ሳሙኤል አለሙ-Samuel alemu

2022-07-08 13:28:12 ከዛስ እንዳትሉ
(አስታወሰኝ ረጋሳ)
…
ከርቤ ብትታጠን ድኝ ብትታጠን
ከላዩዋ አልጠፋ አለ
የርኩሰት ታሪኳ የክፋቷ መጠን
…
እኔም ሞኛሞኙ
ምን እንዳስነካችኝ ጠንቅቄ ባላቅም
ጭራዋ ሆኛለሁ
በየሄደችበት ከሷ አልላቀቅም
…
(አሁን በቀደም ለት)
በተኛሁበት ላይ ወዳልጋዬ መጣች
ከዛስ አትሉኝም
ከዛማ ቦኋላ ካልጋዬ ጫፍ ወጣች
…
ከዛስ አትሉኝም
…
ከዛማ በኋላ
እጇን ገላዬ ላይ ስታርመሰምሰው
እስቲ ጉዷን ልየው
በማለት ዝም አልኳት እንዳንቀላፋ ሰው
…
መጀመሪያ እግሬን
ከዛም ወደላይ ከፍ
ምን ፈልጋ ይሆን
ምነካት እቺ እንከፍ
ብዬ ሳሰላስል ከራሴ ስሟገት
ሲመዘዝ አየሁት
ሊስም አሞጥሙጦ አፏ ወደኔ አንገት
…
አንድም ቃል ሳይወጣኝ ሳልደነባበር
ጉዷን ልየው ብዬ ዝም እንዳልኩኝ ነበር
(ከዛስ አትሉኝም)
…
ከዛማ በኋላ
አንገቴን
ግንባሬን
ጉንጬ ላይ
ከንፈሬን
ደረቴን
እንብርቴን ምናምን ምናምን
…
ብቻ የሆሆነ ቦታ ላይ
እጇ ድንገት ሲያርፍ እንዳይሆን አረገኝ
ምነካት እቺ ልጅ
በገዛ አልጋዬ ላይ
በማይሆን ሰአት ላይ ነገር ምትፈልገኝ!
…
ከዛ ደሜ ፈላ
ደሜ በጣም ሞቀ
…
(ከዛስ አትሉኝም)
…
ከዛማ በኋላ
ጉዷን ልየው ያልኩት አሳየችኝ ጉዴን
ስንት ዘመን ሙሉ
ውድ የነበርኩት ልጅ ረከስኩ ሁዳዴን
…
መቼም ያልጋ ነገር እንዲህ ነው አመሉ
ከዛስ እንዳትሉ።


@Samuelalemuu ክፈት / አስተያየት ይስጡ

2022-07-03 13:09:07 በቃል ሲነገራት የፍቅር አጥናፉ፥
ደሞ እንደሚያስደስት በጋራ ሲከንፉ፤
አታምንም ልጅቱ...
ስለምትሰማ ነው ውሸት በየቤቱ፤
...
...
ማፍቀር መታደል ነው
መፈቀርም መክበር፤
የበደነ ገላ ሊሞት እንዲሳፈር፤
የቀናለት መስመር
ብለናትም ነበር .......
ግና የት አባቱን የፍቅር መጃጃል፤
በጠርጣሪ ልብ ውስጥ ፍርሃት ይዋጃል።
..
..
አጥብቃ ጠይቃ እምነትን ካልፃፈች፤
በፍርሀቷ ግርዶሽ ፍቅር ለምኔ ካለች፤
ያው መንገድ ጠቁሟት....
የጥላቻን ድልድይ
ደም የተፃፈበት የሚታይ እንደ እኩይ፤
ግሳት ብቻ ያለበት ጥጋብ ብቻ ቤቱ፤
በቀይ የተደራ የደም ልብስ ሌማቱ፤
የከበበውን ደጅ.....
እንኳንስ ለሰው ልጅ ለእንስሳም እማይበጅ፤
መሆኑን ስታየው .....
ፍቅር ወዴት አለህ ምትል ይመስለኛል፤
እሱ ካልቀረበ ሰላም የት ይገኛል።

