ሰሌዳ | Seleda

ልጁን ‘የካንሰር በሽተኛ ነው’ በማለት ሲለምንበት የተገኘ ወላጅና ግብረ-አበሩ ተያዙ
********
ጤናማ ልጁን ‘የካንሰር በሽተኛ ነው’ በማለት ሲለምንበት የተገኘ ወላጅን እና ግብረ-አበሩን ይዞ ምርመራ እያጣራ መሆኑን የአዲስ አበባ ፖሊስ አስታወቀ፡፡

በወንጀሉ የተጠረጠረው ግለሰብ ልጁን የካንስር በሽተኛ በመሆኑ ለማሳከም ከአዋሽ 7 ወደ አዲስ አበባ መምጣቱንና ልጁን ለማሳከም፣ ለምግብ እንዲሁም ማደሪያ መቸገሩን በመግለፅ ከአንድ ግብረ-አበሩ ጋር በመሆን በአዲስ አበባ ከተማ በተለያዩ ቦታዎች ሲለምን መቆየቱን ገልጿል።

የህፃኑ አባት አቶ ጃዋር አብዱላሂ እና አህመድ ከሊፋ የተባለው ግብረ-አበሩ ግንቦት 10 ቀን 2016 ዓ.ም በቂርቆስ ክፍለ ከተማ ወረዳ 2 ሰነዓ ሆቴል አካባቢ የማታለል ተግባራቸውን ሲፈፅሙ ፖሊስ በጥርጣሬ ይዟቸዋል።

በዚህም የሀኪም ማስረጃ ሲጠየቁ ምንም አይነት ማስረጃ ማቅረብ ባለመቻላቸው ወደ ፖሊስ ጣቢያ ተወስደዋል።

ህፃኑ በፖሊስ ጣቢያ ሲጠየቅ ጤነኛ መሆኑን እና ምንም አይነት ቁስል አንገቱ ላይ እንደሌለበት ማረጋገጡን በቂርቆስ ክፍለ ከተማ ፖሊስ መምሪያ የደንበል አካባቢ ፖሊስ ጣቢያ አስታውቋል፡፡

የህፃኑ አባትና ግብረ አበሩ በህጻኑ አንገት ላይ ፕላስተር ለጥፈው ሲለምኑ እንደነበር ለፖሊስ በሰጡት ቃል አረጋግጠዋል ሲል ፖሊስ ገልጿል።

ግለሰቦቹ በቁጥጥር ስር በዋሉበት ወቅት በልመና ያገኙት ከ1 ሺ 240 ብር በላይ በኤግዚቢትነት ይዞ ፖሊስ ምርመራውን መቀጠሉን አመልክቷል።

ፋና

በተቋማት ያለመናበብ ችግር ምክንያት ከባድ ተሸከርካሪዎችንና ማሽነሪዎችን ወደ ሃገር ውስጥ ማስገባት ተከልክለናል አስመጭዎች

የካቢኔ ውሳኔ እያስፈጸምኩ ነው ትራንስፖርት እና ሎጅስቲክስ ሚኒስቴር

መንግስት ምንም አይነት መመሪያ ባላወጣበት ከባድ ተሸከርካሪዎችንና ማሽነሪዎችን ወደ ሃገር ውስጥ ማስገባት አትችሉም ተብለናል ሲሉ የመኪና አስመጭዎች ቅሬታቸውን ገልጸዋል፡፡

በተቋማት ያለመናበብ ችግር ምክንያት አገሪቱን ለከፋ ጉዳት እየዳረጉ እንደሚገኙ የሚናገሩት ቅሬታ አቅራቢዎች ሁኔታው ለሙስና እና ብልሹ አሰራር በር የሚከፍት መሆኑን ጠቁመዋል፡፡ ጉዳዩን ለሚመለከታቸው አካላት ቢያሳውቅም ምንም አይነት ምላሽ እንዳላገኙ ተናግረዋል፡፡

የትራንሰፖርትና ሎጅስቲክስ ሚኒስቴር መስሪያ ቤት በኩል የመኪና ማስገቢያ ፈቃድ አንሰጥም እንዳሏቸውም ጨምረው ገልጸዋል፡፡

መናኸሪያ ሬዲዮም የትራንስፖርትና ሎጅስቲክስ ሚኒስቴር ሚኒስትር ዴኤታ በርኦ ሁሴን ያነጋገረ ሲሆን ሁለተኛ መቶ ቀናት ግምግማ በተደረገበት ጊዜ ካቢኔው የኤሌክትሪክ መኪና ውጭ ሌሎች መኪናዎች ወደ ሃገር ውስጥ እንዳይገቡ ውሳኔ ማሳለፉን አስታውሰው ሚንስቴር መስሪያ ቤቱ የካቢኔውን ውሳኔ እያስፈጸመ እንደሚገኝ ገልጸዋል፡፡

የኤሌክትሪክ መኪናን በተመለከተ የስትራቴጃችን አንዱ አካል በመሆኑ ይሄንን እየተገበርን እንገኛለን ሲሉ ምላሽ ሰጥተዋል፡፡ የገንዘብ ሚኒስቴር መመሪያን በተመለከተ ቅሬታ አቅራቢዎቹ እዛ ሂደው መጠየቅ ይችላሉ ሲሉ ለመናኸሪያ ሬዲዮ ተናግረዋል፡፡

