2022-06-28 06:19:32
ጥላቻ ይወገድ
ጥላቻ ሰፍኗል በዓለማችን:: መፍትሔውስ ምን ይሆን? የሚናገር ይጠላል:: ዝምም የሚል ይጠላል:: የሚሠራ ይጠላል:: የማይሠራም ይጠላል:: በምሥራቅ ጥላቻ አለ:: በምዕራብም ጥላቻ አለ:: በሰሜን ጥላቻ አለ:: በደቡብም ጥላቻ አለ:: በቤተ መንግሥት ጥላቻ አለ:: በቤተ ክህነትም ጥላቻ አለ:: በክርስትና ጥላቻ አለ:: በእስልምናም ጥላቻ አለ:: የቤተ ክህነት አገልጋዮች ጥላቻን ይሰብካሉ:: የመንግሥትም ሠራተኞች ጥላቻን ይሰብካሉ:: ፍቅርና ይቅርታም ከምድረ ገፅ ተወግደዋል:: በገዳም ጥላቻ አለ:: በዓለምም ጥላቻ አለ:: የሰው ዘር እንደ ገና በጥላቻ ተበከለ::
በጥላቻ የተፀነሱ ሕፃናት የጥላቻ ልብወለድ ሲነበብ በማሕፀን የሰሙ ጩቤ ጨብጠው ተወለዱ:: በመጀመሪያ አባቶችን ሰለቡ, እናቶችንም ደፈሩ, ጌታቸውንም ሸጡ:: በጥላቻ ጥበባቸው እስከ ሰማይ ከፍ ከፍ አሉ እስከ ሲኦልም ወረዱ::
ለሁለት ሺ ከዚያም በላይ ዓመታት የተሰበከው ፍቅር ወዴት ሄደ እስኪ በአንድነት እንፈልገው ምናልባት ጥላቻን ከዙፋኑ አውርዶ ቢያንኮታኩተው:: ጭፍን ጥላቻን ከሰው ሕሊና አውጥቶ የሚጥለው ሰው ራሱን ከራሱ በላይ መውደድ ሲችል ነው:: ራሱን የሚወድ ሌላውንም ይወዳልና:: ራሱን የማይወድ ሌላውንም አይወድምና::
ስለዚህ የዘር ጥላቻን የሚዘሩ, የሚኮተኩቱና የሚያዋጉ, የንፁሐንን ደም በከንቱ የሚያፈሱ/የሚያስፈስሱ የድሆችን ቤትና ንብረት የሚዘርፉ, ነፍሰ ጡሮችን, አጥቢዎችን እናቶችን የሚያሰቃዩ የሚገርፉ #ወዮላቸው! #ወዮላቸው! #ወዮላቸው!
በሁሉም ሃይማኖቶች ያሉ #ሰባኪዎች በሙሉ
ወደ ውስጣቸው ይመልከቱ:
በመጀመሪያ ራሳቸውን ይስበኩ:: በውስጣቸው ያለውን የጥላቻ ጉቶ ነቅለው ይጣሉት:: በዚያ ፈንታ ፍቅርንና ይቅርታን ይትከሉበት:: ፍቅርንና ይቅርታን ኮትኩተው ያሳደጉ ሰባኪዎች ጥላቻን ለማስወገድ አቅምና ጉልበት ያገኛሉ:: ከቁጣውም ያመልጣሉ::
በዓለም ሁሉ በከንቱን የፈሰሰው/የሚፈስሰው የንጹሐን ደም እንደ አቤል ደም ወደ እግዚአብሔር ደርሶ ክስ አቅርቧል:: የእግዚአብሔር የቁጣ ሰይፍም ተመዝዟ!
የቁጣው መላእክትም ትእዛዝ ለመቀበል በተጠንቀቅ ቆመዋል:: ጥላቻን የሚሰብኩ ንፁሐንን የሚገድሉ/የሚያስገድሉ ወዮላቸው! ወዮላቸው! ወዮላቸው!
የሚሰማ ጆሮ ያለው ይስማ!!!
ስብሐት ወክብር ለስሉስ ቅዱስ ይደሉ!
ሰአሊ ለነ ቅድስት
ቅድስት ሆይ! ለምኝልን!
የመ/ፀሐይ መኮንን
19-10-2014
(26/06/2022)
126 views03:19