ermi ye hawii.....✍

2022-09-01 22:15:18 የቀጠለ
6.ግንኙነትን መፍጠር ወይም መነጠል (Intimacy vs. Isolation.)

   ይህ የእድገት ደረጃ ከ 18 አመት እስከ 40 አመት ባለው ጊዜ ውሥጥ ያለ የእድገት ደረጃ ነው፡፡ይህ የእድሜ ክልል ሰዎች ከቤተሰባቸው ውጪ ከሆኑ ሰዎች ጋር ግንኙነት የሚፈጥሩበት ወቅት ነው፡፡የወደፊት የትዳር አጋራቸውንም በዚህ ወቅት ውስጥ ይለያሉ፡፡ይህ ሂደት ስኬታማ ከሆነ ከሰዎች ጋር ጥሩ ግንኙነት ይኖራቸዋል፣ለግንኙነቱ ቁርጠኝነት ያሳያሉ፣ደህንነት ይሰማቸዋል….ወዘተ፡፡ከሰው ጋር መገናኘትን የማይፈልጉና የሚፈሩ ከሆነ ግን የመነጠል ወይም የብቸኝነት ስሜት ይሰማቸዋል በዚህ የተነሳ ድብርት ውስጥ ሊገቡም ይችላሉ፡፡

7. ውጤታማነት ወይም ውጤታማ ያለመሆን ስሜት (Generativity vs. Stagnation)

   ይህ የእድገት ደረጃ ከ 40 አመት እስከ 60 አመት ባለው ጊዜ ውሥጥ ያለ የእድገት ደረጃ ነው፡ይህ ወቅት ሰዎች ስራ ይዘው ፣ትዳር ይዘው ልጅ ወልደው…ወዘተ የሚኖሩበት ወቅት ነው፡፡በዚህም የተነሳ ሰዎች ላሉበት ማህበረሰብ ማበርከት ስላለባቸው ነገር ያስባሉ ጥሩ አገር ተረካቢ ልጅ እንዲኖራቸው ከመፈለጋቸውም በላይ ባሉበት የስራ መስክ ለህብረተሰቡ ጠቃሚ ነገር መስራትን ይፈልጋሉ፡፡በህብረተሰብ የእለት ተእለት እንቅስቃሴ ውስጥም ንቁ ተሳታፊ ይሆናሉ፡፡ እነዚህን ነገሮች ማሳካት ያልቻሉ ሰዎች ውድቀትና ውጤታማ ያለመሆን ስሜት ይሰማቸዋል፡፡

8.መተባበር ወይም ተስፋ መቁረጥ( Ego Integrity vs. Despair)

   ይህ የእድገት ደረጃ ከ60 አመት በላይ ባለው ጊዜ ውሥጥ ያለ የእድገት ደረጃ ነው፡፡ ይህ እድሜ የጡረታ እድሜ ሲሆን ሰዎች ወደኋላ ተመልሰው የመጡበትን ሁኔታ የሚቃኙበት ጊዜ ያገኛሉ፡፡ ወደኋላ ተመልሰው የመጡበትን የሂወት መንገድ ሲቃኙ የስኬታማነት ስሜት ከተሰማቸው ከቀጣዩ ትውልድ ጋር በመተባበር ያላቸውን ነገር ለመጪው ትውልድ ማስተላለፍ ይፈልጋሉ ስኬታማ ያልሆኑ ከመሰላቸው ግን የተስፋ መቁረጥና የጥፋተኝነት ስሜት እንዲሁም ድብርት ሊሰማቸው ይችላል ከዚህም አለፍ ሲል ሞትን እስከ መፍራት ሊደርሱ ይችላሉ፡፡

ማጠቃለያ፡-የተስተካከለ ማህበራዊ እና ሀይለ-ስሜታዊ እድገት እንዲኖረን መሰራት ያለበት ከልጅነታችን ጊዜ ጀምሮ ነው፡፡ ከልጅነት ጀመሮ ከተሰራ ቀላል ይሆናል ነገር ግን አድገንም ቢሆን እራሳችንን የማስተካከል እድል አለን፡፡
በኤሪክሰን አባባል የዛሬ ጸሁፌን ላጠናቅ “ It is not toolate ” ክፈት / አስተያየት ይስጡ

2022-09-01 17:41:47 የልጆች ማህበራዊ እና ሀይለ-ስሜታዊ እድገት(social and emotional development)


   ማህበራዊ እድገት ለሰው ልጅ እጅግ በጣም አስፈላጊ ከሆኑ የእድገቶች አይነት ውስጥ አንዱ  ነው፡፡ማህበራዊ እድገት የሚጀምረው ልጆች ከተወለዱበት ጊዜ ጀምሮ ነው፡፡ልጆች ከተወለዱ ጊዜ ጀምሮ የምናደርግላቸው ነገሮች የልጆች ማህበራዊ እድገት ላይ የራሳቸው የሆነ አዎንታዊ ወይም አሉታዊ ተጽእኖ አላቸው፡፡በዚህ መስክ ብዙ የተመራመረው ተመራማሪ ኤሪክ ኤሪክሰን ሰዎች ከተወለዱበት ጊዜ አንስቶ እስከ እርጅና ድረስ ያለውን  የሰዎች የማህበራዊ እድገትን በስምንት ደረጃዎች ይከፍላቸዋል፡፡እነዚህ ስምንት ክፍሎች በእድሜ ክልል የተከፋፈሉ ሲሆን በአንደኛው ደረጃ ላይ ያለው የማህበራዊ እድገት ለቀጣዩ መሰረት ነው፡፡ ስምንቱን ደረጃዎች ከዚህ እንደሚከተለው እናያቸዋለን፡፡

1.ማመን ወይም አለማመን( Trust Versus Mistrust)

   ይህ የእድገት ደረጃ ልጆች ከተወለዱ ጀምሮ እስከ አንድ አመት ተኩል ባለው ጊዜ ውሥጥ ያለ የእድገት ደረጃ ነው፡፡በዚህ እድሜ ላይ ያሉ ልጆች ፍላጎታቸውን የሚገልጹት በማልቀስ ነው፡፡ በዚህ ወቅት በሚደረግላቸው እንክብካቤ መጠን እና ቀጣይነት ሌሎችን ማመን ይጀምራሉ፡፡በዚህ ወቅት ላይ በአግባቡ የሚፈልጉት ነገር ከተሟላላቸው አለምን ማመን ይጀምራሉ የደህንነት ስሜትም ይሰማቸዋል፡፡ ነገር ግን የሚፈልጉትን ነገር በአግባቡ እና ወጥ በሆነ መልኩ የማናሟላላቸው ከሆነ መጠራጠር እና መፍራት ይጀምራሉ፡፡በዚህም የተነሳ መጨነቅ፣ፍርሀት እና ከፍተኛ የሆነ እምነት ማጣት ሊታይባቸው ይችላል፡፡