#ሚኪ

@Samuelalemuu ክፈት / አስተያየት ይስጡ

2022-07-03 13:08:16 እሳት አምላክ ይዤ
ኤልያስ ሽታኹን
~ ~ ~ ~ ~ ~
በዚህ ዓለም እልፍኝ
እኔ ትይሽ እፍኝ።
ከሰማይ እሰከአድማስ
መንገድ ህልሜ ቢማስ
አይሞላም አንድ ክንድ
ስሬ የደረቀ የማላፈራ ግንድ

ጨለማ ልቡና
ታበራለህና
ጥልቁ ና ድቅድቁ
ፅልመቴን ግፈፈው
ደንዳና ጀርባዬን በፍቅር ግረፈው።
ከማንም አይደለም ከውስጥ ነው ክሴ
ራሴን ልክድ ስል ጠፋብኝ ራሴ።
አንተማ
በሰው ስብጠለጠል
የልጅነት ወዜ ረግፎ እንደጠል
አንተማ
በስጋ መለስኸኝ ጠፍቼ በቅጠል።

(ግን
ደግሜ ከፋሁኝ
ደግሜ ጠፋሁኝ)

እኔ
ብወጣም ከገነት
የእግር እሳቴ ግን ያጣሁት ልጅነት።

አገቱኒ ከለባት
አስቆጠርኩህ አይደል እንደሰነፍ አባት?
አንተን ያህል ጌታ እያለኝ በቤቴ
ወና ነው ማጀቴ።
ለምን?
ስመረመር ግና
ስበረበር ግና
ወግ ወጉን ነው ለካ ያለሁ በለብታ
እግዜር ውኃን ይዤ የጠማኝ ጠብታ።

ወግ ወጉን ነው ለካ የያዝኹት ለይምሰል
እሳት አምላክ ይዤ የማያይዝ ከሰል።


@Samuelalemuu ክፈት / አስተያየት ይስጡ

2022-06-11 13:55:07 የሚገርመኝ
ቄስ አግዞ ፣ መለኮት
መንፈስ ቅዱስ ፣ ውሃን ባርኮት
እውር አይኑ ፣ ሲበራለት
ሽባ እግሩ ፣ ሲተረተር
ከተዓምር ፣ ሲቆጠር።

"የሚደንቀኝ"
ለብቻዋ ፣ ሳለች እናት
ወይ መለኮት ፣ ሳይወግናት
በእውር አለም ፣ ስታበራ
በሽባ ምድር ፣ ስትመራ
እንደተራ ፣ የሚቆጥሩት
እንደ ታምር ፣ ማያወሩት።

"የምመኘው"
በየገዳም ፣ በየደብሩ
ተጋድሎሽን ፣ እንዲያወሩ
ፈወስሽኝ ስል ፣ ከ እውር ጽልመት
አዳንሽኝ ስል ፣ ከመቆመጥ
ልጅነቴን ላጠነክር፣
ገድልሽን ልመሰክር።

[ ቃለ መወድስ ]

እናትነት
ቢሳለሙት ፣ እንደ ዳዊት
ቢተሻሹት ፣ እንደ እምነት
ትርፉ ድህነት።
ቢጻበሉት ፣ እንደ ጠበል
ቢያወድሱት ፣ እንደኪዳን
ዋጋው መዳን።


@Samuelalemuu ክፈት / አስተያየት ይስጡ

2022-06-08 16:53:18 ኤልያስ ሽታኹን
እውነታቸውን ነው?
~ ~ ~ ~ ~
የመታሽ ክንፍሽን
የቀማሽ ሳቅሽን
ማንነው?

እኔን
እኔን የኔ ርግብ
አልችልም ሆኖ ነው ከዓለም ግብግብ
አልችልም ሆኖ እንጂ ባሁኑ ቦታዬ
እኔማ እንድድሮ ባቅፍሽ ነው ደስታዬ
(ብስምሽ ደስታዬ)

ልጠይቅሽማ
ተለያየን ማለት ያስብላል ምን ግዴ?
ሰው ትዝታ ሲሆን አቧራ ነው እንዴ?

ተለያየን ማለት ፍቅራችን በነነ
ተለያየን ማለት ፍቅራችን ተነነ
:
ማለት ይሆን እንዴ?

