2022-09-01 19:46:04
. የተሸከመህ ሸክም
ገና ከጫጩትነቱ ጀምሮ ብረር ብረር የሚለውና በፍጥነቱ ታዋቂ ለመሆን የሚመኝ ወፍ ነበረ ይባላል፣ ምንጩ የማይታወቅ አፈ-ታሪክ፡፡ እናቱ ከልምዷ በመነሳትና ለእርሱ በመጠንቀቅ ተረጋጋ ትለው ነበር፡፡ እርሱ ግን ፈጽሞ አይሰማትም ነበር፡፡ ከጊዜ ወደጊዜ እያደገ ሄደና በእርግጥም እንደተመኘው ፈጣን በራሪ ሆነ፡፡
ይህ ወፍ በቃ መብረር ይወዳል፡፡ መብረር ከመውደዱ የተነሳ ማታ ሁሉም በጊዜ ወደጎጆው ሲመለስ አይኑ ለማየት የማይችልበት ደረጃ እስኪመሽ ድረስ ሲበር፣ ሲከንፍ ውሎ እያለከለከ ወደ ጎጆው ይገባል፡፡ ማለዳም ቢሆን ለመነሳት የሚቀድመው ወፍ የለም፡፡ ከእርሱ ዘግየት ብለው የወጡ አቻ ወፎቹን ካልተወዳደርን እያለ ስቃያቸውን ነው የሚያላቸው፡፡ ሁሉንም ግን ይቀድማቸው ነበር፡፡
ይህ ወፍ ሌሎቹን ወፎች ሁሉ የመቅደሙ ሁኔታ ስላላረካው አሁንም ከዚያ በበለጠ ሁኔታ ለመፍጠንና ከእርሱ የላቁ የወፍ ዝርያዎች ጋር ለመወዳደር ምኞት አደረበት፡፡ አንድ ቀን አንድ ሃሳብ ብልጭ ያለለት መሰለው፡፡ ብዙ ካሰበ በኋላ፣ “ችግሬ ክብደቴ ነው” ወደማለት ሃሳብ መጣ፡፡ ክብደቱን ለመቀነስ ሲል በየቀኑ አንድ ላባ ከክንፉ ላይ በመንቀል ፍጥነቱን መለካት ጀመረ፡፡ የተወሰኑ ላባዎች ሲነቅል እውነት ይሁን ወይም የስነ-ልቦና እይታ ያመጣው ምልከታ ይሁን ባይታወቅም ፍጥነቱ የጨመረ መሰለው፡፡
ይህ ተግባሩ እንደማያዛልቀው እናቱ በየቀኑ ብትመክረውም፣ “እንደናንተ ያለ ወደኋላ የቀረ አመለካከት ያለው ሰው ነው የጎተተኝ” በማለት አልሰማ አለ፡፡ ከጥቂት ቀናት በኋላ መብረር እስከሚያስቸግረው ድረስ አብዛኛዎቹን የክንፉን ላባዎች ነቀላቸው፡፡ ከዚያ የተከተለውን ውጤት መገመት ቀላል ነው፡፡ እውነታው የገባው በኋላ ነው፡፡
ለካ ሸክም ሆነብኝ ያለው ነገር እሱን የተሸከመው ነው . . . ሸክሜ ነው ያለው ነገር የመብረሪያ አቅሙ ነው . . . አዎ ሸክም ነው፣ ነገር ግን የጉልበት ምንጭ ነው . . . አዎ ሸክም ነው፣ ነገር ግን ወደከፍታ ለመብረር የተነሳበት መነሻና እንደገና የማረፊያ ምክንያት ነው፡፡
• ይህ የልጆች የሚመስል ታሪክ “ሸክም ሆናችሁብኛል” በማለት ቀድሞውኑ የጉልበት ምንጭ የሆኑትን ቤተቦቹን ነቅሎ የጣለውን ሰው አስታወሰኝ፡፡
• ታሪኩ ውጪ ለተከፈተለት የስኬትና የተቀባይነት እድል መነሻው ቤተሰቡ፣ ትዳሩ፣ ልጆቹና የቅርብ አጋሮቹ ሆነው ሳሉ፣ የሚደርስበትን የስኬት ከፍታ ሲያይ መነሻውን እንደሸክም በመቁጠር ጎድቶ የተነሳውን ሰው አስታወሰኝ፡፡
• ይህ የወፉ ታሪክ ጡንቻ ሲያወጣ፣ አይኖቹ ሲገለጡ፣ ዙሪያውን መመልከት ሲጀምርና ለጋ አቋሙን የሚያደንቁለት ሲበዙ እዚያ ያደረሱትን ወላጆቹንና አሳዳጊዎቹን እንደሸክም የቆጠረውንና ከሕይወቱ ነቅሎ የጣላቸውን ወጣት አስታወሰኝ፡፡
• ይህ ቀላል የሚመስል ታሪክ ተሸክመውት ሳለ እርሱ ግን እንደሸክም የቆጠራቸውን ከእሱ ለየት የሚሉትን የሃገሩን ሰዎች ገንጥሎ ለመጣል የሚቃጣውን የህብረተሰብ ክፍል አስታወሰኝ፡፡
የተሸከመህን ሸክምህን አትጣል!
Dr.Dreyob Mamo
BE INFORMED FIRST
@Jesuschristinheaven
@Jesuschristinheaven
336 views𝐁𝐎𝐂𝐇𝐔 𝐔𝐍𝐂𝐋𝐈𝐂𝐀❶, 16:46