2. በራስ መተማመን ወይም ማፈር እና እራስን መጠራጠር( Autonomy vs. Shame and Doubt)

   ይህ የእድገት ደረጃ ከ አንድ አመት ተኩል እስከ ሶስት አመት ባለው ጊዜ ውሥጥ ያለ የእድገት ደረጃ ነው፡፡በዚህ ጊዜ ውስጥ ልጆች መንቀሳቀስ የሚጀምሩ ሲሆን እቃ ማንሳት በአሻንጉሊት መጫወት ይፈልጋሉ፡፡ ምግብም እራሳቸው መመገብ ፣ልብሳቸውን እራሳቸው መልበስ….ወዘተ ይፈልጋሉ፡፡ እራሳችን እንስራ በሚሉበት ጊዜ እንዲሰሩ  የምናበረታታቸው ከሆነ በራስ የመተማመን ስሜታቸውን ያዳብራሉ፡፡እራሳቸውን ችለው በዚህ አለም ላይ የመኖር ስሜት ያድርባቸዋል፡፡ ነገር ግን የምንተቻቸው ከሆነ  እንዳይሰሩ የምንቆጣጠራቸው ከሆነ ወይም ሁሉንም ነገር እኛ የምንሰራላቸው ከሆነ ነገሮችን ለመሞከር ሲያፍሩ ወይም እራሳቸውን ሲጠራጠሩ ይታያሉ፡፡

3. መነሳሳት ወይም የጥፋተኝነት ስሜት መሰማት( Initiative vs. Guilt)

   ይህ የእድገት ደረጃ ከ ሶስት አመት እስከ ስድስት አመት ባለው ጊዜ ውሥጥ ያለ የእድገት ደረጃ ነው፡፡ልጆች በዚህ እድሜ መጫወት ይጀምራሉ፣ለሚሰሩት ስራ እቅድ ያወጣሉ፣ለጫወታ ይነሳሳሉ ሌሎችንም ያነሳሳሉ …ወዘተ ልጆች ይሄ እድል ከተፈጠረላቸው የተነሳሽነት ስሜት እና በራሳቸው ችሎታ የመተማመን ስሜት ይፈጠርባቸዋል፡፡ነገር ግን እገዳ የምንጥልባቸው ከሆነ ወይም የምንቀጣቸው ከሆነ የጥፋተኛነት ስሜት ይሰማቸዋል፡፡ በዚህም የተነሳ ነገሮችን በራሳቸው ለመስራት ከመነሳሳት  ይልቅ ሌሎችን መከተል ይመርጣሉ፡፡

4. በሰሩት ስራ መኩራት ወይም የበታችነት ስሜት መሰማት( Industry vs. Inferiority)

   ይህ የእድገት ደረጃ ከ ስድስት አመት እስከ አስራአንድ አመት ባለው ጊዜ ውሥጥ ያለ የእድገት ደረጃ ነው፡፡በዚህ እድሜ ክልል ውስጥ ያሉ ልጆች መደበኛ ትምህርት ይጀምራሉ፡፡ልጆች በዚህ የእድሜ ክልል ውስጥ ሲሆኑ በሰሩት ስራ የመኩራት ባህሪን ያሳድጋሉ፡፡ስራን ጀምረው ሲጨርሱ የኩራት ስሜት ይሰማቸዋል፡፡አስተማሪዎች ልጆችን በማነሳሳት እና ያሰቡትን ግብ እንዲያሳኩ ከማድረግ አንጻር ከፍተኛ አስተዋጾ አላቸው፡፡ በዚህም ልጆች ስራን እንዲሰሩ ከተበረታቱ እና በሰሩት ስራ ሽልማት ከተበረከተላቸው በራሳቸው ስራ የመኩራትን ባህሪ ያሳድጋሉ ከዚህም በተጨማሪ ያሰቡትን ግብ እንደሚያሳኩ በራሳቸው ላይ እምነት ይኖራቸዋል፡፡ነገር ግን በወላጅ ወይም በአስተማሪ ገደብ የሚጣልባቸው ከሆነ ወይም የሚቀጡ ከሆነ እራሳቸውን ይጠራጠራሉ፣የበታችነት ስሜት ይሰማቸዋል እንዲሁም የአቅማቸው ጫፍ ላይ ላይደርሱ ይችላሉ፡፡

5.ማንነትን መለየት ወይም ግራ መጋባት( Identity vs. Role Confusion)

   ይህ የእድገት ደረጃ ከ 11 አመት እስከ አስራስምንት አመት ባለው ጊዜ ውሥጥ ያለ የእድገት ደረጃ ነው፡፡ይህ ወቅት የጉርምስና ወቅት ነው፡፡ጉርምስና ልጆች ከህጻንነት ወደትልቅነት የሚተላለፉበት ድልድይ ነው ልጆች በዚህ ወቅት ላይ እራስን ችሎ መንቀሳቀስ፣ ወደፊት ምን መሆን እንደሚፈለጉ መወሰን ፣ጓደኞቻቸውን መምረጥ …ወዘተ ይፈልጋሉ፡፡ልጆች በዚህ ጊዜ ላይ በዙሪያቸው ያሉ አማራጮችን ከማየታቸውም በተጨማሪ እራሳቸውን መፈለግ ይጀምራሉ በዚህም የተነሳ እኔ ማነኝ የሚለውን ጥያቄ ይመልሳሉ አካባቢያቸው ይህን ካልፈቀደላቸው ግን ግራ መጋባት ይፈጠርባቸዋል ወደፊት ምን መሆን እንደሚፈልጉም አያውቁም፡፡ ክፈት / አስተያየት ይስጡ

2022-08-29 20:27:02 ልጆችን አክብሯቸው፤ ፍርሃት አልባ አ'ርጓቸው...

ልጆችን አክብሩ ምክንያቱም እነርሱ ለሕይወት ምንጭ ቅርብ ናቸው፤ እናንተ ሩቅ ናችሁ፡፡ እነርሱ ገና ኦርጅናል ናቸው፤ እናንተ አንደኛውን ቅጂ ከሆናችሁ ዘመንም የላችሁ፡፡ እና ደግሞ ልጆችን ማክበር ምን እንደሚፈጥር ታውቃላችሁ ? ፍቅር እና አክብሮታችሁ በተሳሳተ ጎዳና እንዳይነጉዱ ያድናቸዋል - በማስፈራራት ሳይሆን ፍቅር እና አክብሮታችሁ...

