Nib InternationalBank

ንብ ኢንተርናሽናል ባንክ አዳዲስ ሹመቶችን ሰጠ።

ባንኩን ከተቀላቀሉ አዳዲስ የማኔጅመንት አባላት ጋር የትውውቅ መድረክ ተካሄደ።

''በአዲስ መንፈስ ለላቀ ከፍታ'' በሚል መሪ ቃል የለውጥ እንቅስቃሴ ላይ የሚገኘው ንብ ኢንተርናሽናል ባንክ አዳዲስ ሹመቶችን ሰጥቷል፡፡

በቅርቡ የተወሰኑ ቺፎች፣ ምክትል ቺፎች፣ ምክትል ፕሬዝዳንቶችና የመምሪያ ዳይሬክተሮች ከኃላፊነት መነሳታቸው ይታወሳል። በምትካቸውም አዳዲስ ከፍተኛ የሥራ ኃላፊዎች ተሹመዋል፡፡

በዚህም መሠረት፦ አቶ ግርማ ፈቀደ - ቺፍ ደንበኞችና ቅርንጫፍ ባንኪንግ ኦፊሰር፣ አቶ ሳምሶን አምዲሳ - ቺፍ ፋይናንስና ፋሲሊቲ ኦፊሰር፣ አቶ በላይ ጎርፉ - ምክትል ቺፍ ስትራቴጂና ትራንስፎርሜሽን ኦፊሰር፣ ወይዘሮ ሐረገወይን አምሳለ - ምክትል ቺፍ ዓለም አቀፍ ባንኪንግ ኦፊሰር፣ አቶ ዘውዱ ሐኪሙ - ምክትል ቺፍ ሒዩማን ካፒታል ኦፊሰር እና አቶ ነጻነት ይርጋ ምክትል ቺፍ ክሬዲት ኦፊሰር በመሆን ተሹመዋል፡፡

በተያያዘም፣ ዛሬ ግንቦት 21 ቀን 2016 ዓ.ም አዳዲስ የሥራ ኃላፊዎች ከቀሪዎቹ ነባር የማኔጅመንት አባላት ጋር በዋናው መሥሪያ ቤት የትውውቅ መድረክ አካሂደዋል፡፡

ባንኩን የተቀላቀሉት አዲሶቹ የማኔጅመንት አባላት፤ ቀድሞ ይሠሩበት ከነበረው ተቋም በተሻለ ደረጃ ለማገልገልና ባንኩ አሁን ካለበት ችግር እንዲላቀቅ በላቀ ትጋት ለማገልገል እንደተዘጋጁ አረጋግጠዋል፡፡ “ምቹና ከስጋት ነጻ ከሆነ ሥራ ላይ ወጥቶ ተግዳሮት ወዳለበት የሥራ ከባቢን መቀላቀል እጅግ ተፈላጊና መልካም አጋጣሚ ነው”ም ብለዋል፡፡
***
ይሰሯል ከልብ፣ እንደ ንብ!

የንብ ኢንተርናሽናል ባንክ የ25ኛ አመት የብር ኢዩቤልዩ በዓል ማስጀመሪያ ሥነ-ሥርዓት ተካሔደ።

ባንኩ ግንቦት 19 ቀን 1991 ዓ.ም የንግድ ፈቃድ ያገኘበትን ቀን(May 26) ምክንያት በማድረግ የብር ኢዩቤልዩ በዓሉን የመጀመሪያው በሆነው ''ሾላ ቅርንጫፍ'' በተለያዩ ሥነ-ሥርዓቶች እያከበረ ይገኛል፡፡

በሥነ-ሥርዓቱ የተገኙት የባንኩ የዲሬክተሮች ቦርድ ዋና ሊቀመንበር አቶ ሺሰማ ሸዋነካ እና አዲሷ ዋና ሥራ አስፈጻሚ እመቤት መለሰ(ዶ/ር) ተገኝተው መልዕክት አስተላልፈዋል።

በዚህም አቶ ሺሰማ ባንኩ እያከበረው በሚገኘው የብር ኢዩቤልዩ በዓል ውስጥ ጉልህ አስተዋጽኦ የነበራችሁ የሥራ ሀላፊዎች፣ ባለድርሻ አካላትና ደንበኞች እንዲሁም የባንኩ ማሕበረሰብ ''እንኳን አደረሳችሁ፤ እንኳን ደስ አላችሁ'' ብለዋል።

