#መሐረነ_አብ #ጸሎተ_ምህላ ሃሌ ሉያ ዘበእንቲአሃ ለቤተክርስቲያን ተጸፋእከ በውስተ ዐውድ ከመ | ኤጲፋንዮስ🌹

#መሐረነ_አብ #ጸሎተ_ምህላ

ሃሌ ሉያ ዘበእንቲአሃ ለቤተክርስቲያን ተጸፋእከ በውስተ ዐውድ ከመ ትቀድሳ በደምከ ክቡር።

ዘበእንቲአሃ ዝግሐታተ መዋቅሕት ፆረ። ወተዐገሰ ምራቀ ርኩሰ እንዘ አልቦ ዘአበሰ አምላክ ዲበ ዕፀ መስቀል ተሰቅለ።

ሃሌ ሃሌ ሉያ አርእየነ እግዚኦ ሣህልከ፤ ረዳኤ ኩነነ ወኢትግድፈነ፣ መሐረነ መሐከነ እግዚኦ እግዚኦ ተሣሃለነ

✟✟✟✟✟✟✟✟✟✟✟✟✟✟✟✟✟✟

መሐረነ አብ
- ሃሌ ሉያ
ተሣሃለነ ወልድ
- ሃሌ ሉያ
መንፈስ ቅዱስ መሐሪ ተዘከረ በሣህልከ (፫ ጊዜ)

- ለከ ንፌኑ ስብሐተ ወለከ ናዐርግ አኮቴተ።
መሐረነ መሐሪ ኅጢአተነ አስተሥሪ።
- ወአድኅነነ
ወተማኅጸን ነፍሰነ ወሥጋነ
- ክርስቶስ ወልደ እግዚአብሔር።
አምላክነ
- ወመድኃኒነ
ኢየሱስ ክርስቶስ ተሣሃለነ።
- በብዝኃ ምሕረትከ
ደምስስ አበሳነ
- ወፈኑ ሣህለከ ላዕሌነ።
እስመ እምኅቤከ
- ውእቱ ሣህል
ሃሌ ሉያ መሐረነ አብ መሐሪ።
- ወተሣሃለነ
ሀብ ሣህለከ መሐሪ
- ኢታጥፋነ ተዘኪረከ ዘትካት።
በምሕረትከ
- እሰመ መሐሪ አንተ
ወብዙኅ ሣህልከ ለኵሎሙ እለ ይጼውዑከ።
- ይጼውዕከ በጽድቅ
ሰማዒ ወትረ
- ከሃሊ ዘውስተ አድኅኖ።
ከሃሊ
- ዘውስተ አድኅኖ
ለአምላክነ ጻድቅ እሰመ ጽድቅ ቃሉ።
- ንስአሎ ለአብ
ይፈኑ ለነ ሣህሎ
- እስመ አብ የአክል ለዘሰአሎ።
ሃሌ ሉያ
- ስብሐት ሎቱ ይደሉ።
ሃሌ ሉያ አኰቴት ሎቱ ይደሉ።
- ሃሌ ሉያ
ለክርስቶስ ለእግዚአ ኵሉ
- ሃሌ ሉያ ሃሌ ሃሌ ሉያ።

ወይእዜኒ
- መኑ ተስፋየ
አኮኑ
- እግዚአብሔር
ውስተ እዴከ እግዚኦ አመኀፅን ነፍስየ።

- ኀበ አምላከ ምሕረት
አመኀፅን ነፍስየ።
- ኀበ ንጉሠ ስብሐት
አመኀፅን ነፍስየ።
- በእግዚእየ ወአምላኪየ
አመኀፅን ነፍሰየ።
- እምኵሉ ምግባረ እኩይ አድኅና ለነፍስየ። (፫ ጊዜ በል)

ሀቡ
ንስአሎ
- ንስአሎ
ናስተምሕሮ
- ለአምላክነ ጻድቅ እሰመ ጽድቅ ቃሉ።

ዘይክል ኵሎ ወአልቦ ዘይሰአኖ።
- አምላከ ነዳያን ረዳኤ ምንዱባን።
ንህነ ኀቤከ ተማኅፅነ።

ዘይክል ኵሎ ወአልቦ ዘይሰአኖ።
- አምላከ ነዳያን ናዛዜ ኅዙናን
ንህነ ኀቤከ ተማኅፅነ።

ዘይክል ኵሎ ወአልቦ ዘይሰአኖ።
- አምላከ ነዳያን ወተስፋ ቅቡፃን
ንህነ ኀቤከ ተማኅፅነ።

- ወበከመ ዐቀብከነ እምነግህ እሰከ ሠርክ ዕቀበነ እግዚኦ እምሠርክ እስከ ነግህ። (፫ ጊዜ በል በቅብብል)

