጠሚያ እና ማምረቻ ኢንዱስትሪን ግንባታ የመሰረተ ድንጋይ አስቀምጡ።

የጦር ሀይሎች ጠቅላይ ኤታማዦር ሹም ፊልድ ማርሻል ብርሀኑ ጁላ ከተመሰረተ በርካታ ዓመታትን ያሳለፈው የመከላከያ ኢንዱስትሪ ዘመኑ ከደረሰበት የዕድገት ደረጃ ለማድረስ በርካታ ስራዎች እየተሰሩ እንደሚገኙ ገልፀው፣ የፋብሪካው ግንባታ ለሀገርና ለተቋሙ የሚሰጠው ጠቀሜታ ከፍተኛ መሆኑን ተናግረዋል።

ኢንዱስትሪው በአዲስ መልኩ ከተደራጀ በኋላ በተሰሩት ስራዎች ከኪሳራ ወደ ትርፋማነት መሸጋገሩን የገለፁት ጠቅላይ ኤታማዦር ሹሙ የኮርፖሬሽኑ አመራርና አባላቶች ለነበራቸው ቁርጠኝነት ምስጋናቸውን አቅርበዋል።

ተቋሙ የራሱን ገቢ በማመንጨት ለሰራዊቱ መሰረታዊ ጥቅም ለማሟላት አቅጣጫ ተቀምጦ እየተሰራ መሆኑን የገለፁት ጠቅላይ ኤታማዦር ሹሙ የሰራዊቱን የመኖሪያ ቤት ባለቤት ለማድረግና ተጠቃሚነቱን ለማረጋገጥ በኢንዱስትሪ ፤ በግብርና ፣ በማዕድንና በመሰረተ ልማት ዝርጋታ ላይ ከተሰማሩ ባለሀብቶች ጋር ለመስራት የተቀመጠው አቅጣጫ ማሳያ መሆኑን ጠቁመዋል።

የመከላከያ ኢንጅነሪንግ ኢንዱስትሪ ኮርፖሬሽን ዋና ዳይሬክተር አቶ ጌታቸው ሀይለማርያም የመከላከያ የተሽከርካሪ መገጣጠሚያ እና ማምረቻ ኢንዱስትሪ ከሽርሽር ኢንቨስትመንት ግሩፕ ጋር በመሆን የሚገነባው መሆኑን ተናግረዋል።

ኢንዱስትሪው በሰላሳ ሄክታር ላይ የሚያርፍና በአንድ ዓመት ጊዜ ውስጥ ለማጠናቀቅ መታቀዱንም ዋና ዳይሬክተሩ ገልፀዋል።

አለም አቀፍ ስታንዳርዳቸውን ያሟሉ ወታደራዊ ተሽከርካሪዎችን ከመገጣጠምና ከማምረት ባለፈ በቀጣይ ፕሮጀክቱን የማስፋፋት ዕቅድ እንዳላቸው የገለፁት ዳይሬክተሩ ለፕሮጀክቱ ስኬት ያልተቋረጠ ድጋፍና ክትትል እንደሚደረግም ጠቁመዋል።

በዝግጅቱ ላይ የመከላከያ ሚንስቴር ዲኤታ አቶ ቶማስ ቶት የቢሾፍቱ ከተማ ከንቲባ አቶ አለማየሁ አሰፋ ወታደራዊ አታሼዎችና ከፍተኛ የሰራዊቱ አመራሮች ተገኝተዋል።

በቀጠናው የሚገኘው መከላከያ ሠራዊት እየወሰደ በሚገኘው ጠንካራ ወታደራዊ እርምጃ አሸባሪው ኦነግ ሸኔ እየፈረሰ እንደሚገኝ ተገለፀ።

የደቡብ ዕዝ አንድ ኮር ዋና አዛዥ ኮሎኔል ግርማ አየለ እንደገለፁት ሠራዊቱ በምስራቅ ጉጂና በምስራቅ ቦረና ዞኖች ህዝብን ሲያሸብር በነበረው ኦነግ ሸኔ ላይ በወሰደው ተከታታይነት ያለው ወታደራዊ እርምጃ በአንድ ወር ውስጥ ከ150 በላይ የቡድኑ ታጣቂዎች ለሰራዊቱ እጃቸውን የሰጡ ሲሆን ቡድኑ እየፈረሰ ይገኛል።