ዶክተር እመቤት በበኩላቸው ''ባንኩ በበርካታ ሁኔታዎች ውስጥ እያለፈ በሚገኝበት በዚህ ወቅት በተለየ ሀላፊነት በመቀላቀሌ ደስተኛ ነኝ'' ያሉ ሲሆን አሁንም ባንኩ ''በአዲስ መንፈስ ለላቀ ከፍታ'' በሚል መርህ የተነሳለትን ዓላማ በማገዝ ሀገራዊ እና ተቋማዊ ተልዕኮዎቹን እንዲያሳካ ርብርብ ማድረግ እንደሚያስፈልግ ገልጸዋል።

ለዚህ ትልቅ ተነሳሽነትን የሚፈጥረውና ዛሬ የተበሰረው የባንኩ የ25ኛ ዓመት የብር ኢዩቤልዩ በዓል በተለያዩ ጊዜያት እያደጉ በሚሔዱ መርሐግብሮች ለቀጣይ ጥቂት ወራት እየተከበረ እንደሚቀጥልም ተናግረዋል።
***
ይሠሯል ከልብ፣ እንደ ንብ!

ንብ ኢንተርናሽናል ባንክ ከምንም አይነት ስጋቶች ነፃ ነው-አዲሷ የንብ ኢንተርናሽናል ባንክ ዋና ሥራ አስፈጻሚ ዶክተር እመቤት መለሰ።

ዋና ሥራ አስፈጻሚዋ ዛሬ ከባንኩ ባለድርሻ አካላት ጋር የትውውቅ መድረክ አከናውነዋል።

የንብ ኢንተርናሽናል ባንክ የዲሬክተሮች ቦርድ ሊቀመንበር አቶ ሺሰማ ሸዋነካ ስለ ዋና ሥራ አስፈጻሚዋ ለባለአክሲዮኖችና ደንበኞች ገለጻ አድርገዋል። ''ቦርዱ ዋና ሥራ አስፈጻሚ ለመምረጥ ባደረገው ምልመላ የአሁኗን የባንኩ ዋና ሥራ አስፈጻሚ የመረጠ ሲሆን ሹመታቸው ፀድቆ በዚህ ወሳኝ ወቅት ዶክተር እመቤት ወደባንካችን በመምጣታቸው ደስተኞች ነን'' ብለዋል።

ቦርዱ በተለይም ከክፍያ ጋር ተያይዞ የነበሩ ውስንነቶችን መቅረፍ መቻሉን ያብራሩት ሊቀመንበሩ፤ አዲሷ ዋና ሥራ አስፈጻሚ ዶክተር እመቤት ያላቸውን እምቅ አቅም በመጠቀም ባለአክሲዮኖች በአጭር ጊዜ ባንኩን ወደነበረበትና ከዚያም በላይ የላቀ ደረጃ ለማድረስ በጋራ መሥራት እንደሚገባቸው ተናግረዋል።

''ንብ ባንክ አሁን ላይ ምንም አይነት ስጋት የለበትም'' ያሉት ዋና ሥራ አስፈጻሚዋ ''ወደ ንብ ባንክ በሃላፊነት እንደመጣሁ ባለአክስዮኖችን ጨምሮ ከባንኩ ባለድርሻ አካላት ጋር ያደረግኩት ውይይት ችግሩ በአጭር ጊዜ የሚቀረፍ መሆኑን አመላክቶኛል'' ሲሉ ተናግረዋል።

በዚህም ባለአክሲዮኖች፣ ደንበኞችና ሌሎች የባንኩ ባለድርሻ አካላት ከጎናቸው እንዲቆሙ ጠይቀዋል። አስተያየት የሰጡ ባለአክሲዮኖች እና ደንበኞች በዋና ሥራ አስፈጻሚዋ መደሰታቸውን ገልፀው በዘርፉ የነበራቸውን ልምድ መነሻ በማድረግ ንብ ባንክን ወደተሻለ ስኬት እንደሚያሸጋግሩት ያላቸውን እምነትና ተሥፋ ገልፀዋል። ለዚህም ባንኩ በሚፈልጋቸው የትኛውም ወቅት ፈጣንና ተገቢ ምላሽ ለመስጠት ዝግጁ መሆናቸውንም አረጋግጠዋል።
***
ይሠሯል ከልብ፣ እንደ ንብ!