አያቴ ማለት ... ማንንም ልዋሽ እችላለሁ - እግዚአብሄርን ባገኘው እንኳ ምንም ሳይመስለኝ ልዋሸው እችላለሁ - አያቴን ግን፣ እጅጉን ስለሚያከብረኝ ፈጽሞ ልዋሸው አልችልም ! መላው ቤተሰብ እኔ ላይ ሲነሳ፣ መመኪያዬ ያ ሽማግሌ ነበር፡፡ እኔ ላይ የሚቀርበው ስሞታ እና የማስረጃ ናዳ ጉዳዩ አይደለም፡፡ “የፈለገውን ያድርግ፡፡ ካደረገው ትክክል ነው ማለት ነው፡፡ አውቀዋለሁ፤ ስህተት አይሰራም” ይልልኛል፡፡

እናም እርሱ እኔን ደግፎ ከጎኔ ሲቆም መላው ቤተሰብ ኩምሽሽ ይላል፡፡ እኔም ያደረግኩትን ሁሉ እነግረዋለሁ፡፡ እርሱም እንዲህ ይለኛል፣ “ምንም አታስብ፡፡ ተገቢ ነው የምትለውን ሁሉ አድርግ፡፡ እና ታዲያ አንተ ማድረግ ያለብህን ማን ሊወስንልህ ነው ? አንተ ባለህበት ሁኔታ፣ ባንተ ቦታ ... ካንተ ውጪ ማንም መወሰን አይችልም ... አንተ ነህ መወሰን ያለብህ፡፡ ትክክል ነው ብለህ የሚሰማህን ሁሉ አድርግ፤ እናም ሁሌም ከጎንህ መሆኔን አስታወስ፡፡ ምክንያቱም እኔ አንተን መውደድ ብቻ አይደለም አከብርሃለሁም...”

በሕይወቴ የታደልኩት ትልቁ ሐብቴ እርሱ ለእኔ ያለው አክብሮት ነበር፡፡ ሊሞት ሲል እኔ 80 ማይል በራቀ ቦታ ነበርኩ፡፡ ጊዜ የለኝም ቶሎ ድረስ ብሎ ላከብኝ፡፡ በሁለት ሰዓት ውስጥ ደረስኩ፡፡

ሞቱን አዘግይቶ እኔን እየጠበቀኝ ያለ ነበር የሚመስለው፤ እናም ዓይኖቹን ገልጦ እንዲህ አለኝ፣ “አንተ እስክትመጣ ነበር እንደምንም ትንፋሼን ያቆየሁት፡፡ አንድ ነገር ብቻ ልልህ እፈልጋለሁ - ከአሁን በኋላ ከጎንህ ቆሜ ልደግፍህ አልችልም - ግን ድጋፍ ያሻሃል፡፡ እናም አስታውስ ... የትም ልሁን የት፣ ፍቅሬ እና አክብሮቴ መቼም ቢሆን ካንተ ጋር ነው፡፡ ማንንም አትፍራ፤ ዓለምን ጨርሶ አትፍራ...”

አዎን የመጨረሻ ቃላቱ እኒህ ነበሩ፣ “ዓለምን ጨርሶ አትፍራ”
ልጆችን አክብሯቸው፤ ፍርሃት አልባ አድርጓቸው፡፡
ግን እናንተ ራሳችሁ በፍርሃት የተሞላችሁ ሆናችሁ ሳለ እንዴት ሆኖ ነው እነርሱን ፍርሃት አልባ ልታደርጓቸው የምትችሉት ?

ገና ለገና አባት፣ እናት ምናምን ስለሆናችሁ ብቻ አክብሩኝ አትበሉ፡፡

ይህን አመለካከት ለውጡትና አክብሮት ልጆቻችሁ ላይ የሚያመጣውን ለውጥ እዩ፡፡

ልጆች ... የምታከብሯቸው ከሆነ በጣም በጥንቃቄ ይሰሟችኋል፡፡ የምታከብሯቸው ከሆነ እናንተን እና አእምሯችሁን በጣም በጥንቃቄ ለመረዳት ይጥራሉ፡፡ መሆንም አለበት፡፡ እናም በምንም መንገድ የትኛውንም ነገር አትጫኑባቸው፡፡ በራሳቸው መረዳት የእናንተ መንገድ ትክክል እንደሆነ ተሰምቷቸው በዚያ መንገድ ከሄዱ፣ እውነተኛውን የነፍሳቸውን መልክ አያጡትም !

እውነተኛው እና ኦርጅናሉ የነፍስያ መልክ በሆነ መንገድ ስለተጓዙ አይጠፋም፡፡ ይልቁንም፣ ልጆች ያለፍቃዳቸው በግዳጅ ባልፈቀዱት መንገድ እንዲሄዱ ሲደረጉ ነው ኦርጅናሉን የነፍሳቸውን መልኩ የሚያጡት...

ፍቅር እና አክብሮት፣ ልጆች፣ በተዋበ መልኩ ስለዓለም የላቀ መረዳት እንዲኖራቸው፣ ይበልጡን ንቁ እንዲሆኑ ይረዳቸዋል - ምክንያቱም ሕይወት ውድ የሁለንተና ስጦታ ነች - ልናባክናት አይገባም፡፡

ምንጭ - Osho, From Darkness to Light, Ch 6, Q 1 (excerpt) ክፈት / አስተያየት ይስጡ

2022-08-29 16:33:04 ችግሮችን ከመፍታት ይልቅ ችግሮችን ማስወገድ ተማር!!

ጥበብ ሕይወትን የምንቀዝፍባቸው ክህሎቶች መለኪያ ነው። ችግሮችን አስቀድሞ መከላከል ከተፈጠሩ በኋላ ከመፍታት የተሻለ ጥበብን ይጠይቃል፡፡እውነታው ሕይወት ከባድ መሆኗ ነው፡፡ ችግሮች በሁሉም አቅጣጫ በየጊዜው ይተኮሱብሃል፡፡ እጣ ፈንታ መርገጫህ ስር ጉድጓዶችን ልትቆፍርብህ ወይም መሿለኪያዎችህን ልትዘጋብህ ትችላለች። ይህንን መቀየር አትችልም፡፡ አስቀድሞ አደጋ ያለው የት ጋር እንደሆነ ከተረዳህ ግን ወዳንተ እንዳይመጣ ለማጠር እድል ይኖርሃል፡፡ በዚህ መንገድ መሰናክሎችን ሁሉ ማስወገድ ትችላለህ፡፡ ይህንን ሀሳብ አልበርት አንስታይን እንዲህ ያስቀምጠዋል፡፡ “ጎበዝ ሰው ችግሮችን ይፈታል፤ ጥበበኛ ሰው ግን ችግሮችን ያስወግዳል፡፡”

ችግሩ ችግሮችን ማስወገድም የሚወደስ ነገር አለመሆኑ ነው፡፡ ሁለት ፊልሞችን አስብ፡፡
1.በመጀመሪያው ፊልም ውስጥ አንድ መርከብ ከበረዶ ክምር ጋር መጠነኛ ግጭት ይገጥመዋል፡፡ መርከቡም ይሰምጣል። በዚህ ጊዜ የመርከቧ ካፒቴን ራስ ወዳድነት በሌለበት መልኩ ራሱን አበርትቶ ተሳፋሪዎቹን ሁሉ ከመስመጥ ይታደጋቸዋል፡፡ መርከቧ ለዘለዓለሙ ከመሰወሯ ከደቂቃዎች በፊት ሁሉንም ተጓዦች በማዳን ከጀልባው ላይ ዘሎ ወደ ሕይወት አድኑ ቦቴ ውስጥ በመግባት የመጨረሻው ሰው ነበር።