ኮሎኔል ግርማ የሠራዊቱን ብርቱ ክንድ መቋቋም ያቃተው ኦነግ ሸኔ በርካታ ታጣቂዎቹ በሠላማዊ መንገድ እጅ እየሰጡ መሆኑን አስታውሰው ፤ ቡድኑ ተደራጅቶ የመዋጋትም ሆነ የማድረግ አቅም እንደሌለው አብራርተዋል።

ሠራዊቱ የህዝባችንን አንድነትና ሰላም በሚያውኩ ፀረ ሠላም ሃይሎች ላይ እያስመዘገበ የሚገኘው ድርብ ድልና ስኬት ተጠናክሮ እንደሚቀጥልም አስገንዝበዋል።

የምስራቅ ጉጂ ዞን አስተዳደርና ፀጥታ ፅህፈት ቤት ሃላፊ አቶ ቦጌ ታፈሰ በበኩላቸው ፤ ህዝባዊ መሰረት የሌለው የኦነግ ሸኔን እኩይ ተግባር የተገነዘቡ በርካታ የቡድኑ ታጣቂዎች የሠላም አማራጭን በመገንዘብ ለሠራዊቱ እጅ እየሰጡ እንደሚገኙ ገልፀዋል።

በተሳሳተ ትርክት የሸኔን ቡድን እንደተቀላቀሉ የሚገልፁት የሽብር ቡድኑ አባላት  ፤ የህዝቦችን ስቃይ ከማብዛት ውጭ ያገኘነው ጥቅም ባለመኖሩ በሰላማዊ መንገድ እጅ ልንሠጥ ችለናል ብለዋል።

የቡድኑ ዓላማ ህዝባዊ አለመሆኑን ጠቁመው ፤ ተበታትነው የሚገኙ ርዝራዥ የቡድኑ ታጣቂዎች የሸኔን የጥፋት ዓላማ በመገንዘብ ወደ ሰላማዊ ህይወታቸው እንዲመለሱ ጥሪ አቅርበዋል።

በዋሽንግተን ዲሲ የኢትዮ-አሜሪካ የቢዝነስ እና የኢንቨስትመንት ፎረም ተካሄደ

ዋሽንግተን ዲ.ሲ. የሚገኘው የኢ.ፌ.ዲ.ሪ. ኤምባሲ ከዋፋ ማርኬቲንግ እና ፕሮሞሽን ጋር በመተባበር የኢትዮጵያ-አሜሪካ ቢዝነስ እና ኢንቨስትመንት ፎረም በዋሽንግተን ዲሲ አካሄደ። በዚሁ ፎረም ላይ የኢ.ፌ.ዲ.ሪ ገንዘብ ሚኒስትር ክቡር አቶ አህመድ ሺዴን ጨምሮ ከፍተኛ የመንግስት ባለስልጣናት የተገኙ ሲሆን በተለያዩ የኢንቨስትመንት ዘርፎች የተሰማሩ ኢትዮጵያውያን፣ ትውልድ ኢትዮጵያውያን እና አሜሪካውያን ባለሀብቶች ተገኝተዋል።

