2022-06-27 19:07:57
ሥርዓተ ማኅሌት ዘሰኔ ሕንፀተ ቤታ "ሰኔ ፳፩"
ስምዓኒ እግዚኦ ጸሎትየ፡ ሃሌ ሉያ ሃሌ ሉያ፡
ወይብጻሕ ቅድሜከ ገአርየ፡ ሃሌ ሉያ ሃሌ ሉያ፡
ወኢትሚጥ ገጸከ እምኔየ፡
በዕለተ ምንዳቤየ አጽምእ እዝነከ ኀቤየ፡
ሃሌ ሉያ ሃሌ ሉያ፡ አመ ዕለተ እጼውአከ ፍጡነ ስምዓኒ፡
ሃሌ ሉያ ሃሌ ሉያ፡ ለዓለም ወለዓለመ ዓለም፡
ሃሌ ሉያ ዘውእቱ ብሂል፡
ንወድሶ ለዘሃሎ እግዚአብሔር ልዑል፡
ስቡሕ ወውዱስ ዘሣረረ ኲሎ ዓለመ፡ በአሐቲ ቃል።
መልክዐ ሥላሴ
ሰላም ለኲልያቲክሙ እለ ዕሩያን በአካል:
ዓለመክሙ ሥላሴ አመ ሐወጸ በሣኅል:
እምኔክሙ አሐዱ እግዚአብሔር ቃል:
ተፈጸመ ተስፋ አበው በማርያም ድንግል:
ወበቀራንዮ ተተክለ መድኃኒት መስቀል።
ዚቅ
በዕንቊ ሰንፔር ትትሐነጽ ወበመረግድ:
ሃሌ ሉያ ለአብ: ሐጹር የዓውዳ:
ትበርህ እምከዋክብት:
ሃሌ ሉያ ለወልድ: ሃሌ ሉያ ወለመንፈስ ቅዱስ:
ጽዮን ቅድስት ቤተክርስቲያን: ደብተራ ፍጽምት።
ነግሥ
ሰላም ለዝክረ ስምኪ ዘመንክር ጣዕሙ:
ለወልድኪ አምሳለ ደሙ:
መሠረተ ሕይወት ማርያም ወጥንተ መድኃኒት ዘእምቀዲሙ:
ኪያኪ ሠናይተ ዘፈጠረ ለቤዛ ዓለሙ:
እግዚአብሔር ይትባረክ ወይትአኮት ስሙ።
ዚቅ
እግዚአብሔር ውእቱ ብርሃንኪ ለዓለም:
ወመሠረትኪ ለትውልደ ትውልድ:
ኢየኀልቅ ብዝኃ ሰላምኪ:
ወነገሥት ይትቀነዩ ለኪ:
ያመጽኡ አምኃኪ እምርኁቅ ብሔር።
ወረብ
እግዚአብሔር ውእቱ ብርሃንኪ ለዓለም እግዚአብሔር/፪/
"ወመሠረትኪ"/፪/ እግዚአብሔር/፪/
መልክዐ ማርያም
ሰላም ሰላም ለዝክረ ስምኪ ሐዋዝ:
እምነ ከልበኔ ወቊስጥ ወእምነ ሰንበልት ምዑዝ:
ማርያም ድንግል ለባሲተ ዓቢይ ትዕዛዝ:
ይስቅየኒ ለለጽባሑ ወይነ ፍቅርኪ አዚዝ:
ከመ ይሰቅዮ ውኂዝ ለሠናይ አርዝ።
ዚቅ
በሐ በልዋ ተሳለምዋ:
ዕግትዋ ለጽዮን ወሕቀፍዋ:
ደዩ ልበክሙ ውስተ ኃይላ:
እንተ ተሐንጸት በስሙ:
ወተቀደሰት በደሙ:
ወተአትበት በዕጸ መስቀሉ:
ጌሡ ኃቤሃ እስመ ሃይለ እግዚአብሔር ላዕሌሃ።
ወረብ
"በሐ በልዋ"/፪/ ተሳለምዋ/፪/
ዕግትዋ ለጽዮን ወሕቀፍዋ ደዩ ልበክሙ ውስተ ሃይላ ለቤተክርስቲያን/፪/
መልክዐ ማርያም
ሰላም ለሥዕርተ ርእስኪ ዘተንዕደ ጽፍሮሁ:
ለአቡኪ በከናፍሪሁ:
ማርያም ድንግል ለእግዚአብሔር ጽርሑ:
ለገብርኪ እግዝእትየ እትኅድግኒ እላሁ:
ከመ ኢይበሉኒ ፀር አይቴኑመ ምክሁ።
ዚቅ
ወሀለወት አሐቲ ድንግል ጽርሐ ቅድሳቱ ይእቲ ለልዑል:
መዓዛ አፉሃ ከመ ኮል:
ወሥዕርታ ሜላት ፍቱል:
ወዲበ ርእሳኒ አክሊል በትእምርተ መስቀል።
ወረብ
ወሀለወት አሐቲ "ድንግል"/፪/ አሐቲ ድንግል/፪/
መዓዛ አፉሃ ከመ ኮል/፬/
መልክዐ ማርያም
ሰላም ለእስትንፋስኪ ዘመዓዛሁ ሕይወት:
ከመ መዓዛ ዕፅ ኅሩይ ዘውስተ ገነት:
