تكول الليله أمــوت -- لا يومك بعــيد -- أســم الله عليك | خادم العتره الطاهره عبد الجليل المالكي

تكول الليله أمــوت -- لا يومك بعــيد -- أســم الله عليك
بس سمعني صوت -- غيرك ما أريد -- بعيوني أشتريك
-------------------------------------------------------
1= عافـيـتي بنضره من عيونك - فـوك متونـك زينب طير
لا تسكت لا يخــرب لونك - سولف ليه أحسبــني البير
أمنين أشد راسك علي دليني
من سكوت أرجوك لـتحاجيني
فــدوه يمضحكــــني لتبجيني
---------------------------------------------------------
بروح أمي البتول -- راسك هسه زين -- ريحني بكلام
شرايد مـني كول -- ماتحجي حـــزين -- لو رايد تـنام
**************
2= ماكاسر جــــنحان الطيره - تـكسر كلب أبنيتك ليش
وين تروح أيـــتام الديره - ياجـنح الطار بلا ريش
ياكطن مـــايوم كاسر خاطر
وجه ما مكروه ليش مسافر
بيي فــكر وين أروحن باجر
----------------------------------------------------------
يالطبعك حنـين -- لتعوف اليتيم -- وتهاجـر بعيد
وحده من الثنين -- ترجع لو نهيم -- وما يلفينه عيد

3= فدوه أندار الطولك فدوه - هاك جفوفي لزمها وكوم
يالعايش كل عمرك قدوه - مــــا يحلالك والله النوم
علي يعـينك ياعلي شد حيلك
راح أصــيح حسين ويتجيلك
أسمعني من كلبي أصيح دخيلك
-------------------------------------------------------
من دونك أضيع -- ويموت الخضار -- ما ألكالي ماي
ورده بـــلا ربيع -- أشعر بــــــنكسار -- ماتقــبلها هاي
***************
4= والله أنه أدري تنوح عليهم - بس أسكت مابيك تنوح
تدري من تموت تـبجيهم - وبسيف أفـكارك مذبوح
تحضن أولادك تـــريد وصعبه
تدري كل واحد جمـرته بكلبه
لا تموت الدمع كافـــي تصبه
------------------------------------------------------------
ماتكدر تصيح -- صفاك النزيف -- تحمل ياعــذاب
مهموم وجريح -- وياك الخريف -- أستعجل بالغياب




5= غـير الدمعه أشضل العيوني - راح أبجيلك لـيل نهار
باجر سوط أيطـــيح متوني - من الطف بس الله الستار
كـون أشبكــنـك وأمــوت الليله
أدخيل بختك بويه اخذني دخيله
الشام أكــرهه ومــاأريد أمشيله
--------------------------------------------------
بحجار ودفوف -- تستـــقبلني ناس -- بضعوني تعيل
لا عباس أشوف -- يمشي ويانه راس -- شيجيب الكفيل
************
الخادم عبد الجليل المالكي