2022-03-02 11:08:36
Hilawe Tesfaye
Feb 29, 2016
" አንተን ሲደላህና ሲመችህ አገርህን የምትወዳት፤ ሲጎልብህና
ሲከፋህ የምትጠላት ከሆነ አንተ የምትወደው ሀገርህን ሳይሆን
ራስህን ነው።"
.
.
እንደው እውነት ለመናገር እቺ አባባል እንደጥቅስ ታክሲ ላይና
ራስጌ ለመለጠፍ ታምራለች እንጂ ለመተግበር ትከብዳለች።
ማንም ሰው አገሩ ሲመቸው ፍቅሩ ከፍ ይላል። ሲበደል ደግሞ
ተቃራኒው...
.
.
ነገር ግን እነዚህ ሰዎች በበደል ውስጥም ሆነው ይቺን ጥቅስ
የእውነት ነውንነውታል። ምንም ቢበደሉም የሚያልፈውን
መንግስት ሳይሆን ቋሚዋን አገራቸውን አርቀው አይተዋል።
.
.
'ያወራብሽ ኖሮ የሰራልሽ ሞተ' ያሉት 'ከሀይለስላሴ' ጋር
የተጣሉት 'በላይ ዘለቀ' እንኳን 'ወንድ አይውጣብሽ' ብለው
ሀገራቸውን ተራግመዋል።
.
.
(1)
-
'ደጃዝማች ጉዋንጉል ዘገየ።'
-
"እኚህ ሰው ምኒሊክ ላይ ሸፍተው ከምኒሊክ ጭፍሮች ጋር
በጦርነት የተፈታተኑ ሰው ናቸው።
-
የውጪ ጦር ሲመጣብን ግን ከግዚያዊው ምኒሊክ ፀብ ይልቅ
ሩቋን ሀገራቸውን በማሰብ ህዳር 24 ቀን ምኒሊክ 'መርሳ' ላይ
ሰፍረው ሳለ የጓንጉል መልክተኛ እንዲህ የሚል መልክት ይዞ
መጣ:
-
-
"ጃንሆይ ከርሶ ተጣልቼ በርሀ ገብቻለሁ። አሁን ግን በሀገሬ ላይ
የውጪ ጠላት ስለመጣባት የርሶና የኔ ጉዳይ ቀርቶ ይማሩኝና
መጥቼ ከእርሶ ጌታዬ ጋር ሆኜ ያገሬን ጠላት ልውጋ?" ብሎ
ሲናገር ምኒሊክ ተደስተው 'ይምጣ ምሬዋለሁ' ብለው
ተቀበሉት።
-
(ይልሀል 'ጳውሎስ ኞኞ' አጤ ምኒሊክ' በሚለው መፃፉ)
.
.
(2)
-
ክቡሩ ሰው 'ባልቻ ሳፎ (አባ ነፍሶ)'
-
እኚህ ሰውዬ ምንም እንኳን የአድዋ ጦርነትን ጨምሮ ላገራቸው
ወሳኝ ስራ የሰሩ ቢሆንም 'ንግስት ዘውዲቱን' ከሚደግፉት
ወገን ስለነበሩ የአልጋወራሽ ተፈሪን ትዕዛዝ አልቀበልም ስላሉ
ታስረውና ተግዘው ይኖሩ ነበር።
-
-
ጣሊያን ለሁለተኛ ጊዜ ሲወረን በዚያን ጊዜ እንደሳቸው
በእስራትና ግዞት ላይ የነበሩት እነ 'ደጃዝማች አባውቃው፤ ራስ
ሀይሉ ካሳ' እና ሌሎች ነፃ በመሆናቸው ከጣሊያኖች ጋር በደስታ
ሲፈነጥዙ፤
-
-
ባልቻ ግን " ጠላቴ ሀይለስላሴ እንኳን ወደቀ" ሊሉ ቀርቶ
ጭራሽ በእልፍኛቸው ውስጥ እየተዘዋወሩ "ወይኔ እኔ ባልቻ!
አይኔ እያየ የምኒሊክ አገር ኢትዮጵያ ትውደቅ? በማለት ምርር
ብለው አለቀሱ" ይባላል።
-
-
ዕንባቸውን አፍሰው አልቀሩም ጉልበታቸው በደከመበት
በስተርጅና ሲዋጉ ደማቸውን አፍሰው ሞቱ።"
-
(ይለናል 'ብርሀኑ ድንቄ' ቄሳርና አብዬት' በሚለው መፅሀፉ)
.
.
(3)
-
'ልጅ አብዩ'
-
ይሄ 'ከራስ መኮንን' ጋር መቀሌ የዘመተው ልጅ ነው። እራስ
'አሉላን' ጨምሮ መኳንንቶቹ ምሽጉን ጥሶ ስለመግባት ሲማከሩ
አብዩ እየተቃወመ ተናገረ " ሰራዊቱን በከንቱ ከምናስጨርስ
ውሀውን እንዝጋበት እጁን ይሰጣል።" ሲል ሁሉም የአብዩን
ሀሳብ 'ፈርተህ እንዳይሆን' በሚል ሲቃወሙበት
-
-
አብዩም መለሰ " ሰራዊቱ በከንቱ እንዲያልቅ በመደረጉ
አዝናለሁ። ግን እናንተ ስትሞቱ እኔ የቀረሁ እንደሆን የዛኔ እኔ
ፈሪ ተብዬ እሰደባለሁ" ብሎ ባላመነበት ጦርነት ዘምቶ
በሚያሳዝን ሁኔታ ተዋግቶ ሞተ።
-
-
እንዳለውም ብዙ ሰራዊት አለቀ። እቴጌ ጣይቱ እሱ ያነሳውን
'ውሀውን የመቆጣጠር' ሀሳብ አምጥተው ተተገበረና ጣሊያኖቹ
ከምሽጋቸው ወጥተው እጅ ሰጡ።
-
(ይሉናል ተክለሀዋርያት 'ኦቶባዮግራፊ' የህይወቴ ታሪክ'
በሚለው መፅሀፋቸው)
.
.
ከነገ ወዲያ እሮብ የካቲት 23 የአድዋ ድል በአል ተከብሮ
ይውላልና መልካም በአል!!
2.4K viewsአጤሪራ, 08:08
A
