ሥርዓተ ማኅሌት ዘነሐሴ ተክለሃይማኖት 'ነሐሴ ፳፬' ስምዓኒ እግዚኦ ጸሎትየ፡ ሃሌ ሉያ ሃሌ ሉያ | የኦርቶዶክስ አስተምህሮዎች

ሥርዓተ ማኅሌት ዘነሐሴ ተክለሃይማኖት "ነሐሴ ፳፬"

ስምዓኒ እግዚኦ ጸሎትየ፡ ሃሌ ሉያ ሃሌ ሉያ፡
ወይብጻሕ ቅድሜከ ገአርየ፡ ሃሌ ሉያ ሃሌ ሉያ፡
ወኢትሚጥ ገጸከ እምኔየ፡ በዕለተ ምንዳቤየ አጽምእ እዝነከ ኀቤየ፡
ሃሌ ሉያ ሃሌ ሉያ፡ አመ ዕለተ እጼውአከ ፍጡነ ስምዓኒ፡
ሃሌ ሉያ ሃሌ ሉያ፡ ለዓለም ወለዓለመ ዓለም፡
ሃሌ ሉያ ዘውእቱ ብሂል፡
ንወድሶ ለዘሃሎ እግዚአብሔር ልዑል፡
ስቡሕ ወውዱስ ዘሣረረ ኲሎ ዓለመ፡ በአሐቲ ቃል።

መልክዐ ሥላሴ

ሰላም ዕብል ለንዋየ ውስጥ ምሕረትክሙ:
ትሩፋተ ገድል ኲኑኒ ሥላሴ አምጣነ ትሩፋት አንትሙ:
ሶበ ሖርኩሰ ከመ እሳተፍ ገድሎሙ:
ጊዮርጊስ ኢወሀበኒ መጠነ ነጥበ ጠል እምደሙ:
ወተክለሃይማኖት ከልአኒ ስባረ እምዐጽሙ፡፡

ዚቅ

ቅዱስ ቅዱስ ቅዱስ እግዚአብሔር ዘኢይነውም ትጉህ:
በውስተ ቅዱሳን ስቡሕ:
ከመ ቀስተ ደመና የዓውዶ ሱራሄ:
ሎቱ ለባሕቲቱ ይደሉ ስባሔ፡፡

ነግሥ

ሰላም ለዝክረ ስምኪ ዘመንክር ጣዕሙ:
ለወልድኪ አምሳለ ደሙ:
መሠረተ ሕይወት ማርያም ወጥንተ መድኃኒት ዘእምቀዲሙ:
ኪያኪ ሠናይተ ዘፈጠረ ለቤዛ ዓለሙ:
እግዚአብሔር ይትባረክ ወይትአኮት ስሙ፡፡

ዚቅ

አመ ኖኅ ይእቲ መድኃኒት
እንተ ኮነት አንቀጸ ሕይወት:
ማርያም ቅድስት፡፡

ወረብ

ማርያም ቅድስት አንቀጸ ሕይወት
አመ ኖኅ አንቀጸ ሕይወት
ማርያም ቅድስት/፪/ ይእቲ መድኃኒት
"እንተ ኮነት"/፪/አንቀጸ ሕይወት/፪/

መልክዐ ተክለሃይማኖት

ሰላም ለዝክረ ስምከ ዘጥንተ ፊደሉ መስቀል:
ስም ክቡር ወስም ልዑል:
ተክለሃይማኖት ማቴዎስ በዓለ ቀዳማይ ወንጌል:
ከመ እወድሰከ መጠነ አውሥኦተ እክል:
ማዕሠረ ልሳንየ ትፍታሕ ማርያም ድንግል።

ዚቅ

ወንጌለ መለኮት ሰበከ:
ስምዓ ጽድቅ ኮንከ:
ወበእንተዝ ተክለ ሃይማኖት ተሰመይከ፡፡

ወረብ

ወበእንተዝ "ተሰመይከ"/፪/ተክለሃይማኖት/፪/
"ስምዓ ጽድቅ ኮንከ"/፪/ተክለሃይማኖት/፪/

መልክዐ ተክለሃይማኖት

ሰላም ለአዕይንቲከ ዘአርያኣሆን ሐዋዝ:
እለ ጽዱላት እማንቱ ከመ ሠርቀ ቤዝ:
ተክለ ሃይማኖት ኅብአኒ እሞተ ኃጢአት አዚዝ:
ለከሰ አኮ ከመዝ:
ኢይረክበከ ሞት ዳግም እምዝ፡፡

አመላለስ

ዳግም እምዝ/፬/ ኢይረከቦ ሞት ለተክለ ሃይማኖት/፪/

ዓዲ ወረብ

"ዳግም እምዝ"/፪/ኢይረከቦ ከመዝ ሞት ለተክለ ሃይማኖት/፪/ ኢይረከቦ እምዝ ሞት ለተክለሃይማኖት/፪/

መልክዐ ተክለሃይማኖት

ሰላም ለኲልያቲከ ዘፈተኖን በትዕግስት:
ኢየሱስ ክርስቶስ አበ ብርሃናት:
ተክለ ሃይማኖት ሰጋዲ ከመ መላእክት:
ጸሎትከ ዘገበርካሃ እስከነ ኈልቊ ምዕት ዓመት:
መድኃኒተ ትኩነኒ እምግሩም ቅሥት፡፡

