★ @zemarian ★ #ሰላም_የእግዚአብሔር_ቤተሰቦች_ስርአተ_ማህሌቱ_መርሀ_ግብር 01/09/2011 ሥርዓተ ማኅሌት ዘግንቦት ልደታ ለማርያም "ግንቦት ፩" የማንኛውም ወርኃ በዓልና ክብረ በዓል ሥርዓተ ማኅሌት መጀመሪያ "ሥርዓተ ነግሥ" ስምዓኒ እግዚኦ ጸሎትየ፡ ሃሌ ሉያ ሃሌ ሉያ፡ ወይብጻሕ ቅድሜከ ገዓርየ፡ ሃሌ ሉያ ሃሌ ሉያ፡ ወኢትሚጥ ገፀከ እምኔየ፡ በዕለተ ምንዳቤየ አጽምእ ዕዝነከ ኃቤየ፡ ሃሌ ሉያ ሃሌ ሉያ፡ አመ ዕለተ እጼውአከ ፍጡነ ስምዓኒ፡ ሃሌ ሉያ ሃሌ ሉያ፡ ለዓለም ወለዓለመ ዓለም፡ ሃሌ ሉያ ዘውእቱ ብሂል፡ ንወድሶ ለዘሃሎ እግዚአብሔር ልዑል፡ ስቡሕ ወውዱስ ዘሣረረ ኲሎ ዓለመ፡ በአሐቲ ቃል። መልክዐ ሥላሴ ሰላም ለኲልያቲክሙ እለ ዕሩያን በአካል። ዓለመክሙ ሥላሴ አመ ሐወጸ በሣሕል። እምኔክሙ አሐዱ እግዚአብሔር ቃል። ተፈጸመ ተስፋ አበው #በማርያም_ድንግል። ወበቀራንዮ ተተክለ መድኃኒት መስቀል። ዚቅ #ለማርያም ዘምሩ: #ለማርያም ዘምሩ: መስቀሎ ለወልድ እንዘ ትጸውሩ። ነግሥ ሰላም ለልሣንከ መዝሙረ ቅዳሴ ዘነበልባል። ወለድምጸ ቃልከ ሐዋዝ ቀርነ መንግሥቱ ለቃል። ሞገሰ ክብሩ ሚካኤል ለተላፊኖስ ባዕል። አልቦ ዘይትማሰለከ በልማደ ምሕረት ወሣሕል። እንበለ ባሕቲታ እኅትከ #ማርያም_ድንግል። ዚቅ ተውህቦ ምሕረት ለሚካኤል ወብሥራት ለገብርኤል ወሀብተ ሰማያት #ለማርያም_ድንግል። ነግሥ ሰላም ለዝክረ ስምኪ ዘመንክር ጣዕሙ። ለወልድኪ አምሳለ ደሙ። መሠረተ ህይወት #ማርያም ወጥንተ መድኃኒት ዘእምቀዲሙ። ኪያኪ ሠናይተ ዘፈጠረ ለቤዛ ዓለሙ። እግዚአብሔር ይትባረክ ወይትአኮት ስሙ። ዚቅ ወመሠረቱ ወመሠረቱ ለዓለም አንቲ: ዕጓለ አንበሳ ዕጓለ አንበሳ በከርስኪ ፆርኪ: እምአንስት ቡርክት አንቲ: ለመሠረትኪ የኃትዎ ዕንቊ ክቡር: አንቲ ውእቱ መንፈሳዊት ሀገር ንጽሕት ፀምር: ዘኃረያ ጸባኦት አማኑኤል። ነግሥ ፪ቱ አዕሩግ አመ በከዩ ብካየ። ረከቡ ወለተ ዘታስተሠሪ ጌጋየ። ለወንጌላውያን ኲልነ ዘኮነተነ ምስካየ። ኢያቄም ወሐና ወለዱ ሰማየ። ሰማዮሙኒ አሥረቀት ፀሐየ። ዚቅ ምሥራቀ ምሥራቃት መፃአ ፀሐይ: እግዝእትነ ዘመና ሙዳይ: ተወልደት ዮም ዳግሚት ሰማይ። መልክአ ማርያም ሰላም ሰላም ለዝክረ ስምኪ ሐዋዝ። እምነ ከልበኔ ወቊስጥ ወእምነ ሰንበልት ምዑዝ። #ማርያም_ድንግል ለባሲተ ዓቢይ ትዕዛዝ። ይስቅየኒ ለለጽባሑ ወይነ ፍቅርኪ አዚዝ። ከመ ይሰቅዮ ውኂዝ ለሠናይ አርዝ። ዚቅ በሐኪ #ማርያም ዘገነት ኮል: ዕፀ ጳጦስ መዝገቡ ለቃል: ዕለተ ልደትኪ ዮም በጽድቅ ናብዕል። ወረብ በሐኪ #ማርያም ዘገነት ኮል/፪/ "ዕፀ ጳጦስ"/፪/ መዝገቡ ለቃል/፪/ መልክዐ ማርያም ሰላም ለልሳንኪ ሙኃዘ ኀሊብ ወመዓር። ዘተነብዮ ወፍቅር። #ማርያም_ድንግል ወለተ ድኁኃን አድባር። ኅብዕኒ እምአይነ ፀር ወአንጽሕኒ እምነውር። እስመ ተስፋየ አንቲ በሰማይ ወምድር። ዚቅ መሠረታቲሃ ውስተ አድባር ቅዱሳን: ወብእሲ ተወልደ በውስቴታ። ወረብ "መሠረታቲሃ"/፪/ ውስተ አድባር ቅዱሳን/፪/ "ወብእሲ ተወልደ" በውስቴታ/፪/ መልክዐ ማርያም ሰላም ለአእዳውኪ እሳተ መለኮት እለ ገሠሣ። አውቃፈ ብሩር ወወርቅ ለሥርጋዌሆን ኢኃሠሣ። #ማርያም_ድንግል ለመካን ሕንባበ ከርሳ። አንጽሕኒ እግዝእትየ ለፍትወተ ዓለም እምርኲሳ። በዲበ ሥጋየ ኢትንብር ነጊሣ። ዚቅ ኦ ድንግል አኮ በፍትወተ ደነሰ ዘተፀነስኪ: አላ በሩካቤ ዘበሕግ: እምሐና ወኢያቄም ተወለድኪ። ወረብ "እምሐና ወኢያቄም"/፪/ ተወለድኪ/፪/ አላ በሩካቤ ዘበሕግ/፪/ መልክዐ ማርያም ሰላም ዕብል ለድንግልናኪ ዕጽው። እንተ እምኔሁ ሠረቀ ፀሐየ መለኮት ኅትው። #ማርያም_ድንግል ዘስነ ንጽሕኪ ፍትው። ለኀዲር በበፍናው በአሕጉር ወበድው። ዕቀብኒ ወለቶሙ ለኄራን አበው። ዚቅ ወለቶሙ ለነቢያት ይእቲ #ማርያም: እሞሙ ለሐዋርያት ይእቲ #ማርያም: ደብተራ ፍጽምት እንተ ኢገብራ ዕደ ሰብእ: ዕጹብ ግብረ መናሥግተ ሥጋ ኢያርኃወ: ዕጹብ ግብረ። ወረብ ወለቶሙ ለነቢያት እሞሙ ለሐዋርያት ይእቲ #ማርያም/፪/ "ደብተራ" ፍጽምት/፪/ እንተ ኢገብራ ዕደ ሰብእ/፪/ መልክዐ ማርያም በዝንቱ ቃለ ማኅሌት ወበዝንቱ ይባቤ። ለዘይስዕለኪ ብእሲ ጊዜ ረከቦ ምንዳቤ። ብጽሒ ፍጡነ ትሰጠዊዮ ዘይቤ። #ማርያም ዕንቊየ ክርስቲሎቤ ወምዕዝተ ምግባር እምከርቤ። ዘጸገየ ማኅጸንኪ አፈወ ነባቤ። ዚቅ ርግብ ፀዓዳ ዘዕንቊ ድዳ: ወዘጳዝዮን ማኅፈዳ: ተወልደት ዮም በምድረ ይሁዳ። ወረብ ርግብ ፀዓዳ ዘዕንቊ ድዳ ወዘጳዝዮን ማኅፈዳ ወዘጳዝዮን/፪/ ዮም ተወልደት በምድረ "ይሁዳ"/፪/ በምድረ ይሁዳ ተወልደት። አሥርቆት ሰላም ለልደትኪ እማኅጸነ ድክምት ሥጋ። ድኅረ ኃለፋ ውርዙት ወድኅረ ትክቶ ኃደጋ። ማርያም ሥመሪ ወጺሐኪ እንበለ ንትጋ። ለማየ ንጽሕኪ ትረስዪኒ ፈለጋ። እስመ ንጽሕ ይሁብ ሞገሰ ወጸጋ። ዚቅ ሐመልማላዊት ሐመልማላዊት ሐመልማላዊት ዕፅ ሙሴ ዘርእያ በደብረ ሲና: እግዝእትየ ሙዳዩ ለመና: ተወልደት ዮም እምነኢያቄም ወሐና። ወረብ "ሐመልማላዊት"/፪/ ዕፅ ሙሴ ዘርእያ በደብረ ሲና/፪/ ተወልደት ዮም እምነኢያቄም ወሐና/፪/ ምልጣን ዮም ፍሥሃ ኮነ በእንተ ልደታ #ለማርያም እምሐና ወኢያቄም: ከመ ትቤዙ ነቢያተ ወጻድቃነ: አማን ተወልደት እመብርሃን። አመላለስ አማን በአማን/፬/ ተወልደት እመብርሃን/፬/ ወረብ ኮነ ዮም በእንተ ልደታ #ለማርያም /፪/ ከመ ትቤዙ ነቢያተ ወጻድቃነ ነቢያተ ከመ ትቤዙ/፪/ እስመ ለዓለም ልሳንየ ላዕላዕ ይሴብሐኪ: እግዝእትየ እብለኪ አዳም ንባብኪ ወመሠረቱ ወመሠረቱ ለዓለም አንቲ: ዕጓለ አንበሳ ዕጓለ አንበሳ በከርሥኪ ፆርኪ: እምአንስት ቡርክት አንቲ: ለመሠረትኪ የኃትዎ ዕንቊ ክቡር: አንቲ ውእቱ መንፈሳዊት ሀገር ንጽሕት ፀምር: ዘኃረያ ጸባኦት አማኑኤል። አመላለስ አንቲ ውእቱ መንፈሳዊት ሀገር ንጽሕት ፀምር/፪/ ዘኃረያ ጸባኦት አማኑኤል/፪/ ።።።።።።።።።።።።።።።።።።።። ።።።።።።።።።።።።።።።።።።።። @zemarian 731 views18:35