2.በሁለተኛው ፊልም ውስጥ ደግሞ እንዲህ ሆነ፡፡ መርከበኛው መርከቧ ከበረዶ ክምሩ ጋር ከመጋጨቷ በፊት አስተውሎ በቂ ርቀት ላይ እንድትቆም አደረጋት፡፡

የትኛውን ፊልም ለማየት የበለጠ ትከፍላለህ?በእርግጠኝነት የመጀመሪያውን ፊልም፡፡ ሌላ ጥያቄ ደግሞ ላንሳልህ፡፡ አንተ በመርከቧ ውስጥ ተጓዥ ብትሆን ኖሮ በየትኛው ፊልም ሁኔታ ውስጥ መሆንን ትመርጣለህ? ያለ ምንም ጥርጥር ሁለተኛው ፊልምን።

እነዚህ ምሳሌዎች እውነተኛ ገጠመኞች ናቸው ብለን እናስብ፡፡ ቀጥሎ ምን ይፈጠራል? የመጀመሪያው ፊልም ውስጥ ያለው ካፒቴን የቴሌቭዥን ፕሮግራም ላይ ይጋበዛል። ምናልባት መርከበኛነቱን ትቶ አነቃቂ ንግግሮችን እያደረገ ሕይወቱን መምራት ሊጀምር ይችላል። መንገድም በስሙ ሊሰየምለት ይችላል፡፡ ልጆቹም (ምናልባት ለመጀመሪያ ጊዜ) በአባታቸው ይኮራሉ፡፡ የሁለተኛው ፊልም ውስጥ የሳልነው ካፒቴንስ? ከስራው በጡረታ እስኪገለል ድረስ ችግሮች እንዳይከሰቱ በቅድመ ጥንቃቄ የመርከበኝነት ስራውን ይሰራል። መርሁም “ከ20 ጫማ እርቀት ላይ ልታልፈው የምትፈራውን ነገር በ500 ጫማ እርቀህ እለፈው” የሚለው የቻርሊ ሙገር የሕይወት መርህ ይሆናል፡፡

እንግዲህ ተመልከት፡- የሁለተኛው ፊልም ካፒቴን ከመጀመሪያው ፊልም ካፒቴን በሚታይ መልኩ የሚሻል ቢሆንም እኛ የምናከብረውና የምናደንቀው ግን የመጀመሪያውን ፊልም ካፒቴን ነው፡፡ ለምን? በቅድመ ጥንቃቄ የሚመጣ ስኬት ለውጪው ዓለም እይታ የሚጋለጥ አይሆንም፡፡

ጋዜጠኞች አስቸጋሪ ሁኔታዎች እንዳይመጡ ካረጉ በሳል ሰዎች ይልቅ ችገሮችን የቀለበሱ የሥራ መሪዎችን ነው የሚያሞካሹት ።የቅድመ ጥንቃቄ ስኬቶች ለውጪው ዓለም የማይታዩ ባለመሆናቸው ምክንያት ሳይታዩና ሳይወደሱ ይኖራሉ፡፡ የእንደዚህ አይነት ስኬቶት ባለቤቶችን ጥበብ የሚያውቁት በእሱ ዙሪያ ያሉ የቡድኑ አባላት ብቻ ናቸው። እነሱም ቢሆን በተወሰኑ መልኩ ቢያውቁት ነው፡፡

የአንተስ ሕይወት? አመንክም አላመንክም ከስኬቶችህ ሁሉ 50% የሚሆኑት የቅድመ መከላከል ጥንቃቄህ ውጤቶች ናቸው፡፡ ሁላችንም እንደምናደርገው ሁሉ አንተም አንዳንድ ነገሮችን በንዝህላልነት ልታደርግ ትችላለህ፡፡ ይህ እንዳለ ሆኖም ግን ስህተቶችን ላለመስራት ሁልጊዜም ትጠነቀቃለህ፡፡ በአርቆ · አሳቢነት ያስወገድካቸውን በስራህ፣ በትዳርህ፣ በትምህርትህ ወይም በሌላ የሕይወትህ ዘርፍ ሊገጥሙህ የነበሩ ችግሮችን አስብ፡፡

ጥንቃቄ (prevention) ቀላል ነገር አይደለም፡፡ ቅድመ ጥንቃቄ በባህሪው ቀድሞ ማየት (imagination) ይጠይቃል ቀድሞ መረዳትና የሚመጣውን መገመት ደግሞ ብዙውን ጊዜ አዛብተን የምንረዳቸው ነገሮች ናቸው፡፡ ይህ አዲስ ሀሳብ አያመጣልንም፡፡ በዓይነ ህሊና ማየት (imagination) ማለት የመጨረሻው ፍትሃዊ ነገር ሆኖ እስክናይ ድረስ ሊሆኑ የሚችሉት ነገሮች ውጤቶችና የመፈጠር እድላቸውን ሁሉ እንዲያስብ አዕምሯችንን ማሰራት ማለት ነው፡፡ ስለሆነም አስቀድሞ ማየትና መገመት ከባድ ስራ ነው።

በተለይ ጉዳዩ ስለአደገኛ ችግሮች ሲሆን ደግሞ ቀድሞ የመገመት ሥራ የበለጠ ፈታኝ ይሆናል፡፡ ሊመጡ እድል ባላቸው ችግሮች ላይ ሁሉ እየተጠነቀቅክ መኖር ይጠበቅብሃል? ይህስ ሁልጊዜ የተጨናነቀ ሰው ሆነህ እንድትኖር አያደርግህም? ተሞክሮዎች የሚያሳዩት እንደዚያ እንዳልሆነ ነው፡፡ ቻርሊ ሙገር እንዲህ ይላል “በሕይወት ዘመኔ ሁሉ የሚመጠብኝን አደጋዎች ስገምት ኖሬያለሁ፡፡ ሁልጊዜ ይሄንን እያሰብኩ፣ አደጋዎች ከመጡም እንዴት መመከት እንዳለብኝ እያሰላሰልኩ መኖሬ ደስተኛ እንዳልሆን አላደረገኝም፡፡” ክፈት / አስተያየት ይስጡ

