2022-11-05 17:42:07
ሥርዓተ ማህሌት ዘሐምስ ሳምንት
ነግሥ (የማንኛውም ወርኃ በዓልና ክብረ በዓል ሥርዐተ ማኅሌት መጀመሪያ)
ሰምዓኒ እግዚኦ ጸሎትየ፤ሃሌ ሉያ ሃሌ ሉያ ወይብጻሕ ቅድሜከ ገዓርየ፤ሃሌ ሉያ ሃሌ ሉያ ወኢትሚጥ ገጽከ እምኔየ፡፡በዕለተ ምንዳቤየ አጽምእ እዝነከ ኅቤየ፤ሃሌ ሉያ ሃሌ ሉያ እመ ዕለተ አጽውአከ ፍጡነ ስምዓኒ፡፡ሃሌ ሉያ ሃሌ ሉያ ለዓለመ ወለዓለመ ዓለም፡፡ሃሌ ሉያ ዘውእቱ ብሂል፡፡ንወድሶ ለዘሀሎ እግዚአብሔር ልዑል፡፡ስቡሕ ወውዱስ ዘሣረረ ኵሉ ዓለመ በአሐቲ ቃል፡፡
መልክአ ሥላሴ
ሰላም ለኲልያቲክሙ እለ ዕሩያን በአካል፤ዓለመክሙ ሥላሴ አመ ሐወጸ ለሣህል፤እምኔክሙ አሐዱ እግዚአብሔር ቃል፤ተፈጸመ ተስፋ አበው በማርያም ድንግል፤ወበቀራንዮ ተተክለ መድኃኒት መስቀል።
ዚቅ
ዝኬ ዘተዘርዓ ቃለ ጽድቅ በትውክልተ መስቀል፤ ወፍሬሁኒ ኮነ መንፈሰ ህይወት፤ ተስፋሆሙ ለእለ ድኅኑ፤ ወበጽጌሁ አርዓየ ገሃደ አምሳለ ልብሰተ መለኮት፤ ዕቊረ ማየ ልብን፤ ጽጌ ወይን ተስፋሆሙ ለጻድቃን።
ዓዲ ዚቅ
እስመ ውእቱ ክብሮሙ ለቅዱሳን፤ መድኃኒቶሙ ለጻድቃን፤ አሠርገዋ ለምድር በጽጌ ሮማን፤ ስብሐተ ዋሕድ ዘምስለ ምሕረት፤ በመስቀሉ ወበቃሉ፤ አዕበዮሙ ለአበዊነ።
ማኅሌተ ጽጌ
ከመ ሰዶም እምኮነ፤ ወከመ ገሞራ እመሰልነ፤ እግዚአብሔር ኪያኪ እመ ኢያትረፈ ለነ፤በትረ ተአምር ማርያም እንተ ጸገይኪ ለነ፤ ዘይቤ ኢመጻእኩ እጸውዕ ጻድቃነ፤ አላ በንሥሐ ኃጥአነ።
ወረብ
በትረ ተአምር ማርያም እንተ ጸገይኪ እንተ ጸገይኪ ለነ መድኅነ/2/
ዘይቤ ኢመጻእኩ እጸውዕ ጻድቃነ አላ በንሥሐ ኃጥአነ/2/
ዚቅ
መንክር ተአምሪሁ ለመድኃኒነ ወከመ ወፅአት በትር እምሥርወ ዕሤይ በአምሳለ በትረ ያዕቆብ በዘይርዒ አባግዒሁ ይእቲኬ ማርያም ይእቲ።
ዓዲ ዚቅ
በትረ አሮን እንተ ሠረፀት ወባቲ ይገብሩ ተአምረ፤በውስተ አሕዛብ፤እስመ አርአያ መስቀል ይእቲ።
ማኅሌተ ጽጌ
እንዘ ተሐቅፊዮ ለሕፃንኪ ጽጌ ፀዓዳ ወቀይሕ፤አመ ቤተ መቅደስ ቦእኪ በዕለተ ተአምር ወንጽሕ፤ንዒ ርግብየ ትናዝዝኒ እምላህ፤ወንዒ ሠናይትየ ምስለ ገብርኤል ፍሡሕ፤ወሚካኤል ከማኪ ርኅሩኅ።
ወረብ
ንዒ ርግብየ ትናዝዝኒ ንዒ ርግብየ ምስለ ሚካኤል/2/
ወንዒ ሠናይትየ ምስለ ገብርኤል ገብርኤል ፍሡሕ ሊቀ መላእክት/2/
ዚቅ
ንዒ ርግብየ ወንዒ ሠናይትየ፤እንተ ሐዋርያት ይሴብሑኪ፤መላእክት ይትለአኩኪ፣ፃዒ እምሊባኖስ ስነ ሕይወት።
ዓዲ ዚቅ
ወይቤላ ንዒ ንሑር፤ኀበ ደብረ ከርቤ ውስተ አውግረ ስኂን፤ እኅትየ መርዓት ርግብየ ሠናይትየ።
ማኅሌተ ጽጌ
ክበበ ጌራ ወርቅ ጽሩይ እምዕንቄ ባሕርይ ዘይኀቱ፤ዘተጽሕፈ ብኪ ትእምርተ ስሙ ወተዝካረ ሞቱ፤አክሊለ ጽጌ ማርያም ለጊዮርጊስ ቀጸላ መንግሥቱ፤አንቲ ኩሎ ታሰግዲ ሎቱ ፤ወለኪኒ ይሰግድ ውእቱ።
ወረብ
