لـو أدري ياخـذ بالحباب ** ما أسمي نفــسي أبو تراب | خادم العتره الطاهره عبد الجليل المالكي

لـو أدري ياخـذ بالحباب ** ما أسمي نفــسي أبو تراب
زهرة حياتي ** وعليها حزني
بي لقـبوني ** وياخــذها مني
-------------------------------------------------------
1= من تضيع أنت شسمك ** تنشده وين أسمي يحزني
يكلك أنت تعـيش غربه ** تـــــكله مـــاتخذني مني
أمشي ودموعي أتجاره ** شايل الزهره ع متــني
جـني واحد زات روحه ** ميت وشـــيعـــــني وني
--------------------------------------------------
أعليه أشــثــكــلجن يالهــدوم ** هــمي كسر عـــين الهـــموم
نــــوم المكابر ** فـــززها وني
بي لقـــبوني ** وياخـذها مني







2= ميته بـــــس أبالي عدله ** أمــشي وأسم الله أكلها
الزهره مشدوده بوريدي ** من الوريد شلون أحلها
شما أحس بجـتـفي يخدر ** تلتفت عـيني الكحلها
لو أدور الدنـــــــيا كلها ** الزهره مـــا ألكه مثلها
------------------------------------------------------
مهدومه روحي صاير رماد ** لا دمعي لا لطم الصدر فاد
صوبــني وكتي ** عل يوجعـــني
بي لقــــــبوني ** وياخـــذها مني
**************
3= مـؤلمه بعــيني المـشاهد ** والحــــقائــــق كلها مـره
أبجي والتابـــوت ساكت ** وصدري بجفــوفي أعصره
بكلبي شوغت أخ تكـــتل ** هالغــــــياب شلون أكدره
كل ملامح وجهي ضاعت ** منين أجـيب الروحي زهره
---------------------------------------------------------
بشفافي مـــــاتت سوالف ** تتراجف أيدي وكلبي خايف
تسعين أحسه ** أتقــدم يسني
بي لقـــبوني ** وياخذها مني


4= أطشرت سبحت عـشرتي ** أنــترست حجاياتــي شـيب
أنه بس الزهره عـــندي ** أول وأخــــــــــــر حبـيب
للحسن وحسيــــن باجر ** أم مثلها منـــــــين أجيب
ومن بعد فــاطم شعاري ** أنه بالدنـــــــــــيه غريب
------------------------------------------------------
راح أبقه للطبره مكسور ** وأفتر عليها مثل الطيور
بس المــناحه ** والحسره لحني
بي لقـــبوني ** ويخـــذها مني
************
5= للدفــــن ماجني ماشي ** جني متعـني أعله ذبحي
راح أحط كلبي بحفيره ** ومايمر بعـيوني صبحي
من بعد هاي الخساره ** أدري أنـه المــوت ربحي
باقي ماتــسوه حياتي ** كل فجر يخنكني جرحي
---------------------------------------------------------
بخدودي الدموعي نيشان ** لا أنه طالع لا ني غركان
صوت الحبيبه ** همساته بذني
بي لقـــبوني ** وياخذها مـني
*** الخادم عبد الجليل المالكي *****