2022-08-28 14:05:10 እምቢ የማለት ጥበብ

በዓለማችን ላይ ብዙ ሰዎችን ከሚያጠቁ አጉል ጠባዮች አንዱ ‘አይሆንም’ ማለት ያለመቻል ነው፡፡ በዚህ ምክንያት በፍጹም ማድረግ የማይፈልጉትን ነገር የሚያደርጉ ሰዎች እጅግ ብዙ ናቸው፡፡ ከቤተሰብ፣ ከዘመድ ወይንም ከጓደኛ በሚኖር ጫና ብቻ ‘አይሆንም’ ወይም ‘አልፈልግም’ ማለት ሳይችሉ ቀርተው እና የማይፈልጉትን ትምህርት መርጠው ሙሉ ሕይወታቸውን በማይሆን አቅጣጫ የቀየሱ ሰዎችን በግሌ አውቃለሁ፡፡ ይህ ‘እምቢ’ ማለት አለመቻል እጅግ አደገኛ ከመሆኑ የተነሳ አንዳንድ የሥነ-ልቡና ምሁራን ‘ከሌሎች ውጫዊ ተጽእኖ መላቀቅ መቻል አንድ ሰው በሕይወቱ ከሚያስመዘግባቸው ድሎች እጅግ የላቀው ነው’ እስከማለት ደርሰዋል፡፡

አንድ ሰው ከእንቅልፉ ሲነሳ ብዙ ነገሮች ጊዜውን እንዲሰጣቸው ይፈልጋሉ፡፡ ስልኩ ይጮሃል፣ በኢሜይል መልእክት ይመጣለታል፣ የቅርብ ጓደኛው ቀጠሮ ለማስያዝ ይሞክራል፣ አለቃው ተጨማሪ ሥራ ሊያዘው ያስጠራዋል… ወዘተ፡፡ በዚህ መልኩ የዚያን ሰው ጊዜ ለሚፈልጉ ነገሮች በአጠቃላይ ‘እሺ’ የሚል ከሆነ መሥራት ያለበትን ሥራ በተገቢው ፍጥነት እና ጥራት መሥራት አይችልም፡፡ ሁሉንም እሺ በማለቱ እጅግ ይጨናነቃል፡፡ አንድ ሰው የራሱን ሥራ ጨርሶ ሌላ ፕሮግራም እያለው፤ ሥራውን ሳይሠራ የቀረ ባልደረባው ‘ይህቺን ሥራልኝ’ ቢለው እና ‘ይቅርታ፣ ዛሬ ሌላ ፕሮግራም አለኝ…’ ማለትን ሳይችል ቀርቶ ‘እሺ’ ቢለው፤ ፕሮግራሙን ማበላሸቱ አይደለም? በዚህ ምክንያት የሚበላሹ ነገሮችን ለማዳን እና ጊዜን በአግባቡ ለመጠቀም ካስፈለገ በተገቢው መንገድ ‘አይሆንም’ የማለት ጥበብን መልመድ የግድ ይላል፡፡

ሰዎች ‘አይሆንም’ ማለት የማይችሉባቸውን ምክንያቶች የሚዘረዝሩ የሥነ-ልቡና ምሁራን ሁለት ዋና ምክንያቶችን ይጠቅሳሉ፡፡ የመጀመሪያው ሌላኛውን ሰው ለማስቀየም አለመፈለግ ነው፡፡ በተለይ ደግሞ ይህ ሰው እጅግ የምንወደው፣ የምናከብረው ወይም ደግሞ የቅርብ ሰው ከሆነ ‘እንዳላስቀይመው’ ወይንም ‘እንዳላስቀይማት’ በሚል ሰበብ ሁሉንም ነገር እሺ ማለት ያለብን ይመስለናል፡፡ ሁለተኛው ምክንያት ደግሞ ከዚያ ሰው ጋር ዘላቂ የሆነ ግንኙነት እንዲኖረን የምንፈልግ ከሆነ፤ ‘አይሆንም’ ማለታችን ግንኙነታችንን ክፉኛ እንዳይጎዳው ከማሰብ ነው፡፡ ከዚህ በተጨማሪ ክፉ ሆኖ መታየትን በመፍራት፣ ከቡድን መገለልን በመፍራት፣ ግጭትን በመፍራት እና እድል ያመልጠኛል በሚል ፍራቻ ሰዎች ‘አይሆንም’ ማለት ሊከብዳቸው ይችላል፡፡ በተለይም ደግሞ በአስተዳደጋቸው ወቅት ‘አንተ! እሺ በል እንጂ!’ ወይም ‘አንቺ! እሺ አትይም?’ እየተባሉ ያደጉ ልጆች፤ እንዲህ አይነት ‘እሺ ባይነት’ ጠባይ ሊያጠቃቸው እንደሚችል የዘርፉ ምሁራን ያብራራሉ፡፡

በመሆኑም፤ በተገቢው መልኩ ‘አይሆንም’ የማለት ጥበብን ማዳበር ጊዜያችንን በፈለግነው መልኩ እንድንጠቀም ከማስቻሉም በተጨማሪ ከአላስፈላጊ ተጽእኖ እና ከሚፈጠር ጭንቀት ሊያድነን ይችላል፡፡ ለዚህ ማሳያ ይሆን ዘንድ ዶ/ር ኢዮብ ማሞ ‘የጊዜ አጠቃቀም ጥበብ’ በሚለው ላይ ‘ትሁት አምቢታ’ እንዴት ሊጠቅመን እንደሚችል አስቀምጧል፡፡ ፊት ለፊት ‘እምቢ’ ማለት የእውነትም ሰዎችን የሚያስቀይም ሊሆን ቢችልም፤ የትሁት እምቢታ ጥበብን ከለመድን ግን በቀላሉ ማስተናገድ እንችላለን፡፡ ምስሉን አብሬ አያይዣለሁ፤ በፓውሎ ኮኤልሆ ጥቅስ ጽሑፉን ልጠቅልል፡፡

‘ለሌሎች ‘እሺ’ ስትል ራስህን ግን ‘እምቢ’ እያልክ አለመሆኑን አረጋግጥ’ ፓውሎ ኮኤልሆ

@ermiyee1
@ermiyee1 ክፈት / አስተያየት ይስጡ

2022-08-28 13:46:45 የሆኑ ባልና ሚስት ወደ አንድ እንስሳት ማቆያ ፓርክ በአጋጣሚ ይሄዳሉ እንዳጋጣሚ አንድ ዝንጀሮ አብራው ካለች ጓደኛው ጋር እየተጫወተ የነበረ ዝንጀሮ አገኙ ።

የሰውየው ሚስት እንዲህ አለች “ምን አይነት ፍቅር ነው ! እንዲህም አይነት አለ እንዴ ? አለች በመገረም! "

ከዚያም ወዲያው ዞዞር ማለት እንደጀመሩ ሌላ አንድ ወንድና ሴት አንበሳ ጎን ለጎን ተለያይተው ተቀምጠው አዩና........ ሚስትየዋ “ፍቅር የሌለበት ምን አሳዛኝ ትዕይንት ነው አለች በማዘን "

ይህን የሰማው ባልተቤቷ እንዲህ አላት
“ያን ድንጋይ ወደ አንበሳይው ወርውሪና ተመልከቺ አላት ” እሷም ድንጋዩን አንበሳው ላይ ስትወረውር አንበሳው አንበሳይቱን ለመከላከል ሲጮኽ አየች