አሁንም ካቢኔው የተለየ አቅጣጫ ካላስቀመጠ በስተቀር ይህንኑ ውሳኔ ከማስፈጸም ወደኋላ እንደማይሉ አረጋግጠዋል፡፡

መናኸሪያ ሬዲዮ

ፊል ፎደን እና  ኮል ፓልመር የአመቱ ምርጥ ተጨዋቾቸ ተባሉ ።

በነገው ዕለት ፍፃሜውን የሚያገኘው የእንግሊዝ ፕርሚየር ሊግ የ2023/24 የውድድር ዘመን የአመቱ ምርጥ ተጨዋች ይፋ ተደርጓል።

በዚህም መሰረት እንግሊዛዊው የማንችስተር ሲቲ የፊት መስመር ተጨዋች ፊል ፎደን የፕርሚየር ሊግ የአመቱ ምርጥ ተጨዋች በመሆን በአብላጫ ድምፅ ተመርጧል።

ፊል ፎደን በዘንድሮው የውድድር አመት በሊጉ ለማንችስተር ሲቱ አስራ ሰባት ግቦችን ሲያስቆጥር ስምንት ለግብ የሆኑ ኳሶችንም አመቻችቶ ያቀበለ ሲሆን ሁለት ሀትሪክም ሰርቷል።

ኮል ፓልመር  የዘንድሮው የፕሪሚየር ሊግ 2023/24 የውድድር ዘመን ምርጥ ወጣት ተጫዋች በመባል ተመርጧል ።

ቶኪዮ አዲስ ባበለፀገችው መተግበሪያ የተነሳ ቱሪስቶች እየጎረፉላት ነው ተባለ

ቶኪዮ በሚገኝ ባቡር ጣቢያ ውስጥ የተለያዩ ሀገራት ቋንቋዎችን ከሚናገሩ ቱሪስቶች ጋር ገጽለገጽ በመተያየት የሚተርጉም የስክሪን አገልግሎት መስጠት መጀመሩ ተገልጿል፡፡

በሴቡ ሺንጁኩ ባቡር ጣቢያ ፖሊግሎት የሚል መጠሪያ የተሰጠውና የገጽለገጽ መተያያ የመተርጎሚያ ስክሪን  1ሜትር በ40 ሳንቲሜትር ቁመት ያለው ሲሆን፤ በባቡር ጣቢያው ማዕከላዊ ስፍራ ላይ በምትገኝ አስተናጋጅ ድጋፍ ሰጪነት የውጭ ዜጎች የሚናገሩትን ቋንቋ ወደ ጃፓንኛ፤ የጃፓንኛውን ደግሞ እነሱ ወደሚናገሩት ቋንቋ በድምጽ እያሰማ በጽሁፍ ደግሞ ስክሪን ላይ ተርጉሞ እያሳየ በቀላሉ እንዲግባቡ አስችሏል፡፡

ጃፓን፤ በ12 የተለያዩ ቋንቋዎች የበለፀገውን የመተርጎሚያ ቴክኖሎጂ በባቡር ጣቢያው ውስጥ በመጠቀሟ በተግባቦት ችግር ምክንያት የሚቀሩ ቱሪስቶች እንዳይኖሩ ከማድረጉም በላይ ለጉብኝት የሚሄዱ የውጭ ዜጎችን ቁጥር እንደሚሳድገው የNHK ዘገባ አመልክቷል፡፡

ገና ሊለቀቅ ጥቂት ቀናት የቀረውን "ባርቢ" የተሰኘውን ፊልም ቬትናም በሃገሪቷ እንዳይታይ ከልክላለች።

ለምን ሲባል:-

ይህ ምናባዊ-አስቂኝ ፊልም ሊለቀቅ የታሰበው ሐምሌ 14, 2015 ነበር ነገር ግን ከ ፊልም ማስታወቅያው ላይ ባለው አንድ ትእይንት ሊከለከል ችሏል።

ታዲያ ይህ ትእይንት የሚያሳየው የ ቻይናን ካርታ ነበር እናም በካርታው ላይ ዘጠኝ ሰረዞች በቻይና ባህር ላይ አርፈው ይታያሉ እነዚህም ዘጠኝ ሰረዞች የሚያመለክቱት 3 ሚሊዮን ካሬ ኪሎሜትር የሚሸፍን ሃሌታው "ሀ" ቅርጽ ያለው የባህር ክፍል ሲሆን ይህ አካባቢ በ ነዳጅ እና በ ተፈጥሮ ጋዝ የበለጸገ ነው፤ ሆኖም ይህንኑ አከባቢ ቬትናም፣ ፊሊፒንስ፣ ብሩኔይ፣ ማሌዥያ እና ታይዋን ይገባኛል ጥያቄ ለረጅም ጊዜ ሲያቀቡ የቆዩ ቢሆንም ጉልቤዋ ቻይና ግን ጥያቄያቸውን ችላ በማለት በተለያዩ ታላላቅ ሚዲያዎች ላይ እነዚህ መሰመሮች እንዲታዩ እና የቻይና ባለቤትነቱን እንዲለመድ ግፊት እያደረገች ትገኛለች።

በዚህ ትእይንት ደስተኛ ያልሆነው የ ቬትናም ባህልና ቱሪዝም ሚንስቴር ይህ ፊልም በሃገሪቷ ውስጥ ጨርሶ እንዳይታይ አግዷል።