አንተ አንተ ነህ! ፨፨፨//////፨፨፨ አዎ! አንተ አንተ ነህ ማንም አይደለህም፤ የፈለከውን ለማግ | የፍቅር ጎጆ

አንተ አንተ ነህ!
፨፨፨//////፨፨፨
አዎ! አንተ አንተ ነህ ማንም አይደለህም፤ የፈለከውን ለማግኘትም ማንንም መሆን አይጠበቅብህም፤ ያሻህበት ለመድረስም ሙሉ ማንነትህን መቀየር አያስፈልግህም። እራስህን ሆነህ የተመኘሀውን ህይወት መኖር ትችላለህ፤ በእራስህ ማንነት ከፍ ማለት ትችላለህ፤ በእራስህ ገፅ መድመቅ፣ ማጌጥ፣ መዋብ ትችላለህ። ባለማስመሰልህ አንዳች የምታጣው ነገር ያለ እንዳይመስልህ። ሌሎች የሚመኙትን አይነት ጥንካሬና ብርታት ማጎልበት ትችላለህ። ከመመኘት በዘለለ፣ ከመፈለግ በዘለለ ብዙዎች የሚመኙትንና የሚፈልጉትን ህይወት መኖር ትችላለህ።

አዎ! አብረውህ ላሉ ሰዎችም ሁለት ምርጫ ትሰጣቸዋለህ፤ አንድም እውነተኛውን ማንነትህን ተቀብለው፣ ልዩነትህን አክብረው አብረውህ እንዲጓዙ ካልሆነም መንገዱን እንዲለቁልህ። እያንዳንዱ ሰዎችን ለመሳብ፣ ለማሳመን፣ ለመማረክ የምታባክነው ጊዜና ስሜት እጅግ ውድ ነው፤ መልሰህ የምታገኘው አይነት አይደለም። በሌሎች ህይወት ውስጥ ቦታ ለማግኘት የገዛ ብረሃንህን ስታጣ፣ በጨለማ ስትዋጥ፣ ነገሮች ሲደበዝዙብህ ተመልከት። እይታህን ወደራስህ ካላዞርክ የሚያርፍብህ አይን እንደማይ ኖር እወቅ። በየጊዜው ውጪውን እያማተርክ፣ ከሚመጣውና ከሚሄደው ጋር እየተንከራተትክ፣ የእራስ ሰው ፈለጋው አድክሞህ፣ የተወዳጅነት ጡዘቱ ታክቶህ፣ አሳቢና አዛኝ ማሳደዱ ሰልችቶህ የእራስህን ተፈላጊ ማንነት ከመገንባት ይልቅ ፈልገህ የምትሸሸግበትን ሌላ ማረፊያ ማማተርህ ያጠፋሃል እንጂ በፍፁም አጉልቶ ሊያሳይህ አይችልም።

አዎ! ጀግናዬ..! አንተ አንተ ነህ!የሚመወድህ ይወድሃል፤ የሚሸሽህም ይሸሽሃል። በእራስህ ላይ መስራትህ፣ ጠንካራውን አንተ መፍጠርህ ያስከብረሃል፣ ያስወድድሃል። ተፈላጊነትን፣ ተወዳጅነትን ፍለጋ ማስመሰልህና ማሽቃበጥህ ግን ዋጋ ያስከፍልሃል፤ እያሳሳቀ አጉል ቦታ ይጥልሃል። የተገነባ ህንፃ ውስጥ ሄዶ መጠለል ለጊዜው ቀላል ሊሆን ይችላል፤ ህንፃው የፈረሰ እለት ወይም ባለቤቱ ያባረረ እለት ግን ማረፊያም ይጠፋል፣ መጠለያም ይናፍቃል። የሌሎች ህንፃ ማድመቂያ፣ ማሳመሪያ መሆን አይጠቅምህም፤ በጊዜ የእራስህን ህንፃ ገንባ፣ የእራስህን ተወዳጅ ማንነት ፍጠር፣ ተፈላጊ ስብዕናን ገንባ። የእራስህን መታወቂያ አዘጋጅ፤ የእራስህን ድንቅ ማንነት አሳይ፤ ማንንም ሳትጠብቅ በእራስህ ጎልተህ መታየቱን እወቅበት፤ ተፈላጊነትህን ለእራስህም አስመስክር።
Join

@yefiker_gojo