እኔማ
ተለይቼሽ እንኳ መውደቅሽ ያመኛል
ማዘንሽ ያመኛል
ማኩርፍሽ ያመኛል

ሰው ግን ይመጣና
"አልወጣልችልህም" ማለት ነው ይለኛል፡፡

እውነታችውን ነው?


@Samuelalemuu ክፈት / አስተያየት ይስጡ

2022-06-01 19:50:35 #አልልሽም
:
:
:
ከፍጥረት ለይቶ እንደሰራሽ በማር፤
የውበትሽና የፀባይሽ ማማር፤
ባንድ ተሰባጥሮ አቅሌን አስቶኛል፤
አንደኛዬ ነሽ ግን ማለት ይከብደኛል።
:
:
ጡት እንዳጣ ዕፃን ልጅ ስነፋረቅ ውዬ፤
ልክ ዐይንሽን ሳየው በደስታ ዘልዬ፤
ማልቀሴን ረስቼ ሰላም አድሬያለሁ፤
አንደኛዬ እኮ ነሽ ማለት ግን ፈራለሁ።
:
:
የህይወቴ ግማድ የመኖሬ ጉዳይ፤
የደስታዬ ወሰን የአንድ ልቤ ሙዳይ፤
አንቺ እንደሆንሽ ባውቅም፤
የኔ አንደኛ ብዬሽ አልመፃደቅም።
:
:
ተንጠራርተሽ ደርሰሽ አቅፈሽ በሹክሹክታ፤
ዓይን ዓይኔን እያየሽ ስትዪኝ የኔ ጌታ፤
ሀሴት ይወረኛል ከእግር እስከ ፀጉሬ፤
አንደኛዬ ነሽ ግን አልልም ደፍሬ።
:
:
እውነት ነው የኔ ውድ እንዴትስ ደፍራለሁ፤
አንቺን እንዲ ማለት በጣሙን አፍራለሁ።
:
:
አንቺን አቅፎ ኖሮ አንቺን አቅፎ መሞት ምን ልቤ ቢመኝም፤
ተቀየሚኝ እንጂ አፈር እስክገባ አንደኛዬ አትሆኚም።
እንደው ቢሆን እንኳን አንደኛዬ እንድልሽ እውን ፈልገሽም፤
ሲያምርሽ ይቅር እንጂ መቼም አልልሽም።
:
:
ለምን ካልሺኝ ውዴ ...
አንደኛ ነው ሲባል አንድ ነገር ደርሶ፤
ሁለተኛ ሆኖ ከእርሱ ትንሽ አንሶ፤
የሚፎካከረው ሌላ አካል እንዳለ፤
መረዳት አይከብድም ቃሉን ላስተዋለ።
:
:
ስለዚም እንቁዬ ...
በውበት በፀባይ ሁለተኛ ሆኖ ካንቺ ሚወዳደር፤
ቢፈለግ አንዳች ሰው በሌለበት ሀገር፤
አንደኛዬ እኮ ነሽ እንዴትስ እላለሁ፤
ብቸኛዬ ሆነሽ ብቻሽ ሆኜ ሳለሁ።

#ሄኖክ_ብርሃኑ
@Samuelalemuu ክፈት / አስተያየት ይስጡ

2022-05-24 13:29:34 #የለም
:
:
ከተቸረኝ ገላ አካሌ ላይ ካሉት፣
እንቅጩን ልናገር አሁን ቆይ ማን ይሙት፣
ከስሜት ህዋሴ ምረጥ ብባል እንደው፣
ልክ እንደ ብሌኔ ይኖር የምወደው?
የለም
#ሄኖክ_ብርሃኑ
@Samuelalemuu ክፈት / አስተያየት ይስጡ

2022-05-18 07:54:39 አይደለም ምኞቴ

(#በእውቀቱ ስዩም)

አይደለም ምኞቴ
ለምለም አንገትሽ ላይ : ክንዶቼን መጠምጠም
ዳሌሽ ላይ መንሳፈፍ: ጭንሽ ማሃል መስጠም
እይደለም ምኞቴ

ከንፈርሽን ማለብ
ቀሚስሽን መግለብ
ከገላሽ ቆርሼ :ገላየን መቀለብ
ደረትሽን ማለም
ጡትሽን መሳለም
በቁንጅናሽ ጅረት : ገነቴን ማለምለም
አላማየ አይደለም::

ምኞቴን ልንገርሽ?