ባልየውም ከዝንጀሮዋ ጋርም ድገሚው አላት እሷም ለአንበሳው እንዳደረገችው ድንጋዩን ወደ ዝንጀሮው ስትጥል ወንዱ ዝንጀሮ ዘሎ ዛፍ ላይ ወጣና ራሱን ለማዳን ሴቷን ጥሎ ሄደ ።

ባሏም እንዲህ አላት “በምታይው ነገር አትታለይ ያየሺው ሁሉ ፍቅር አይምሰልሽ ፡፡ ብዙ ጊዜ ባዶ ልብን ለመደበቅ ሲባል የሚያታልል ገጽታ ወይም አስመሳይነት ይኖራል ፡፡

ሌሎች ደግሞ አሉ ዝምተኞች ፣ ልባቸው ግን ቅን የሆነ በአሁኑ ጊዜ ፣ እንደዝንጀሮው የሆኑ ብዙዎች አሉ ፣ ጥቂቶች ደግሞ እንደ አንበሳው የሆኑ አሉ።

T.me/ermiyee1 ክፈት / አስተያየት ይስጡ

2022-08-28 09:31:40 “የውሻዬና የመኪናው ነገር”
የምትፈልገው (Your wants) እና የሚያስፈልግህ (Your needs)

አንድ ሰው ለወዳጁ እንዲህ ብሎ አጫወተው፡፡ “የውሻዬና የመኪናው ነገር በጣም ነው ያደከመኝ፡፡ በሰፈራችን ያለፈው መኪና ሁሉ አንድም አይቀረውም፣ በብርቱ እየተከታተለ ይጮሃል፡፡ ያየውን መኪና ሁሉ ለተወሰነ ርቀት ካሳደደው በኋላ ተመልሶ ይመጣል፡፡ ከጥቂት ጊዜ በኋላ እንደገና ሌላ መኪና ሲመጣ ጠብቆ ያንኑ ነገር ይደግማል፡፡ ስለእርሱ እኔ ደከመኝ”፡፡

ወዳጁ ይህንን ከሰማ በኋላ አንድ ጥያቄ ጠየቀው፣ “ለመሆኑ፣ ውሻህ መኪናን አባርሮ የሚደርስበት ይመስልሃል?” ሰውዬውም መልሱ እንዲህ የሚል ነበር፣ “እኔን የጨነቀኝ የመድረስ ብቃቱ አይደለም፣ ከዚህ በፊት በቀስታ የሚሄዱ መኪናዎች ላይ ሲደርስ አይቻለሁ፡፡ ልክ ሲደርስባቸው ፊቱን አዙሮ ይመለስና ሌላ የሚያልፍን መኪና እንደገና ለማሳደድ ይጠብቃል፡፡ አንዳንድ ጊዜ ቀኑን ሙሉ ይህንን ሲያደርግ ነው የሚውለው፡፡ ውሻዬ የሰው ቋንቋ ቢችል፣ ጊዜህን በአግባብ ተጠቀምበት ብዬ እመክረው ነበር”፡፡

“የስኬት የመጀመሪያው መመሪያ ፍላጎት ይባላል - የምትፈልገውን ማወቅ፡፡ ፍላጎት አለህ ማለት ዘርህን ዘራህ ማለት ነው” - Robert Collier

አሁን በጽኑ የምትፈልገውን ነገር ቆም ብለህ አስበው፣ ብትደርስበትና በእጅህ ቢገባ ምን ታደርጋለህ? ለዚህ ጥያቄ ብዙም ሳታስብና ሳትጨናነቅ ቁልጭ ያለ መልስን መስጠት ካልቻልክ ምናልባት የምትከታተለው ነገር ለምንም ጥቅም የማይውል ጊዜ ማባከኛ ነው፡፡ ብዙ ሰዎች የሚፈልጉት ነገር ምን እንደሆነ አያውቁትም፡፡ በአንድ ነገር ላይ ገንዘባቸውን ያፈስሳሉ፣ ጊዜአቸውን ይሰዋሉ፣ ብዙ ኪሎ ሜትር ይጓዛሉ፣ ከዚያም ያንን ነገር ልክ እጃቸው እንዳስገቡት ሲያውቁ ቀድሞውንም የሚፈልጉት ነገር እንዳልሆነ ይገነዘባሉ፡፡ ከዚያም እንደገና ሌላ ነገር መከተል ይጀምራሉ፤ አዙሪቱ ይቀጥላል፡፡

አሁን በብርቱ የምትከታተለውን፣ ብዙ ጊዜህን የምታጠፋበትን፣ ገንዘብህን ያባከንክበትን ነገር በእጅህ ብታስገባው፣ በህይወትህ ካለህ ዋነኛ ዓላማ ጋር አብሮ ካልሄደና ወደትምሄድበት የሕይወት አቅጣጫ አንድ እርምጃ ካላራመደህ ጊዜህን በከንቱ እያባከንክ ነው፡፡ የማያዛልቅን ነገር ማባረር! የምትከተለው ነገር በምትሄድበት የሕይወት ዓላማ አቅጣጫ መሆኑን ማወቅ የአዋቂነት ሁሉ አዋቂነት ነው፡፡ መመለስ ያለበት ጥያቄ፣ “የምትፈልገው ነገር ምንድን ነው?” የሚለው ነው፡፡

ፍላጎትህን በማወቅ ስትደላደል ሌላው ሰው ላይ አይተኸው ያማረህ ነገር ሁሉ የግድ እንደማያስፈለግህ ማስተዋል ትጀምራለህ፡፡ በሕይወትህ በምትፈልገው (Your wants) እና በሚያስፈልግህ ነገሮች (Your needs) መካከል ለይተህ ማወቅ በብዙ ይጠቅምሃል፡፡ የምትፈልገው ነገር ሁሉ የሚያስፈልግህ ላይሆን ይችላል፤ በተቃራኒው ደግሞ አንዳንድ ጊዜ የሚያስፈልግህን ሁሉ ለጊዜው ላትፈልገውና ልታስተላልፈው ትችላለህ፡፡ የእነዚህን ሁለት ነገሮች ልዩነት ጥርት ባለ መልኩ መለየት አለብህ፡፡ የምትመኛቸውንና የምትፈልጋቸውን ሁሉ ከመከተል ይልቅ በሚያስፈልጉህ ነገሮች ላይ ማተኮር ስትጀምር፣ ሁኔታው ለሌሎች ግር ቢልም ለአንተ ግን እውነታው ኩልል ብሎ ይታይሃል፡፡

በሚያስፈልገንና በእርግጥም ብንደርስበትና በእጃችን ብናስገባው ለመልካም አላማ ልንጠቀምበት በምንችል ነገር ላይ ትኩረትን መጣል ራስን የመግዛት ዲሲፕሊን ይጠይቃል፡፡ ራስን የመግዛት ዲሲፕሊን የንግስና ሁሉ ንግስና ነው፡፡

