2022-06-06 09:16:41
መስተ ውበት
maddbn እጅጉ
ቀጭን ለግላጋ ..... ..እርጥብ ቄጤማ። ቅጥነቷ ደስ የሚል ቁመቷም የሰጠ....ደም ግባታም የሆነች ቆንጆ ናት። ሞቫይሉ ላይ የሞላው የእሷ ምስልና ቪዲዮ ነው። አሁንም አሁንም እየመራረጠ ያሳየኛል በፍለጋው መሀል ያዳንቃል በተኛበት ሆኖ እያፏጨ ምስሏን 'ቀረብ ረብ' አርጎ ያየውና፤ በእግሩ አየር ላይ እንደመሮጥ አይነት በፍጥነት አወራጭቶ ከብለል ይላል። እንሳሳቃለን በሁኔታው።
"እየው በናትህ!" ብሎ ፊቴ ላይ ደቀነው የከፈተውን ቪዲዮ። ከአገጬ ወደ ደረቴ ጠጋ አድርጌ ማየት ጀመርኩ... ታምራለች ስትደንስ የቡጊ ውጊ ሴት አማልክት ትመስላለች።
አንገቷ ላይ በሀብል ያንጠለጠለችው ከዚህ በፊት አይቸው የማላውቀው ጠልሰም ቢጤ አብሯት እየተወዛወዘ ዳንሷን ያዳምቃል። የሆነ ነገር እንድጠረጥር ፮ተኛው ስሜቴ ሹክ ብሎኝ አለፈ....። እየዘፈነች ሌላ ቪዲዮ አሳየኝ፤ ያምራል ድምጿ ለጉድ!! ጉሮሮዋ ንፁህ ነው ድምጿ ከምንም ሳይላተም ምንም ሳይንገጫገጭ እንደ እንባ ኩልልል ብሎ ይወርዳል። ያለ ማጋነን በዚህ መረዋ ክርስትናን ብትሰብከው ዲያቢሎስ ጌታን ይቀበላል። እቺ ገነት ገብታ ሁሉ እንጆሪ ለመልቀም ቅርጫቷን ይዛ በዱር በጫካው በአትክልት ቦታው እየዞረች ብትዘምር አንበሳው " ነይ እኔን ጋልቢኝ !" ንስሩ "ተይው እሱን ጎፈሬው ቀምሎዋል ነይ እኔ ይዤሽ ልብረር ...?" እያሏት ሲፎካከሩ ቆማ እያየች ሳታስበው ቅርጫቷ በየፍራፍሬው ተሞልቶ፤ የመላእክት አለቃ ቅዱስ ሚካኤል "እነሆኝ እመቤቴ ሆይ እኛ ለቅመንልሻል" ብሎ ዘወር ሲል፤ አሻግራ ስታይ ሁሉም መላዕክት ከአንገቱ ሰበር ብሎ እጅ ይነሳል። " ያ አንተ ያለህ ገብሬል ሰይፋን የት ጣለው ባክህ?" ነብሮች ያንሾካሽካሉ..........።
ለምን የ፩ሚሊዮን ሴት ውበት ባከነባት፤ ወይስ አካብደናት ነው? ራሴን ጠየኩኝ። እንከን ስፈልግባት ፊቷ ማንኪያ ቢጤ ነው በደንብ ያልተለመጠ አፍንጫዋ አከባቢ ከላይኛው ከንፈሯ እስከ ስረኛው አይኗ ሩብ ጉዳይ ሰመጥ ይላል ፊቷ ሰመጥ እንኳን ይበዛል ትን...ሽ ትንሽ በጣም ገባ ብሎዋል ቢሆንም ልንቀበለው አንፈልግም ያን እንከን። ለምን ? ለምን ጉድለቷ ላይ ደበዘዘብን አይናችን? <አስማት ይሆን እንዴ?>
"ይሄ ምንድነው?" አልኩት አንገቷ ላይ ያለውን ነገር።
"የቱ?" አለ ቆጣ ብሎ አቃቂር ሳወጣ እንደቆየሁ ገብቶታል።
"ይሄ ነዋ አንገቷ ላይ ያለው መስተ ውበት ነው?" እንዳይናደድ ሳቅ ብዬ።
"መስተ ውበት ደግሞ ምንድነው?"
"እንደ መስተ ፋቅር ነዋ"
"መስተ ውበት ሚባል ነገር የለም ባክህ ምንድን ምትዘባርቀው"
"ነው እንጂ ለሁሉም በጣም ቆንጆ ሆና እንድትታይ የሚያደርግ"
"ኦ ሰውዬ አትበድብኝ እዛው ሂደህ ተፈላሰፍ መስተ ውበት ይላል እንዴ ግም"
"ካ ካ ካ" አልቻልኩም ሳቅሁ። "ምንድን የሚያናድድህ ደሞ ልትደበድበኝ ነው እንዴ?"
እጁን አወራጨና "ኤጭ ወደዛ በል ባክህ" አለ።
" ጥናዣም ስትፈልግ በሻይ ብላት " አልኩ የምር ተናድጄ።
መጨቃጨቁ ስለማያዛልቀን ትቼው ማሰላሰል ጀመርኩ <እውነት ቆይ እንደ መስተ ፋቅር መስተ ውበት ቢኖርስ?> <ያ ለመወደድ ወይም መወደጃ ነው ይሄ ደግሞ ውብ ሆኖ መታያ በመልክ ብቻ መማረኪያ ከፍቅር ውጪ .... ግን ይቀራረባሉ መስተ ውበት የአይን ፍቅር ጋ ግንኙነት አለው ኮ....> <በቃ አንድም ሁለትም ናቸው ።> እንዲህ እያልኩ ከራሴ ጋር ብዙ ዘባረቅኩ፤ እውነት ግን መስተ ውበት ሚባል የለም እንዴ ? ካለ አለ ከሌለም እንደ ደብተራ መድገም ባልችልም እነሆ የአዲስ ድግምት ሀሳብ ባለቤት ነኝ።
\\
maddbn
፳፩ ታህሳስ ፪፻፲፫
57 views🇲 🇦 🇩 🇩 🇧 🇳 . E . Q ., 06:16