ካለሺበት ቦታ: ቀልቤን ማሰማራት
ወትሮ ካንቺ ጋራ: ቡና መጠራራት
ሰላም መገባበዝ: ትዝታ መጋራት

የጨለመ ፊቴን : ባይንሽ ጮራ ማድመቅ
በቃላትሽ መስከን: በሳቅሽ መጠመቅ
በጎ መንፈስሽን :ካይንሽ ላይ መሻማት
ርጋታሽን ማጥመድ : ዝምታሽን መስማት::

@Samuelalemuu
@Samuelalemuu
@Samuelalemuu ክፈት / አስተያየት ይስጡ

2022-05-15 07:36:56 ያልሽውን ሆኛለሁ።
ኤልያስ ሽታኹን
~ ~ ~ ~ ~ ~
አንድ ቃል ሲወጣሽ የሰማሁሽ ሰሞን
ራሴን አፍርሼ
የምትወጀውን ያን ሰው እስከመሆን
ሞክሬ
ዳክሬ
ንጄው ማንነቴን ቀለልኩ እንደ ንፋስ
አንቺን ካገኘሁኝ ከመኖር ብጠፋስ?
:
እያንዳንዱን ህዋስ ናፍቆትሽ በላቸው
"ለሴት ብለህ" ሲሉኝ "ለፍቅር" እያልኳቸው።

አይ ብታይኝ ኖሮ
የቱ ነው 'ሚነቀል የቱ ነው 'ሚተከል
አንድ አንቺን ፍለጋ ቃልሽን ለማከል።

ምን ቀረኝ ብለሽ ነው?

የለም እስከሚባል
ተቀየረ እስኪባል
ትናንቴን -ዛሬዬን- ነገዬን - እንደበግ ጨክኜ አርጃለሁ
በይ ውደጄኝ ልይሽ ያልሽውን ሆኛለሁ።



@Samuelalemuu ክፈት / አስተያየት ይስጡ

2022-05-09 04:06:24 አንቺ
…
ልቤ መሀል ያለሽ ጠልሰም
ድብቅ ቅኔ ወርቅ አይሉሽ ሰም
…
እንዳይፅፍሽ
ጋሽ ሥበሃት ተቸገረ ጉድ አለ ጉድ
እንዴት ብሎ ሊገልፀው ነው
ጥርስሽ መሀል ያለን ውበት ፈገግታሽ ስር ያለን ስር_ጉድ
…
አንቺ
አንቺ
አንቺ
…
ጋሽ አፈወርቅ እንዳይስሉሽ
ቢቀላቀል ቀለም የለ አንቺን መሳይ
የሰማይ ጉድ የምድር ሲሳይ።
…
አንቺ
አንቺ
…
ጋሽ ጥላሁን ሊዘፍንሽ ሲል
እ ህ ህ ህ ህ ብሎ ቆመ መሰል፡
ለሙዚቃ የምትከብጂ ትዝታ ነሽ አንቺሆዬ
ባቲ አትባይ ወይ አንባሰል።
…
አንቺ
አንቺ
አንቺ
…
በየቱ ቀመር በየቱ ልሳን
በየቱ ክታብ በየቱ ድርሳን
…
ማን ምን ብሎ ይግለፅላት፡
ሰው ነች ሲሉ ወዲያው ክንፋም
ግማሽ ሴጣን ግማሽ ፅላት።
…
ይህው ደሞ ነካካችኝ
ተነሳብኝ የስሟ ዛር
ና ስትለኝ ከሞትኩበት
ተነሳሁኝ እንዳላዛር።
…
ብድድግ አልኹኝ
ካረፍኩበት ትቢያ አፈሬን አራግፌ
ልረሳት ስል የማልረሳት
ምን ይሆን ግን ስውር ግፌ!
…
…
አይገለጥ ለጠቢብ ሰው
የሷ ልኬት የሷ ስፋት
ከኔ በቀር
ማን ሊፅፋት።

Semir.aklu

@Samuelalemuu ክፈት / አስተያየት ይስጡ