ዚቅ

ተክለ ሃይማኖት ሰማዕት ሰባኬ መድኃኒት:
ጸሎትከ ትኩነነ ፀወነ እመንሱት:
ተክለ ሃይማኖት ሰማዕት ሰባኬ መድኃኒት፡፡

ወረብ

ሰማዕት ሰባኬ መድኃኒት ተክለ ሃይማኖት/፪/
ጸሎትከ ትኩነነ "ፀወነ እመንሱት"/፪//፪/

መልክዐ ተክለ ሃይማኖት

ሰላም ለፀዐተ ነፍስከ በስብሐተ አዕላፍ እንግልጋ:
ለዓለም ዛቲ እምግብርናቲሃ ወጹጋ:
ተክለ ሃይማኖት ቶማስ ለመርአስ ዐቃቤ ሕጋ:
ለእለ ገብሩ ተዝካረከ እንዘ ሀለዉ በሥጋ:
ሀቦሙ እግዚእየ ሞገሰ ወጸጋ፡፡

ዚቅ

ወወጽአት መንፈሱ ሶቤሃ:
ወተቀበልዎ መላእክት በስብሐት ወበማኅሌት:
እንዘ ይብሉ ሃሌ ሉያ:
ወአብዕዎ ኢየሩሳሌም ሰማያዊተ፡፡

መልክዐ ተክለ ሃይማኖት

ሰላም ለበድነ ሥጋከ ኤልሳዕ መምህር ዘገነዛ:
በሠናይ ፄና መዓዛ:
ተክለ ሃይማኖት ሰባኪ ፊልጶስ ዘብሔረ ጋዛ:
ለሥጋየ መሬታዊት እመ የኀልቅ እዘዛ:
ስብረተ ዐፅምከ ይኩነኒ ቤዛ፡፡

ዚቅ

ሖረ ኀቤሁ ለተክለ ሃይማኖት ቀዲሙ ሌሊተ:
ኤልሳዕ ስሙ መልአኮሙ ለአርድዕት:
ውእቱኒ አምጽአ ከርቤ አፈዋት:
ገነዝዎ በሰንዱናት ለተክለሃይማኖት።

መልክዐ ተክለሃይማኖት

ሰላም ለግንዘተ ሥጋከ በዘቦቱ ይትመኀፀኑ:
ነገሥተ እስራኤል ኄራን ዘአስተሣነይዎ በበዘመኑ:
ተክለ ሃይማኖት ሠዋዒ ለእግዚአብሔር ካህኑ:
አድኀነኒ እምጸብአ ከይሲ ዘዐሥር ቀርኑ:
ወእምብእሲ ዘክልኤ ልሳኑ፡፡

ዚቅ

መላእክት አእመሩ ሃይማኖተከ:
ነገሥት ሐነፁ መካነከ:
አባ ተክለሃይማኖት ክርስቶስ ዘአፍቀርከ፡፡

መልክዐ ተክለሃይማኖት

ሰላም ለመቃብሪከ እምቅድመ ትኑም ውስቴታ:
ታቦተ ማርያም ድንግል ዘአንበርከ በውሳጢታ:
ተክለሃይማኖት አቡየ ለወልድከ ዕጓለ ማውታ:
ለበረከትከ ይከልለኒ ረድኤታ:
ወይዑደኒ ዘጽድቅከ ወልታ።

ዚቅ

ጸለየ ተክለ ሃይማኖት እንዘ ይብል ኀበ ተቀብረ ሥጋየ
ወተክዕወ ደምየ ህየ ይኩን በረከት፡፡

ወረብ

ጸለየ ተክለ ሃይማኖት እንዘ ይብል ኀበ ተክዕወ ደምየ/፪/
"ህየ ይኩን"/፪/በረከት/፪/

አንገርጋሪ

ሞቶሙሰ ለጻድቃን ሕይወቶሙ ውእቱ
እስመ ለጻድቅ ይትሌዓል ቀርኑ በክብር
ጻድቃን እለ አስመርዎ ለእግዚኦሙ
ምድረ ብርህተ ወጽዱተ ይወርሱ፡፡

አመላለስ፦

ገነተ ትፍሥሕት ኪያሃ አውረሶሙ
ወአቀቦሙ ከመ ብንተ ዐይን ለጻድቃን/2/
እለ ሎቱ ተቀንዩ በሕይወቶሙ/4/

ወረብ፦

አሜሃ ይቤሎ"እለ በየማኑ"/2/ /2/
ንዑ ለአቡየ ቡሩካኑ ለአቡየ ንዑ/2/

እስመ ለዓለም

ደሪዖሙ ተአጊሦሙ: መጠዉ ነፍሶሙ ለሞት:
እለ ሎቱ ተቀንዩ በሕወቶሙ:
እምፀሐይ ይበርህ ገጾሙ:
እለ አጥረይዋ ለትዕግስት:
እለ...: እፎ አምሰጥዎ ለመድብብ ከመ ይባዕዎ ለመርኀብ:
እለ...: ዕፎ አመሠጥዎ ለሞት: ዓደዉ እሞት ውስተ ሕይወት:
እለ...: እለ ጸውዖሙ ወይቤሎሙ: ንዑ ለአቡየ ቡሩካኑ:
እለ...: አመ ያቀውም አባግዐ በየማኑ: ወአጣሌ በጸጋሙ:
እለ...: አሜሃ ይቤሎሙ ለእለ በየማኑ: ንዑ ለአቡየ ቡሩካኑ: እለ...:ወያወርሶሙ ምድረ ሐዳሰ: እንተ ታውኀዝ ሀሊበ ወመዓረ: እለ...:ገነት ትፍሥሕት ኪያሃ አውረሶሙ ወዓቀቦሙ ከመ ብንተ ዓይን ለጻድቃን:
እለ ሎቱ ተቀንዩ በሕይወቶሙ፡፡

@Ethiopian_Orthodox
@Ethiopian_Orthodox