ተሣሃልከ እግዚኦ ምድረከ ሃሌ ሉያ ስማዕ ጸሎተነ ወስእለተነ ወሥረይ ኩሎ ኀጢአተነ ስማዕ ጸሎተነ ወስእለተነ ዘሰማዕኮ ጸሎቶ ወስእለቶ ለዕዝራ ተወከፍ ምህላነ እማዕከሌነ ኢትርኀቅ።

- ወሚጥ መዐተከ እምኔነ ሃሌ ሉያ ንዒ ኀቤየ እንቲአየ ሠናይት ርግብየ መዓዛ አፉሃ ከመ ኮል ወኵሉ ነገራ በሰላም።

አርእየነ እግዚኦ ሣህለከ ሃሌ ሉያ መልአከ ሰላምነ ሊቀ መላእክት ሚካኤል ሰአል ወጸሊ በእንቲአነ፤ አዕርግ ጸሎተነ ቅድመ መንበሩ ለንጉሥ ዐቢይ።

- ገብርኤል አብሠራ ለማርያም ወይቤላ ትወልዲ ወልደ፤ ወይነግሥ ለቤተ ያዕቆብ ለዓለም፤ ወአልቦ ማኅለቅት ለሰላሙ።

ሰአል ለነ ጊዮርጊስ ኀበ እግዚአብሔር ወጸሊ በእንቲአነ ሐረድዎ ወገመድዎ ወዘረዉ ሥጋሁ ከመ ሀመድ፣ ወወሰድዎ ኀበ ፸ ነገሥት ረገጸ ምድረ አንሥአ ሙታን አባ ጊዮርጊስ በሰላም ዐደወ መንግሥተ ክብር ወረሰ።

- ባርከኒ አባ እንሣእ በረከተከ በእንተ ሰላማ ለቅድስት ቤተ ክርስቲያን አባ ባርከኒ እንሣእ በረከተከ።

ብፁዕ አባ አቡነ ተክለ ሃይማኖት ዘኤለ ገዳማተ እምኀበ እግዚኡ ይነሣእ እሴተ፤ ቦአ ሀገረ ደብረ ሊባኖስ በፍሥሐ ወበሰላም።

- ማኅደረ ሰላምነ ቅድስት ደብተራ እሞሙ ለሰማዕት ወእኅቶሙ ለመላእክት ንዑ ንስግድ ኵልነ ኀበ ማርያም እምነ።

መስቀል ብርሃን ለኵሉ ዓለም መሠረተ ቤተ ክርስቲያን ወሀቤ ሰላም መድኃኔዓለም ሰላመከ ሀበነ።

- ሰላመ አብ ወሰላመ ወልድ ወሰላመ መንፈስ ቅዱስ የሀሉ ማዕከሌክሙ አኀው።

✟✟✟✟✟✟✟✟✟✟✟✟✟✟✟✟

ይ.ካ. ሰላመ አብ ወልድ ወመንፈስ ቅዱስ ወፍቅራ ለእግዝእትነ ማርያም ድንግል ወላዲተ አምላክ ሞገሰ መስቀሉ ወሀብተ ረድዔቱ የሃሉ ምስለ ኵልነ ሕዝበ ክርስቲያን ለዓለመ ዓለም።

        እግዚኦ መሐረነ ክርስቶስ
        በእንተ ማርያም መሐረነ ክርስቶስ

ሰአሊ ለነ ማርያም ምሕረተ ወልድኪ የሐውጸነ ማርያም። ሰአሊ ለነ ማርያም ለዕለሰዓቱ ተግባረ እደዊሁ ለወልድኪ ኢንጥፋ በከንቱ። ኲሎ መዓልተ ወኲሎ ሌሊተ ብዙኃ ኃጢአተ ዘገበርነ በእንተ ማርያም እምከ ተማኅጸነ። ሥመር እግዚኦ ከመ ታድኅነነ። ኢታርምም እግዚኦ ወኢትጸመመነ ተዘከር እግዚኦ ከመ መረት ንሕነ።

እግዚኦ ዕቀባ ለሀገሪትነ ኢትዮጵያ።
እግዚኦ አእርፍ ነፈሳተ አግብርቲከ ወአእማቲከ ኲሎሙ ክርስቶሳውያን።
እግዚኦ አድህን ለኩልነ ሕዝበ ክርስቲያን።