ክቡር አቶ አህመድ ሺዴ ባደረጉት የመክፈቻ ንግግር፤ ባለፉት ጥቂት አመታት የተለያዩ የውጭ እና የውስጥ ፈተናዎች ቢያጋጥሙም የኢትዮጵያ ኤኮኖሚ እነዚህን ተግዳሮቶች ተቋቁሞ አሁንም ዕድገት እያስመዘገበ መሆኑን ገልጸው ኢኮኖሚያችን እነዚህን ችግሮች ተቋቁሞ የማለፍ አቅም የፈጠረበት ዋነኛ ምክንያት ደግሞ በመንግስት እየተተገበረ ያለው መጠነ ሰፊ የሪፎርም ስራ እና በመሰረተ ልማቶች ላይ በተከናወኑ ትልልቅ የኢንቨስትመንት ስራዎች መሆናቸውን ጠቁመዋል።
በተጨማሪም የአየር ንብረት ለውጥን ከመቋቋም፣ በምግብ ራስን ከመቻል እንዲሁም ዘላቂ የግብርና ምርታማነትን ከማሳደግ እና ከተቀናጀ የውሃ ሃብት አስተዳደር ጋር ተያይዞ ያሉ ችግሮችን በዘላቂነት ከመፍታት አንጻር ትልቅ ድርሻ የሚይዘው የአረንጓዴ አሻራ እንቅስቃሴ በተሳካ ሁኔታ እየተከናወነ ይገኛል ብለዋል።
ክቡር ሚኒስትሩ አክለውም አሜሪካውያን ባለሀብቶች አገራችን ኢትዮጵያን መጥተው እንዲጎበኙ እና ያሏትን ሰፊ የኢንቨስትመንት አማራጮች እንዲያዩ ግብዣቸውን አስተላልፈዋል።

በአሜሪካ የኢትዮጵያ ልዩ መልዕክተኛ እና ባለሙሉ ሥልጣን አምባሳደር ክቡር ዶ/ር ስለሺ በቀለም በበኩላቸው አገራችን ኢትዮጵያ ከአሜሪካ ጋር ከ120 ዓመታት በላይ የዘለቀ የዲፕሎማቲክ ግንኙነት ያላት መሆኗን እና በተለያዩ ጊዜያት የከፍተኛ ባለስልጣናት የስራ ጉብኝቶች የተካሄዱ መሆኑን ጠቅሰው በተለይም በኢ.ፌ.ዲ.ሪ. ጠቅላይ ሚኒስትር ክቡር ዶ/ር ዓብይ አህመድ የተመራ ከፍተኛ የልዑካን ቡድን ባለፈው ዓመት በዩ.ኤስ አፍሪካ የመሪዎች ጉባኤ ላይ ተሳትፎ ማድረጉን እና በወቅቱ ክቡር ጠ/ሚ/ር ዶ/ር ዓብይ ከአሜሪካ አስተዳደር፣ ኮንግረስ፣ እና በግሉ ኤኮኖሚ ዘርፍ ከተሰማሩ አካላት ጋር ውጤታማ ውይይቶች ማድረጋቸውን አስታውሰዋል።

በዚህ ፎረም ላይ ኢትዮጵያ ያላትን እምቅ ሀብት እና የኢንቨስትመንት አማራጮች እንዲሁም ኢንቨስተሮች ሊያገኙ የሚችሉትን የተለያዩ ማበረታቻዎችን አስመልክቶ ሰፊ ገለጻ ቀርቧል። በተጨማሪም በተለያዩ የኢንቨስትመንት ዘርፍ ላይ የተሰማሩ ስኬታማ ትውልድ ኢትዮጵያውያንን እና የተለያዩ አሜሪካውያን የስራ ሃላፊዎችን ያካተተ የፓናል ውይይትም ተካሂዷል።

ከተሳታፊዎች ለተነሱ ጥያቄዎች እና አስተያየቶች ሰፊ ማብራሪያና ምላሽ የተሰጠ ሲሆን፤ በፎረሙ የተሳተፉ አሜሪካውያን ባለሀብቶች መንግስት እያካሄደ ያለው ሪፎርም በተለይም የውጭ ኢንቨስተሮች መዋእለ ንዋያቸውን እንዲያፈሱ ምቹ ሁኔታዎች እንዲኖሩ የሚያደርገውን ጥረት አድንቀው በቀጣይ ከኢትዮጵያውያኑ ባለሀብቶች ጋር ለሚኖራቸው ፍሬያማ ግንኙነት መሰረት የሚጥል ነው በማለት በሀገሪቱ ያሉ አማራጮችን ለማየት ፍላጎታቸው መሆኑን ገልጸዋል። The Ministry of Foreign Affairs of Ethiopia