من العصره ماكامت -- ومــــن الضرب ماتت | خادم العتره الطاهره عبد الجليل المالكي

من العصره ماكامت -- ومــــن الضرب ماتت
وأستــشهـــدت أمي -- عــــشرتــــنه مادامت
--------------------------------------------------------------------
1= ماكبرتــــــني فاطمه - ذبتـــني من سابع سمه - ساعة هجرها
ما لحكت أشبع حجي - منها وعله جفها أنتجي - شويه عمرها
جـن دافــنين بيوتـنه بــساعة دفنها
بطبكت جفنها الدنـيه هــم طبكت جفنها
ليش أنحرم من الدفو وكعدت حضنها
---------------------------------------------------------
جـــــدران مهجوره -- بيها أطلعت صوره
أمي بضلــــع دامي -- عـشرتــنه مادامت








2= شسوالهم ضلع الورد - عــــالدافـــيه ذبو برد - يكتل بردهم
للضلع أقـره الفاتحه - لو عله روحي النايحه - لو عالأودهم
وياي لو ماسولفت أمي الحجي يموت
والبيت لمن هاجرت مو بيت تابوت
فت الصخر والله علـيها كلبي مفتوت
----------------------------------------------------------
يامغــــرب الفــركه -- كل أخضر يحــركه
مــا أصدك بسرعه -- عـشرتــنه مادامت
************
3= والله كرهــــــتك ياصبح - بطراف سجينه نذبح - كــــل ماتجيني
جا دمعي عندك مو مهم - خليني زينب عاد أسم - مو عمـت عيني
بياع بسنيني صرت بس ماكو شراي
ألف أنعم الله عــالجروح الوكفت وياي
راحت الترستــــني بعطفها والسبي جاي
-------------------------------------------------------
عالباب أصد عيني -- ودمها يبجـــــــيني
باقي الأثر بعــــده -- عـــشرتـــنه مادامت


4= الوداع بعــــيوني كصه -- والصوت مايطلع نصه -- مبحوح صوتي
صاعد عالمتوني التعب -- والذكرى دخان وحطب -- تانـــيته موتي
أتمنيت أبدل كلبي وكت العصره بالباب
والكلب من يدفـــع ضلع مايقصد غياب
لكــــن شسوي الصار صار الـباب غلاب
------------------------------------------------------
مـــالحكــــت بيها -- بضلوعي أفـــديها
لمحت بصر راحت -- عــشرتــــنه مادامت
***********
5= بدخان مايلتم نفس - وشفاف المصوب خرس - وكــــت المنيه
دخن الباب وماطفه - والمــوت أجانه عاصفه - راد الزجـــــيه
شايف عزيزك من تصيحه وما يسمعك
ينزل عله خدودك مـــواكد جمر دمعك
ماتدري شتسوي أختلف بالفركه وضعك
------------------------------------------------
من راحت عيوني -- جن أنه دفــــنوني
أعـــصر بصابيعي -- عـــشرتــنه مادامت
**** الخادم عبد الجليل المالكي ******