2022-08-21 18:55:50
#ሥርዓተ_ማኅሌት_ዘነሐሴ_16_በዓለ_ቅድስት_ኪዳነምህረት
✥✥✥ #ሥርዓተ_ነግሥ ✥✥✥
ስምዓኒ እግዚኦ ጸሎትየ ሃሌ ሉያ፤ ሃሌ ሉያ ወይብጻሕ ቅድሜከ ገዓርየ ሃሌ ሉያ፤ ሃሌ ሉያ ወኢትሚጥ ገፀከ እምኔየ፤ በዕለተ ምንዳቤየ አጽምእ ዕዝነከ ኀቤየ ሃሌ ሉያ፤ ሃሌ ሉያ አመ ዕለተ እጼውአከ ፍጡነ ስምዓኒ ሃሌ ሉያ፤ ሃሌ ሉያ ለዓለም ወለዓለመ ዓለም፤ ሃሌ ሉያ ዘውእቱ ብሂል፤ ንወድሶ ለዘሃሎ እግዚአብሔር ልዑል፤ ስቡሕ ወውዱስ ዘሣረረ ኲሎ ዓለመ፤ በአሐቲ ቃል።
✥✥✥ #መልክአ_ሥላሴ ✥✥✥
ሰላም ለኲልያቲክሙ እለ ዕሩያን በአካል ፤
ዓለመክሙ ሥላሴ አመ ሐወጸ በሣሕል ፤ እምኔክሙ አሐዱ እግዚአብሔር ቃል ፤
ተፈጸመ ተስፋ አበው በማርያም ድንግል ፤
ወበቀራንዮ ተተክለ መድኃኒት መስቀል።
✥✥✥ #ዚቅ ✥✥✥
ወታስተሥርዩ ኃጥያተ ህዝብኪ ተበውሐ ለኪ ፤
እም አብ ወወልድ ወመንፈስ ቅዱስ ፤
ከመ ትኲኒ ተንከተመ ለውሉደ ሰብእ ፤
ለሕይወት ዘለዓለም ፤
ለኪ ይደሉ ከመ ትኵኒ መድኀኒቶሙ ለመሐይምናን ሕዝብኪ ፤
ኦ መድኃኒተ ኩሉ ዓለም ወልድኪ ሣህሎ ይክፍለነ ሰዓሊ ለነ ቅድስት።
✥✥✥ #ነግሥ ✥✥✥
እምጌቴሴማኒ ፈለሰት ኀበ ዘሉዓሌ መካን ፤
ውስተ ቤተ መቅደስ ረባቢ ዘመሳከዊሁ ብርሃን ፤
አንቀጸ አድኅኖ ማርያም ጽላተ ኪዳን ፤
ኵሉ ይብልዋ በአኅብሮ ዘበዕብራይስጢ ልሳን ፤
ዕፀ ጳጦስ ይዕቲ እንተ በአማን ቅድስተ ቅዱሳን ፤
እመቅድሐ ከርሣ ተቀድሐ አስራባተ ወይን ወውስቴታ ተሠርዓ ቁርባን።
✥✥✥ #ዚቅ ✥✥✥
ዕፀ ጳጦስ እንተ በአማን መዝገቡ ለቃል ፤
ዕፀ ጳጦስ እንተ በአማን አንቀጸ ብርሃን ፤
ዕፀ ጳጦስ እንተ በአማን ጽጌ ደንጉላት ፤
ሐረገ ወይን ዘእምነገደ ይሁዳ ፤
እንተ ሠረፀት ለሕይወት።
✥✥✥ #መልክአ_ኪዳነምህረት ✥✥✥
ሰላም ለፍልሰተ ሥጋኪ ኀበ ሕንጻ ሕይወት ዘተሐደሰ ፤
እምቅድመ ዝኒ ኀቤሁ ሥጋ ወልድኪ ፈለሰ ፤
ቤዛዊተ ዓለም ማርያም አስተበቁዓኪ አንሰ ፤
ትቤዝዊ በኪዳንኪ ዘዚዓየ ነፍሰ ፤
እስመ በሥራያ ይዕቲ ቀብዓተኒ ፈውሰ።
✥✥✥ #ዚቅ ✥✥✥
ደብተራ ፍጽምት ዘጳዉሊ ፤
ወማኅደሩ በጽድቅ ዘገብራ ከሃሊ ፤
ፈለሰት እምዘይበሊ ኀበ ኢይበሊ ፤
በመሰንቆሁ እንዘ የኃሊ ፤
ዳዊት አቡሃ ዘወልዳ ወዓሊ።
✥✥✥ #ወረብ ✥✥✥
ደብተራ ፍጽምት ዘጳዉሊ ፈለሰት እምዘይበሊ ኀበ ኢይበሊ/፪/
በመሰንቆሁ እንዘ የኃሊ ዳዊት አቡሃ ዘወልዳ ወዓሊ/፪/
✥✥✥ #መልክአ_ማርያም ✥✥✥
ሰላም ሰላም ለዝክረ ስምኪ ሐዋዝ ፣
እምነ ከልበኔ ወቊስጥ ወእምነ ሰንበልት ምዑዝ ፣
