2024-03-10 20:53:46
#ጾምን ቀድሱ ጉባኤውንም አውጁ
ት•ኢዩ 1:14
ጾም ማለት "ጾመ" ከሚለው የግእዝ ቃል የተገኘ ሲሆን ትርጉሙም ተከለከለ ተወ ታቀበ ታረመ ማለት ነው::
ጾም ማለት ራስን ከእህል ከውሃ ብሎም እግዚአብሔር ከሚጠላቸው ነገሮች ወይም ከክፉ ምግባራት ሁሉ ራስን መከልከል የሥጋን ፈቃድ ለነፍስ በማስገዛት መቆየት ማለት ነው::
"ራሳችሁን ጠብቁ በመብልና በመጠጥ በመቀማጠልና የዓለምን ኑሮ በማሰብ ልባችሁን አታደንድኑ ያ ቀንም በድንገት እንዳይመጣባችሁ"
ሉቃ 21:34
የጾም መንፈሳዊ ጥቅሞች ምንድናቸው?
#1ኛ የሥጋን ፈቃድ ለነፍስ የምናስገዛበት መንፈሳዊ ተግባር ነው
ጾም ከመንፈሳዊ ምግባራትና ተጋድሎ አንዱ ነው:: ለሥጋ መንፈሳዊ ልጓም ነው:: አንድ ክርስቲያን ፈቃደ ሥጋውን እየገታ ነፍሱን የሚያለመልምበት
መንፈሳዊ ስንቅ ነው።
"ጾም ቁስለ ነፍስን የምትፈውስ ኃይለ ፍትወትን የምታደክም የበጎ ምግባራት ሁሉ መጀመሪያ ከእግዚአብሔር ጸጋን የምታሰጥ የወንጌል ሥራ መጀመሪያ ናት"
(ማር ይስሐቅ አንቀጽ 4 ምዕ 6)
#2ኛ ጾም የኃጢአት ሥርየት የምናገኝበትና ወደ እግዚአብሔር የምንቀርብበት መንገድ ነው::
"በፍፁም ልባችሁ በጾምም በልቅሶና በዋይታ ወደ እኔ ተመለሱ" ት•ኢዩ 2:12
#3ኛ ጾም የዲያብሎስን ፈተናና ውጊያ ድል የምናደርግበት መንፈሳዊ የጦር መሳርያ ነው::
ይህንን ጌታችን መድኃኒታችን ኢየሱስ ክርስቶስ በተግባር አስተምሮናል ማቴ 4÷1-11 እንደተጠቀሰው ዲያብሎስ ጌታችን መድኃኒታችን ኢየሱስ ክርስቶስን በሦስት ዋና ዋና የኃጢአት ሥሮች በተባሉት አርእስተ ኃጣውእ እንደፈተነው ጌታችንም ድል እንዳደረገው ተገልጿል::
እነዚህም አርእስተ ኃጣውእ:-
#1ኛ. ስስት
"የሚፈታተነውም ቀርቦ አንተ የእግዚአብሔር ልጅ ከሆንህ እነዚህን ድንጋዮች እንጀራ እንዲሆኑ በል አለው " ማቴ 4:3
በማለት ለጌታችን የመጀመሪያውን ፈተና እንዳቀረበለት መጽሐፍ ቅዱስ ይናገራል:: ጌታችን ይህንን ፈተና
"ሰው ከእግዚአብሔር አፍ በሚወጣ ቃል ሁሉ እንጂ በእንጀራ ብቻ አይኖርም ተብሎ ተጽፏል"
ብሎ ዲያብሎስን በትእግስት ድል አድርጎታል::
#2ኛ. ትእቢት
" መላእክቱን ስላንተ ያዝልሃል እግርህንም በድንጋይ ከቶ እንዳትሰናከል በእጃቸው ያነሡሃል ተብሎ ተጽፏልና የእግዚአብሔር ልጅስ ከሆንህ ወደ ታች ራስህን ወርውር አለው"
በዚህ ዲያብሎ ለክፋትና ለተንኮል በጠቀሰው የመጽሐፍ ቅዱስ ጥቅስ የምንረዳው ጥቅስ መጥቀስ መጻሕፍትን ማወቅ የእውነተኛ ሰዎች ምልክት አለመሆኑን እንረዳለን::
ለዚህም ፈተና ጌታችን መድኃኒታችን ኢየሱስ ክርስቶስ ሲመልስ
" ጌታ አምላክህን አትፈታተነው ተብሎ ደግሞ ተጽፏል" በማለት በትእቢት የመጣበትን የዲያብሎስን ፈተና በትህትና
ድል አድርጓል::
#3ኛ ፍቅረ ነዋይ
"ደግሞ ዲያብሎስ እጅግ ረጅም ወደ ሆነ ወሰደው የዓለምንም መንግስታት ሁሉ ክብራቸውንም አሳይቶ ወድቀህ ብትሰግድልኝ ይህንን ሁሉ እሰጥሃለሁ አለው:: በማለት ብዙዎችን ድል ባደረገበት በፍቅረ ነዋይ የመጨረሻውን ፈተና አቀረበ:: በእውነቱ ከሆነ ዛሬ በዚህ ፈተና ያልተሸነፈ ሰው የለም:: እንደሚታወቀው በዓለም ላይ ያሉ ሁሉም ጦርነቶች ብዙ ምክንያት ቢሰጣቸውም ዋናው ምክንያት ግን ፍቅረ ነዋይ ነው:: ዝሙት ስርቆት ዘፈን ምንጫቸው ፍቅረ ነዋይ ነው::
እናምናለን የምንል ሰዎችም በዚህ ኃጢአት በመያዛችን ቤተክርስቲያናችን በብዙ ችግር ውስጥ ገብታለች:: ለሁላችንም ከዚህ ሕይወት መውጫ መንገዱን አምላካችን ያሳየን::
ጌታችንም
"ሂድ አንተ ሰይጣን ለጌታህ ለአምላክህ ስገድ እርሱንም ብቻ አምልክ ተብሎ ተጽፏልና::"
በማለት በፍቅረ ነዋይ የመጣበትን ፈተና በጸሊአ ነዋይ ድል አድርጎታል::
እንግዲህ ከዚህ ሁሉ ፈተና በኋላ
"ዲያብሎስ ተወው
እነሆም መላእክትም ቀርበው ያገለግሉት ነበር" ይላል
መላእክት ባይረዱት መች ድል ያደርገኝ ነበር እንዳይል አንድም ደግሞ እነዚህን ሦስቱን የኃጢአት አለቆች ድል ስታደርጉ መላእክት ይገለጹላችኋል ብሎ ሲያስተምረን ነው:: እኛም በዚህ የጾም ወራት በጾም በጸሎት እንዲሁም በበጎ ምግባራት ሁሉ በርትተንና ጠንክረን የዲያብሎስን ውጊያና ፈተና ሁሉ ድል እንድናደርግ
#ልዑል እግዚአብሔር በቸርነቱ ይርዳን::
ጾሙን የበረከት ያድርግልን አሜን !!!!
ዲ/ን አቤል (ፍቅረ አብ)
ሥርዓተ ቤተ ክርስቲያን Tube
https://www.youtube.com/channel/UCyyw8be1uLS-PdwVLd-zyKw
#subscribe ያርጉ ይቀላቀሉ እና ይማሩ
@seratebtkrstian
@seratebtkrstian
@seratebtkrstian
join
ለጥያቄ ለአስተያየት
@Men_Lerdawobot
#ሼርርርርርርርርርርር
20.5K viewsⒻⓔⓚⓡⓔ 🇦 🇧 🇪, edited 17:53
ሥ
