2022-06-02 11:15:27
#ዕርገቱን_ሳስብ
....ሀዘንና፣ደስታ ፍርኃትና፣ብርታት መለየትና፣ ሙላት ለምን ይደባለቁብኛል?....
ከደቀመዛሙርቱ ጋ በመንፈስ ወደ ቢታንያ ይዞኝ እንዲወጣ እመኛለሁ፤ ሲባርከኝም ዝቅ ብዬ ቡራኬውን መቀበል እሻለሁ፤
ግን ደግሞ
እየባረከኝ ከቆምኩበት ስፍራ ከፍ ከፍ ሲል ጥሎኝ እንደሄደና እንደተለየኝ የሚያሳስብ ጭላንጭል ዕሳቤ ይመጣብኝና ጥቂት እተክዛለሁ ዕንባዬን መቆጣጠር ይሳነኛል፤
ኢየሱስ ክርስቶስ ተለይቶኝ ከፍ ከፍ እንዳለ እስከ ዓለም ፍጻሜ ካንተጋር ነኝ ያለኝ ዛሬ ግን እንደተወኝ በልቡናዬ ይመላለሳል እንደ ደቀመዛሙርቱ ፍርኃት፣ብቸኝነት፣የሁኔታዎች ጣዕም አልባነት በውስጠቴ ይራወጣል "ኢይደንግጽክሙ ልብክሙ(
ልባችሁ አይታወክ፤ በእግዚአብሔር እመኑ፥ በእኔም ደግሞ እመኑ።)
ዮሐንስ 14፥1
"ያለውን ሳሰላስል የወረረኝ ፍርኃት ወደ ኃያል ፍቅር፣ ድንጋጤዬ ወደ መደነቅ፣ ብቸኝነቴ ከሰማያውያን ጋር ወዳጅ ወደ መሆን ይለወጣል።
ቢሆንም ጌታዬ ሲለየኝ እያየሁት ከፍ ከፍ ሲል
ልቦናዬ በመለየት ጦር ይወጋል ኢየሱስን ደመና ሲቀበለው፤
የኔ ፊት ላይ የዕንባ ደመና ያንዣብባል፤
ጥቂት ቆየት ብሎም
“ወላጆች እንደ ሌላቸው ልጆች አልተዋችሁም፤ ወደ እናንተ እመጣለሁ።”ዮሐንስ 14፥18 የሚለው ልቦናን የሚያረጋጋ ኃይለ ቃል ወደ ቀልቤ ይመለሳል በትካዜና በመለየት ሰበብ ያንዣበበው የዕንባዬ ደመና የ አምላኬን ፍቅር እና ርኅራኅኄን
በማሰብ በትኩሱ ዱብ ዱብ ይላል። ፍቅር፣ደስታ፣ሀሴት፣ዕልልታ በነገሰበት ዕለት የኔ ሀዘን፣ፍርኃትና፣
የጥሞና ልቅሶን ሳስብ በራሴ እሳቀቃለሁ እንዴት ነው እንደሌላው ደስ የማይለኝ ብዬ ውሳጤ ህሊናዬን ሳጤነው
እጅግ ከልብ የመነጨ ደስታ እየተደሰትኩ እንደሆነ ይነግረኛል
ጌታዬ ሞትን አሸንፎ፣ ጠላቴን አንበርክኮ፣ የተዋረደውን የኔን ሥጋ ይዞ፣ አዳምና ትውልዱን ሁሉ በመስቀሉ በከፈለው ዋጋ
አድኖ በክብር ወደ ሰማይ እንዳረገ እየተመለከትኩኝ ደስታም በውስጤ እንደመላ ይመልስልኛል እና ታዲያ ዕርገቱን ሳስብ ሀዘንና፣ደስታ ፍርኃትና፣ብርታት መለየትና፣ ሙላት ለምን ይደባለቁብኛል?
“እነሆም፥ አባቴ የሰጠውን ተስፋ እኔ እልክላችኋለሁ፤ እናንተ ግን ከላይ ኃይል እስክትለብሱ ድረስ በኢየሩሳሌም ከተማ ቆዩ።” ሉቃስ 24፥49
የሚለውን ምክሩንና ትዕዛዙን ሳስብ ወደራሴ ተመልሼ በተስፋ
እሞላለሁ እንጂ
አንዳንዴ እኮ ጌታዬ በቢታንያ ወደ ሰማይ ከፍ ከፍ ሲል ሳይ
ከእንግዲ ምን ቀረኝ
ብዬ በሀዘን ተኮራምቼ ወደ ነበርኩበት ዓለም መመለስም እኮ ያምረኛል።
በቃ ከፍ ከፍ ሲል አጠገቤ እንደሌለ አስባለሁ ምሉዕ ነውና በምልአቱ እንዲጎበኘኝም አምናለሁ ደመና እንደተቀበለችው
እኔም ወደ ልቦናዬ ሳተኩር መድኃኔዓለምን በልቤ ውስጥ ተቀምጦ አገኘዋለሁ።
ሀዘኔ ወደ ሀሴት መከፋቴ ወደ መጽናናትና ፍጹም መረጋጋት ሲመለስ ይታወቀኛል።
ዳግም በድዬ ጌታዬን ከልቤ እንዳላጣው ለራሴ ቃል እገባለሁ
ጥቂት ቆይቼ ግን ያው ወደ ከረፋ በደሌ እመለሳለሁ፤
ከበደሌ እንዲያጥበኝ ስለማምን ከኢየሩሳሌም ሳልወጣ
ከፍ ከፍ ካለበት ተራራ ወጥቼ ዳግም ወደ ልቦናዬ እንዲመለስ
ዮሐንስ 16
"⁵ አሁን ግን ወደ ላከኝ እሄዳለሁ ከእናንተም፦ ወዴት ትሄዳለህ? ብሎ የሚጠይቀኝ የለም።
⁶ ነገር ግን ይህን ስለ ተናገርኋችሁ ኀዘን በልባችሁ ሞልቶአል።
⁷ እኔ ግን እውነት እነግራችኋለሁ፤ እኔ እንድሄድ ይሻላችኋል። እኔ ባልሄድ አጽናኙ ወደ እናንተ አይመጣምና፤ እኔ ብሄድ ግን እርሱን እልክላችኋለሁ።"
ባለው መሠረት አጽናኙን እንዲልክልኝ እማጸነዋለሁ።
ዐረገ በስብሐት ስል ድምጸ ልቦናዬን ከፍ አድርጌ እዘምራለሁ።
ግንቦት 25 2014 አዲስ አበባ ኢትዮጵያ
ዐሳቤ ዐሳባችሁ ከሆነ ተጋሩት አጋሩት
እንኳን ለብርሃነ ዕርገቱ በሰላም አደረሳችሁ አደረሰን
Henok kibebew
https://t.me/felege_tibeb
2.4K viewsedited 08:15
አ