ማርያም ድንግል ለባሲተ ዓቢይ ትዕዛዝ ፣
ይስቅየኒ ለለጽባሑ ወይነ ፍቅርኪ አዚዝ ፣
ከመ ይሰቅዮ ውኂዝ ለሠናይ አርዝ።
✥✥✥ #ዚቅ ✥✥✥
ሰላም ለኪ ማርያም እመ አምላክ ፤
ወልድኪ ይጼዉዓኪ፤
ውስተ ሕይወት ወመንግሥተ ክብር።
✥✥✥ #ወረብ ✥✥✥
ሰላም ለኪ ማርያም እመ አምላክ ማኅደረ መለኮት/፪/
"ወልድኪ"/፪/ይጼዉዓኪ ውስተ ሕይወት ወመንግሥተ ክብር/፪/
✥✥✥ #መልክዓ ማርያም ✥✥✥
ሰላም ለእስትፋስኪ ዘመዓዛሁ ሕይወት ፤
ከመ መዓዛ ዕፀ ኅሩይ ዘውስተ ገነት ፤
ማርያም ድንግል ቤተ ቅድሳት ፤
ጽንሕኒ ውስተ ሠናይ ወሰውርኒ እሞት ፤
በአክናፍኪ ርግብየ ኅሪት።
✥✥✥ #ዚቅ ✥✥✥
ንዒ ኀቤየ እንቲአየ ሠናይት ርግብየ ፤
መዓዛ አፉሃ ከመ ኮል ፤
ወኵሉ ነገራ በሰላም።
✥✥✥ #ወረብ ✥✥✥
ንዒ ኀቤየ እንቲአየ ሠናይት ርግብየ/፪/
መዓዛ አፉሃ ከመ ኮል/፬/
✥✥✥ #መልክአ_ፍልሰታ ✥✥✥
ሰላም ለፍልሰተ ሥጋኪ ዘኢይቀብል ሞገሱ ፤
ወዘኢይነጸፍ ባሕርየ ተውዳሱ ፤
ማርያም ታዕካ ለእግዚአብሔር ጽርሐ መቅደሱ ፤
ተበሃሉ በሰማያት እለ ኪያኪ አፍለሱ ፤
ማርያምሰ በምድር ታንሶሱ።
✥✥✥ #ዚቅ ✥✥✥
ማርያም ጽርሕ ንጽሕት ፤
ማሕደረ መለኮት ፤
እኅቶሙ ለመላእክት ሰመያ ፤
ሰማያዊት እንተ በምድር ታንሶሱ።
✥✥✥ #አመላለስ ✥✥✥
ማርያም ጽርሕ ንጽሕት/፪/
ጽርሕ ንጽሕት ማሕደረ መለኮት/፪/
✥✥✥ #ምልጣን ✥✥✥
ትርሢተ ወልድ መለኮት ወፍቅር ፤
ኀደረ ላዕሌሃ ፤ይቤላ ርግብየ ወይቤላ ሠናይትየ፤
ፀቃውዕ ይውኅዝ እምከናፍሪሃ ።
✥✥✥ #አመላለስ ✥✥✥
ፀቃውዕ ይውኅዝ/፪/
ይውኅዝ እምከናፍሪሃ/፬/
✥✥✥ #ወረብ ✥✥✥
ትርሢተ ወልድ መለኮት ወፍቅር ኀደረ ላዕሌሃ/፪/
ይቤላ ርግብየ ወይቤላ ሠናይትየ/፪/
✥✥✥ #እስመ_ለዓለም ✥✥✥
በአልባሰ ወርቅ ዑፅፍት ወኁብርት ፤
እኅትየ መርዓት አዳም አጥባትኪ እምወይን ፤
መዓዛ ዕፍረትኪ እምኲሉ አፈው ፤
እትፌሳሕ ወእትሐሠይ ብኪ ፤
ናፍቅር አጥባትኪ እምወይን ፤
ርቱዕ አፍቅሮትኪ ኵለንታኪ ሠናይት እንተ እምኃቤየ ፤
ማ፦ አልብኪ ነውር ወኢምንትኒ በላዕሌኪ ፤
ፃኢ እምሊባኖስ እኅትየ መርዓት።
✥✥✥ #አመላለስ ✥✥✥
አልብኪ ነውር ወኢምንትኒ በላዕሌኪ/፪/
ፃኢ እምሊባኖስ እኅትየ መርዓት/፬/
✥✥✥ #ወረብ ✥✥✥
"በአልባሰ ወርቅ"/፪/ዑፅፍት ወኁብርት/፪/
እኅትየ መርዓት አዳም አጥባትኪ/፪/
✥✥✥ #ሰላም ✥✥✥
ንዒ ኀቤየ እንቲአየ ሠናይት ርግብየ ፤
መዓዛ አፉሃ ከመ ኮል ፤
ወኵሉ ነገራ በሰላም።
218 viewsfre የበዓታ, 15:55