2022-08-28 13:50:51
ዝግጅቱ ለጉድ ነበር። ቅቤው ተናጠ። ድቁሱ ተደቆሰ። እህል ተሸመተ። ለአጥሚትም ለገንፎም የሚሆን ዱቄት ተደቆተ። ሌላው ቢቀር ለሚወለደው ህፃን አቃፊ አባት ተመረጠ። ሁሉ ሙሉ ሁሉ ዝግጁ ነው ተብሎ የውልደት ቀን በጉጉት መቁጠር ተጀመረ።
እናት የመሆን ፍላጎት ጣሪያ ነክቶ ሰርክ ሆድን መለካት ብቻ ሳይሆን እናቷንም «አያት ልትሆኚ ነው» እያለች ያችን ቀን መላው ቤተሰቡ እንዲናፍቅ አደረገች። ብዙ የልጅ ስም ተደርድሮ አባት የራሱን እናት የራሷን አያትም እንዲሁ አዘጋጁ። ሴት ከሆነች አከሊት ወንድ ከሆነ እከሌ እየተባባሉ።
ከዚህ ሁሉ ዝግጅት በኋላ ቀኑ ደርሶ ምጥ መጣ። የደስታ ቀን ደረሰ። ለእልልታ ደቂቃዎች ቀሩ። ዘመድ ተጠራራ። ከማዋለጃው ክፍል በር ላይ ተሰብስበው የህፃኑን ድምፅ እስኪሰሙ የእናት የምጥ ጩኸት ቢቀውጠውም ጀሮአቸው ግን ብዙም ለእናት ሲቃ ግድ አልሰጠውም። የምጥ ጩኸት እየበረታ ሄደ። «ሊነጋ ሲል ይጨልማል» በሚለው ደስታቸው ለማጣጣም እንጅ የእናትን የበረታ ሰቆቃ ያደመጠው አልበበረም። «አይዞሽ» ከማለት ውጭ ሁሉም መስማት የናፈቀው የህፃኑን ድምፅ ነው። በተለይ አያት ወገቧን በመቀነት አስራ ከወዲያ ወዲህ እየተንቆራጠጠች የብስራት ዜና እየጠበቀች ነው።
ከደቂቃዎች በኋላ የማዋለጃው በር ተከፈተ። ሁሉም ወደ በሩ ሰፍ ብለው ሄዱ። ከውስጥ አንድ ሀኪም ወጣ። ላብ አልቦታል። ተረብሿል። እጅግ በደከመና ተስፋ በቆረጠ ድምፅ «የምንችለውን አድርገናል ግን ማትረፍ አልቻልንም» አለ። የተሰበሰበው ሰው ሁሉም በአለበት ደርቆ ቆመ።
ከመካከላቸው አንዱ «እሷስ ደህና ናት?» ሲል ጠየቀ። ዶክተሩ በአዘነ ልብ እንዲህ አለ። «እናዝናለን ማትረፍ ያልቻልነው እሷን ጭምር ነው» ሲሉ አካባቢው ተናጋ።
ያኔ አያት የመሆን ጉጉት የናጣቸው እናት እንዲህ ብለው አልቅሰው ሰውን አስለቀሱት።
«ባሰበችው ቀርቶ ባሰው ካዋላት
እኔም ሄድኩላችሁ እናንተው ቅበሯት» ብለው ከአካባቢው ተሰወሩ።
አንዳንዴ እኛ እናስባለን አላህ ያለው ይሆናል። ብዙ እናቅዳለን አላህ የፃፈው ብቻ ይሆናል። እኛ እንዘጋጃለን። መቋጫው ግን የእርሱ ትእዛዝ ብቻና ብቻ ነው። ሰው ለኸይርም ለሸርም ይወጥናል መቋጫው ግን ጀሊሉ ነው።
ለዚያም ነው
«ቀበሌም ፈረመ ወረዳም ፈረመ
አላህ ካልፈረመ ነገሩ ከረመ» ብለው ያሉት አበው።
ወደ አጀንዳዬ ስመጣ እንደነሱ እቅድና ትልምማ ሁለት መጅሊስ አድርገው «የእኛና የእነሱ» በሚል የመስጅድ ክፍፍል ሰርክ ደም ሊያፋስሱን ነበር። እንደነሱ እቅድማ የኢትዮጵያ ሙስሊሞች በመነጣጠል የእነርሱን የክፋት መረብ መዘርጋት ነበር። የተሰጠነውን ቦታ ጭምር ሊያስነጥቁን ሁሉን ሰበብ አድርሰው ነበር። ስንት ፎክረው ፤ ስንት ዝተው ነበር። ለግል ስልጣን ሲሉ ስንት ስም አጥፍተው ስንት ድንበር ዘለው ነበር።
ባሰቡት ቀርቶ ባሰው አዋላቸው እንጅ እነሱማ በስንቱ ህይወት ፈርደው በስንቱ ነብስ ተጫውተው ስንቱን ሚስኪን አምታተው ነበር። በእንጭ ሊስቃጩን ስንቱን መክረው ነበር። ተመካሪውን አላህ በፈለገው መንገድ አደረገው እንጅ። እንደነሱማ «ደም ይፈሳል» የሚል ፉከራ ፎክረው እንደአላህ ፍቃድ ውሃም ሳይፈስ ያለወግ ያለ ማእረግ እንደወጡ ቀሩ እንጅ።
እኔማ ብዙ ሰነድ አይቼ ብዙ ጥፋት ተገንዝቤ ኦዲት ማለት ከጀመርኩኝ ውዬ አድሬአለሁ።
ዝቅ አድርገህ ከፍ አድርገኝ እንጅ በተቃራኒው መራር ነው።
ኦዲት!
||
በእነዚህ የማህበራዊ ሚዲያ ገፅ ሊንኮች ፤ በቀላሉ የምለቃቸው መረጃዎች እንዲደርሷችሁ ከፈለጋችሁ ተቀላቀሏቸው።
#በቴሌግራም
t.me/shemsu_jemal
#በትዊተር
https://twitter.com/shemsujemmal
#በፌስቡክ
https://Facebook.com/ShemsuJemmall
Join follow Sher like ያድርጉ!
246 viewsedited 10:50