2022-04-20 15:42:18
የሐዘን ጥግ
አርብ እለት በቀራንዮ የልጇን ስቃይ እያየች
እመአምላክ እመብርሐን አያዝኑ ሀዘን አዘነች
ከደምፀ ይባቤ
እኽኽኽ....
ሚወዱትን ማጣት
በአፍቃሪ መከዳት
እህል በሞላበት በረሐብ መቀጣት
የናት አባት ውርስን መዘረፍ መቀማት
ታዲያ የትኛው ነው
አንጀት የሚበላው አጥንት የሚሰብረው
የመረረ ሀዘን ከናት ሞት ሚብሰው
ሁሉን አይቻለሁ ሁሉን አዝኛለው
የሀዘናትን ጥግ ገደፉን አውቃለው
ምን እንኳ ብከፋ ሐዘንተኛ ብሆን
እንዳዛኝቷ እናት አንደ ማርያም አልሆን
የሳ እኮ ልዩ ነው ሀዘኗ መራራ
ከልጇ ደም እኩል እንባዋ የተዘራ
እርግጥ ነው
ሀዘኑ ይከብዳል ስትሞት እናት አለም
ልክ ነው ይጎዳል ሲሞት አባት አለም
ቢሆንም ቢሆንም ሀዘኑ ቢከብድም
ምንም ካልበደለ ከልጅ ሞት ጋራ እኩል አይወዳደርም
ወልዳ እንደታቀፈች በህቱም ድንግልና
ሀዘኗ ጀመረ ሳለች ብላቴና
ሰይፍ እንደሚያልፍባት ትንቢቱ ሲነገር
ጴጥሮስ ሆይ ንገረኝ ሀዘኗ እንዴት ነበር
አርብ እለት በቀራንዮ የልጇን ስቃይ እያየች
እመአምላክ እመብርሐን አያዝኑ ሀዘን አዘነች
እረ ሌላም አለ...
ለ3 ቀን ቢለያት አንጀቷ የቆሠለ
ቀራንዮ ሲውል ልቧ እንዴት ቻለ
ታድያ እንዴት አታልቅስ እንዴት አታነባ
ልጇን ገድለውባት ቆጥረው እንደሌባ
ፀናባት መከራ በዛባት ሀዘን
ደስተኛይቱ እናት እመብርሃን
ሲገረፍ ስታየው ሲቆጠር አጥንቱ
መቋቋም አቅቷት አነባች በብርቱ
አንድ አምላክ ሲቀበል ያንን ሁሉ ስቃይ
እንኳንስ እናቱ ፀልማለች ፀሀይ
ሌንጊኖስ ሲወጋው ጎኑን በዚያ ጦር
መልሷ ምን ነበረ ከመስቀሉ ስር
በዚም አላበቃ
ዮሴፍ ኒቆዲሞስ ሲቀብሩት ልጇን
መፅናናት አቃታት በልጇ ሀዘን
አንድ ልጅን ማጣት ያውም ያልበደለ
ታዲያ ከዚህ ወዲያ ሀዘን ወዴት አለ።
እኽኽኽ....
አርብ እለት በቀራንዮ የልጇን ስቃይ እያየች
እመአምላክ እመብርሐን አያዝኑ ሀዘን አዘነች
ስንት እንባ ስንትስ ለቅሶ ስንት ዋይታ ስንት ሺ እሪታ
ስንት ነው የማርያም ሀዘን አርብ ለት በጎለጎታ
ምንድነው ሚዛኑ ልኩ ንገረኝ ቅዱስ ዮሐንስ
ስንት ሺ እንባ ፈሰሳት ሲሰቀል ልጇ ክርስቶስ
ስታውቀው የልጇን ነገር አድጎ በእቅፏ
ንፁሑን የአብራኳን ክፋይ በፊቷ እንዲያ ሲገፋ
አይዞሽ ባይ አጀብ ቢከባት ከሐዘኗ በልጦ የሚያፅናናት ጠፋ
አርብ እለት በቀራንዮ የልጇን ስቃይ እያየች
እመአምላክ እመብርሐን አያዝኑ ሀዘን አዘነች፨
የግጥም አለም
የግጥም አለም
የግጥም አለም
@abugidaaaaaaa
@abugidaaaaaaa
@abugidaaaaaaa
3.7K viewsአቡጊዳ, 12:42