ክበበ ጌራ ወርቅ ጽሩይ ዘይኀቱ እምዕንቄ ባሕርይ/2/
አክሊለ አክሊለ ጽጌ ማርያም ቀጸላ መንግሥቱ ለጊዮርጊስ/2/
ዚቅ
አክሊሎሙ ለሰማዕት ተስፋ መነኮሳት ሠያሚሆሙ ለካህናት፤ነያ ጽዮን መድኃኒት።
ማኅሌተ ጽጌ
አድኅንኒ በተአምርኪ ዳግመ ኢያስቆቁ፤ሰቆቃወ ዚአኪ ድንግል ይበቊአኒ በሕቁ፤እስመ አንቲ ወትረ መድኃኒተ አዳም ወደቂቁ፤ኃልዩ ኀጥአነ እስከ አደኀነ በጽድቁ፤ከመ በጽጌኪ ንጉሥ ተሰቅለ ዕራቁ።
ወረብ
አድኅንኒ ኢያስቆቁ በተአምርኪ በተአምርኪ ወላዲተ ቃል/2/
እስመ አንቲ ወትረ መድኃኒተ አዳም ወደቂቁ በተአምርኪ/2/
ዚቅ
አዘክሪ ድንግል ለወልድኪ ዕርቃኖ፤አመ ሰለብዎ አይሁድ ክዳኖ፤ለአማዑተ ከርስኪ ነበልባለ ኃዘን ዘአርሰኖ።
ዓዲ ዚቅ
ማርያምሰ ተሐቱ እምትካት ውስተ ከርሱ ለአዳም ከመ ባሕርይ ፀዓዳ እስመ በእንቲአሃ ወበእንተ አዝማዲሃ ተሰቀልኩ ዲበ ዕፅ ይቤ አዳምሃ አቤልሃ አብርሐምሃ ይስሐቅሃ ወያዕቆብሃ።
ማኅሌተ ጽጌ
ዘንተ(ዘኒ) ስብሐተ ወዘንተ(ወዘኒ) ማኅሌተ፤ተአምርኪ ጸገየ ወፈረየ ሊተ፤ከመ እሰብሕ ዳግመ እንዘ እጸውር ፀበርተ፤ምስለ እለ ሐፀቡ ኣልባሲሆሙ በደመ በግዑ ድርገተ፤ውስተ ባሕረ ማኅው ድንግል ክፍልኒ ቁመተ።
ወረብ
ምስለ እለ ሐጸቡ አልባሲሆሙ አልባሲሆሙ በደመ በግዑ/2/
ክፍልኒ ቁመተ ድንግል ድንግል ውስተ ባህረ ማኅው/2/
ዚቅ
ዮም ሠርፁ ጽጌ በረከት፤ወበዝኁ ውሉደ ጥምቀት፤ትእምርተ መድኃኒት ቆመ ማዕከለ አህዛብ፤እስመ ቤዘወነ ክርስቶስ በዕፀ መስቀሉ፤ወተሣየጠነ በክዕወተነ ደሙ፤ገብረ ሕይወተ ማዕከሌነ።
ዓዲ ዚቅ
አመ ይነግሥ ወልድ በደብረ ጽዮን፤ክፍልኒ ድንግል እቁም በየማን ምስለ አባግዕ ቡሩካን።
ሰቆቃወ ድንግል
እስከ ማእዜኑ እግዝእትየ ማርያም ውስተ ምድረ ነኪር ትሔልዊ፤ሀገረኪ ናሁ ገሊላ እትዊ፤ለወልድኪ ሕፃን ዘስሙ ናዝራዊ፤ለክብረ ቅዱሳን በከመይቤ ኦዝያን ዜናዊ፤እምግብጽ ይጼውዖ አቡሁ ራማዊ።
ወረብ
በከመ ይቤ ኦዝያን ኦዝያን ክብረ ቅዱሳን/2/
እምግብጽ ይጼውዖ ለወልድኪ አቡሁ ራማዊ አቡ/2/
ዚቅ
ትንቢተ ኢሳይያስ ዘተብህለ እምግብፅ ጸዋዕክዎ ለወልድየ ለክብረ ቅዱሳን ጸዋዕክዎ
መዝሙር
ሃሌ ሃሌ ሉያ፤ ሃሌ ሃሌ ሃሌ ሉያ ጸገየ ወይን ወፈረየ ሮማን፤ወፈረዩ ኩሉ ዕጽወ ገዳም ቀንሞስ ዕቁረ ማየ ልብን፤ሠርዓ ለነ ሰንበተ ለዕረፍተ ዚአነ፤ጸገዩ ደንጎላት፤ሠርዓ ለነ ሰንበተ ለዕረፍተ ዚአነ ኀለፈ ክረምት ቆመ በረከት ተሠርገወት ምድር በስነ ጽጌያት፤ሠርዓ ለነ ሰንበተ ለዕረፍተ ዚአነ እግዚአ ለሰንበት ወአቡሃ ምሕረት፤ማ፦ሠርዓ ለነ ሰንበተ ለዕረፍተ ዚአነ፤ሠርዓ ለነ ሰንበተ ለዕረፍተ ዚአነ ።
አመላለስ
ሠርዓ ለነ ሰንበተ ለዕረፍተ ዚአነ/2/
ሠርዓ ለነ ሰንበተ ለዕረፍተ ወለመድኃኒት/2/
ሐመረ ኖኅ
@orthotek
2.9K viewsሙሉዓለም አየለ, 14:42
ሐ