ማርያም ድንግል ቤተ ቅድሳት:
ጽንሕኒ ውስተ ሠናይ ወሰውርኒ እሞት:
በአክናፍኪ ርግብየ ኅሪት።
ዚቅ
ገነይነ ለኪ ኦ ወለተ ዳዊት:
ጽርሐ ቅድሳቱ ለወልድ:
ዘወርቅ ማኅፈድ:
ወሡራሬሃ ዘመረግድ።
ወረብ
"ጽርሐ ቅድሳቱ ማርያም"/፪/ ዘወርቅ ማኅፈድ/፪/
ወሡራሬሃ ዘመረግድ ዘወርቅ ማኅፈድ/፪/
መልክዐ ማርያም
ሰላም ለገቦኪ ዘሐመልማለ ወርቅ ክዳኑ:
በከመ ዳዊት ይዜኑ:
ማርያም ድንግል ለያዕቆብ ሞገሰ ስኑ:
በልኒ እግዝእትየ አፈቅረከ አኮኑ:
እንዘ ረዳኢትከ አነ ዘይክለከ መኑ።
ዚቅ
ሃሌ ሃሌ ሉያ አዳም ሕንፄሃ:
ሐመልማለ ወርቅ ገበዋቲሃ:
ጽዮንሃ አምኁ ኪያሃ።
ወረብ
ሕንፄሃ "አዳም"/፪/ ሕንፄሃ ለቤተክርስቲያን/፪/
"ሐመልማለ ወርቅ"/፪/ ገበዋቲሃ ሐመልማለ ወርቅ/፪/
መልክዐ ማርያም
ሰላም ለማኅጸንኪ ለእግዚአብሔር ማኅፈዱ:
ዘሐነጸኪ የማነ ዕዱ:
ማርያም ድንግል ምዕዝት ዘእምናርዱ:
ኀቤኪ ያንቀዓዱ ለረኪበ ኲሉ መፍቅዱ:
ምስለ ካልኡ ዓይንየ አሐዱ።
ዚቅ
ሃሌ ሃሌ ሉያ: ለቤተክርስቲያን ልዑል ሐነፃ:
በጽድቁ ሐወፃ:
እምነ ፀሐይ ይበርህ ገፃ።
ወረብ
ሃሌ ሃሌ ሉያ ለቤተክርስቲያን/፪/
ሐነፃ ልዑል ለቤተክርስቲያን/፪/
መልክዐ ማርያም
በዝንቱ ቃለ ማኅሌት ወበዝንቱ ይባቤ:
ለዘይስዕለኪ ብእሲ ጊዜ ረከቦ ምንዳቤ:
ብጽሒ ፍጡነ ትሰጠዊዮ ዘይቤ:
ማርያም ዕንቊየ ክርስቲሎቤ
ወምዕዝተ ምግባር እምከርቤ:
ዘጸገየ ማኅጸንኪ አፈወ ነባቤ።
ዚቅ
ኢይትአጸው አናቅጽኪ:
ክቡራት ዕንቊ መሠረትኪ:
ሠናይት ሰላማዊት:
እንተ ናፈቅራ በጽድቅ:
መዓዛ አፉሃ ከመ ኮል።
ወረብ
ኢይትአጸው አናቅጽኪ ክቡራት ዕንቊ መሠረትኪ/፪/
ሠናይት ሰላማዊት "እንተ ናፈቅራ"/፪/ በጽድቅ/፪/
ማኅሌተ ጽጌ
በሠላስ አዕባን ገጸ ሥላሴሁ ለአምሮ:
ሐኒጾ ቤትኪ ድንግል ድኅረ ፈጸመ ሣርሮ:
አመ ወረደ ለበዓል ምስሌኪ በአማኅብሮ:
እንዘ ይብል ቃለ ለዘምሮ ልዑል ቀደሰ ማኅደሮ:
ደናግል ለጽጌኪ ዘበጣ ከበሮ።
ዚቅ
በሥላሴሁ ሐነጸ ጥቅማ:
ቤተ ማርያም ሰመየ ስማ:
በሥላሴሁ ሐነጸ ጥቅማ።
ወረብ
በሥላሴሁ "ሐነጸ"/፪/ ጥቅማ ለማርያም/፪/
ሰመየ ስማ ቤተ ማርያም/፪/
ምልጣን
ተቀደሲ ወንስዒ ሃይለ ኦ ቤተ እግዚአብሔር:
እስመ ናሁ ንጉሥኪ በጽሐ ዘያበርህ ለኪ በሃይሉ:
ለዛቲ ቤት ሣረራ አብ ቀዲሙ ለዛቲ ቤት:
ሐነጻ ወልድ ለዛቲ ቤት:
ወፈጸማ መንፈስ ቅዱስ።
እስመ ለዓለም
አመ ትትሐነጽ ኢየሩሳሌም:
በዕንቊ ሰንፔር ወበከርከዴን በዕንቊ ክቡር:
ዓረፋቲሃኒ ወማኅፈዲሃኒ በወርቅ ንጹሕ:
ወመርህባሰ ለኢየሩሳሌም ዘቢረሌ:
በዕንቊ አጶሮግዮን ወበዕንቊ ሦፎር ትትገበር:
እንዘ ይብሉ በኲሉ ፍናዊሃ ሃሌ ሉያ:
ይሴብሕዎ እንዘ ይብሉ:
ይትባረክ እግዚአብሔር ዘአልዓላ ለጽዮን እምኲሉ ዓለማት።
69 views16:07
ማ