“እኔ በእርግጥ ንጉስ ነኝ፣ ምክንያቱም ራሴን መግዛት አውቅበታለሁና” - Pietro Aretino

T.me/ermiyee1 ክፈት / አስተያየት ይስጡ

2022-08-28 07:48:29 እውነተኛ ፍቅር- ፕሌቶ

ግሩም ከሆነ የፍልስፍና እሳቤዎች አንዱን ፕሌቶ ከክርስቶስ ልደት 385 ዓመታት በፊት በጻፈው The symposium መጽሐፍ ውስጥ እናገኘዋለን። ይህ መጽሐፍ በታላቁ የቲያትር ደራሲ አጋቶን ቤት ስለተዘጋጀ የራት ግብዣ ያትታል። ብዙ ጠቢባን ጣፋጭ ምግብን ሊመገቡ፣ ወይን ሊጠጡ እና ቁምነገር ሊያወጉ ታደሙ፡፡ በወንበሮቻቸውም ላይ እንዳሉ የተጠበሱ ምግቦችን እና ጣፋጭ አትክልቶችን መመገብ ጀመሩ፤ ግማሾቹ የወይኑ ስካር በአናታቸው ላይ ይወጣ ጀምሯል። እናም የድግሱ አዘጋጅ የነበረው አጋቶን ሁሉም እየተነሱ ስለ ኤሮስ ወይም ስለ ፍቅር የሚስማቸውን እንዲናገሩ ጋበዛቸው፡፡ እናም ፕሌቶ ንግግር ማድረግ ጀመረ፤ ፍቅርን በሁለት ከፈለው -

የመጀመሪያው ምድራዊ ፍቅር ሲሆን፣ ሁለተኛው ፍጹም ንጹህ የሆነ መለኮታዊ ፍቅር ነው፡፡
ምድራዊ ፍቅር የፍቅር መነሾ ነው፡፡ ልክ መስላል ላይ የመጀመሪያውን ደረጃ እንደምንወጣው ሁሉ፣ ይህም ወደ ፍጹማዊ ፍቅር የሚያደርስ ጅማሮ ነው:: በውስጡም ወሲባዊ ፍላጎት እና ምኞትን ይይዛል። ይህ ፍቅር የሚገናኘው ከሰውነት አቋም እና ከፊት ማማር ጋር ስለሆነ፤ ቆዳ ሲሸበሸብ፣ ጸጉር ሲሸብት የሚጠፋ ፍቅር ነው።

ንጹህ ፍቅር - በአንጻሩ ከነፍስያ ጋር ይቆራኛል። በዚህ ፍቅር ውስጥ ስንሆን ከፊት ገጽታም በላይ ጠልቀን የምንገባበት እና ስለ ሰውነት መቀየር ግድ የማይሰጠን እንሆናለን፡፡ ይህ ሁለት ነፍሶች በፍቅር የሚወድቁበት ቦታ ነው።
ዛሬ ላይ እንደዚህ አይነቱን ፍቅር ለመግለጽ platonic love የሚል ቃልን እንጠቀማለን፡፡

ፕሌቶ የፍትወት ፍላጎትንም ይቅር አስፈላጊ አይደለም አላለም። ይልቁኑ አንድን ሴት በመልኳ ተማርከን ልንቀርባት እንችላለን፤ ሆኖም ይህን ምድራዊ ፍቅር ንጹህ ወደሆነው መለኮታዊ ፍቅር ማሻገር ይጠበቅብናል፡፡ ፍቅራችን ከሰውነቷ ጋር ብቻ መሆን የለበትም። ከዚህም በላይ ነፍሶቻችን ሊቆራኙ ይገባል። በእርጅና ዘመናችን አብሮን የሚሆን እና ከውበታችን መክሰም ጋር የማይጠፋ ፍቅር ውስጥ መሆን አለብን።

እውነተኛ ፍቅር እውር አይደለም፤ ሆኖም በማስተዋል እና በጥበብ ይመራል፡፡ ከመልክ፣ ከቁንጅናም በላይ ይሄዳል።የተጣመሩ ነፍሳት ፍቅራቸው ከምድራዊው ዓለም አይደለም::

T.me/ermiyee1 ክፈት / አስተያየት ይስጡ

2022-08-27 17:47:24 ጊዜህን በርካሽ ዋጋ አትሽጥ!!

"ሴኔካ አካላዊ ንብረቶቻችንን መጠበቅ ላይ ጥሩ የሆንነውን ያህል፣ አእምሯዊ ድንበሮቻችን ማስመር ላይ ግን ግድ የለሽ መሆናችንን . ያስታውሰናል። ማንም እንዳሻው ድንበራችንን አልፎ ሲገባ አንቃወመውም: ንብረት ተመልሶ ሊገኝ ይችላል፤ እንዲያውም ገና ብዙ የምድር ሃብቶች በሰው አልተነኩም። ጊዜ ግን? ጊዜ ፈጽሞ ሊተካ የማይችል ሀብታችን ነው፤ ተጨማሪ መግዛት አንችልም፡፡ ማድረግ የምንችለው በተቻለ መጠን ለመቆጣጠር ጥረት ማድረግ ብቻ ነው፡፡"

"በሕይወታችን ውስጥ ሌሎች ጣልቃ እንዲገቡ በቀላሉ እንፈቅዳለን፤ የከፋው ነገር ደግሞ በአብዛኛው ጊዜያችንን ሊያጠፉት ለሚችሉት ሰዎች መንገድ የምናመቻች መሆናችን ነው። ማንም ሰው ለአላፊ አግዳሚው ገንዘቡን አይሰጥም፤ ግን እያንዳንዳችን ለምን ያህል ሰዎች ሕይወታችንን ሰጥተናል!ለንብረትና ለገንዘብ እጃችን አይፈታም፣ ሁላችንም እጅግ ስስታሞች መሆን ለሚገባን ለሚባክን ጊዜ ግን የምናስበው እጅግ ትንሽ ነው።”
- ሴኔካ

"የሕይወታችንን ቀናት ልክ እንደ ገንዘባችን አንመለከተም? በትክክል ለምን ያህል ቀናት በሕይወት እንደምንቆይ ስለማናውቅ፣ አንድ ቀን የምንሞት የመሆኑን ሀቅ በቻልነው ሁሉ ላለማሰብ ስለምንሞክር፣ ጊዜያችንን በነጻነት ለማባከን ፍቃድ የተሰጠን ይመስለናል። እዚህ ላይ እኔ በምትኩ የማገኘው ምንድነው?” ብለን እምብዛም ሳንጠይቅ በዚያችው ባለችን ጊዜ ላይ ሰዎችና ክስተቶች ጊዜያችንን እንዲሰርቁን እንፈቅድላቸዋለን፡፡"


"እንዴት እንደምትጠቀምበት ካወቅክ፣
ሕይወት ረጅም ነው ነገሩ፣ ለመኖር ያለን ጊዜ አጭር ስለመሆኑ ሳይሆን ብዙውን ያባከንነው ስለመሆናችን ነው። በደንብ ከተጠቀምንበት ሕይወት በበቂ ሁኔታ ረጅም ነው ብዙ ታላላቅ ነገሮችን ለመስራት በበቂ ሁኔታ ተለክቶ የተሰጠ ነው። በድሎትና ችላ በማለት ውስጥ ካባከንነው፣ መልካም ፍጻሜ ለማግኘት ካልሰራን፣ በመጨረሻ ማለፉን እንኳን ከመረዳታትን በፊት አልፎ እናገኘዋለን። ስለዚህ የተቀበልነው ሕይወት አጭር አይደለም፤ አጭር ያደረግነው እኛ
ነን።”
-ሴኔካ

ስለዚህ ዛሬ ራስህን ስትጣደፍ ወይም “በቂ ጊዜ የለኝም፡፡” የሚሉትን ቃላት ስትናገር ብትሰማው፣ ቆም በልና ጥቂት ሰከንዶች ውሰድ፡፡ ይህ እውነት ነው? ወይስ ብዙ አላስፈላጊ ነገሮች በመስራት ተጠምደህ ነው? በእርግጥ ውጤታማ ነህ፣ ወይስ በሕይወትህ ውስጥ ብዙ የባከነ ነገር እንዳለ ትገምታለህ? በህይወታችን አብዛኛውን ጊዜ  የምናባክነው በማይጠቅሙን ሀሳቦች እና በማይረቡ ነገሮች ላይ ነው። እያንዳንዱን ደቂቃ የምንጠቀም ቢሆን ምን ያህል ጊዜ ሊተርፈን እንደሚችል አስቡ!!


"እንዲህም እላለሁ እንዲት ቀንም ቢሆን አልሰጥም - ማንም ቢሆን አንድ ቀኔን ሊመልስልኝ አይችልምና!!



@ermiyee1
@ermiyee1 ክፈት / አስተያየት ይስጡ

2022-08-27 05:46:26 ነፃነትህን አትጣ!

የማይመለከታቸው ሰዎች ስላንት ስላወቁ ከጉዳት ውጪ የምትጠቀመው ነገር የለም ። በገዛ ፍቃድህ ነፃነትህን ማጣት ከፈለክ ሁሉ ነገርህን ግልፅልፅ ማድረግ ትችላለህ ። በነፃነት የእራስህን ህይወት ብቻህን ማጣጣም ከፈለክ ግን የግል ጉዳይህን በየቦታው ከማውራት ተቆጠብ ። ምናልባት የመናገርህ ምክንያት ምንያክል ደስተኛ እንደሆንክ ሰዎች እንዲያውቁልህ ሊሆን ይችላል ፤ ከእነርሱ የተሻለ ነገር እንደምታገኝ ለማሳወቅም ይሆናል ። ነገር ግን ዝምታቸው ካንተ በታች እንደማያደርጋቸው አስታውስ ። እንዳንተ ያደረጉትን ፣ ያሳለፉትን ነገር ሁሉ ካልተረኩ ካንተ እንደማይሻሉ ልታውቅ አትችልም ።

አዎ! ጀግናዬ..! ነፃነትህን አትጣ ፤ ዋጋውን አታጉድለ ። እያንዳንዱን ጉዳይህን መንገድ ላይ አታውጣው ፤ እወቁልኝ አታብዛ ። የማይመለከታቸውና ላንተ ህይወት መቃናት ምንም አስተዋፅኦ የማያደርጉ ሰዎች ስላንተ አዲስ ስራ መጀመር ብታሳውቃቸው ምን ታገኛለህ ? ምንም ፤ ነገር ግን ምናልባት ስራው እንዳሰብከው ባይሆንና ባይሳካልህ ሃፍረቱና ሰቀቀኑ መግቢያ ያሳጣሃል ። ስላንተ ህይወት ቅንጣት የማይገዳቸው ፣ ያንተ ደስታ ፣ ያንተ መረጋጋት ፣ ያንተ ወዳጅ ማፍራት ምናቸውም ያልሆኑ ሰዎች የፍቅር ህይወት መጀመርህን ቢያውቁ ምን ይጠቅምሃል ? ምንም ። ይልቅ በፈቃድህ የይሉኝታ ጥርስ ውስጥ ትገባለህ ፤ ነፃነትህን ታጣለህ ፤ ከእራስህ ደስታ በላይ የእነርሱን ወሬ ትፈራለህ ።

አዎ! ሁሉ ነገርህን ለማርከስ አትጣደፍ ። በሚስጥር የተያዘና በብዙዎች አፍ ያልገባ ነገር ቢበላሽም በቀላሉ ይታረማል ፤ ባይሳካም ሳይታወቅ ይቀራል ። ገሃድ መውጣት ያለበቻው ነገሮች በጊዜያቸው ገሃድ ይወጣሉ ። ያንተ ያለጊዜው አደባባይ ማውጣት ሌላ ጣጣ ይዞብህ እንደሚመጣ አትጠራጠር ። በግልህ ማጣጣም ያለብህን ነገር አጣጥም ፤ መሰረቱን ስትይዝና በጣም እርግጠኛ ስትሆን ብቻ በኩራት ማውራት ትጀምራለህ ። ከሰዎች ጫና መዳን ከፈለክ ለእራስህ ሚስጥረኛ ሁን ፤ ብትጠየቅም ጊዜውን ጠብቅ ፤ ብትገደድም ለምታገኘው ንፁ ደስታ ቅድሚያ ስጥ ።

አዎ! የምታሳውቀው እርግጠኛ ስትሆን ፣ ለምታምነውና ሊረዳህ ለሚችል ሰው ብቻ ነው ። ከሁሉም ቀዳሚው ከሁኔታው ጋር እራስህን ማቆራኘትና ማወዳጀት ነው ። ፍቅሬን እወቁልኝ አትበል ፤ ዝናዬን አክብሩልኝ አትበል ፤ ሃብቴን እዩልኝ አትበል ፤ ንብረቴን ቁጠሩልኝ አትበል ። "በለፈለፉ በአፍ ይጠፉ" ከሚለው ድንቅ አባባል ተማር ። በግል ጉዳይህ አትደራደር ፤ ለጊዜ ደስታህንም በሚስጥር አጣጥም ፤ ህይወትህን ለእራስህ ኑር ። በጊዜና በሰዓቱ ነገሮች በእራሳቸው ግልፅ እየሆኑ ይመጣሉ ።
═════════❁✿❁ ═════════
አንብባችሁ #ሼር አላደርግ ስትሉ #ብሞት እንኳን #የማትቀብሩኝ አይነት ስሜት ነው የሚሰማኝ #ልሙትላችሁ ሆሆ ፣ ለማንኛውም አሁንም #ሼር አድርጉልን የቴሌግራም ቻናላችንንም ግቡና Join አድርጉ ።
https://t.me/ermiyee1 ክፈት / አስተያየት ይስጡ