تكثر معزته الفاركك بالكوه بيدك تدفنه وتعتقد مو هوه ماجنه مدف | خادم العتره الطاهره عبد الجليل المالكي
تكثر معزته الفاركك بالكوه
بيدك تدفنه وتعتقد مو هوه
ماجنه مدفون ٠٠ ساكن بالعيون
مصيبه
٠٠٠٠٠٠٠
على وجه الفكد اربع علامات
اول وحده عالخد اثر دمعات
وعلامه الثانيه برموشه شيبات
وبعدها الثالثه حي يمشي بس مات
اذا يمشي خله بمشيته ٠٠ وتبين جبيره قضيته
دموعه تنكع لحيته ٠٠ يعاني
٠٠٠٠٠٠٠٠٠٠٠٠
اثياب العله جتافه مثل تابوته
ماينسمع لو حاجه واحد صوته
بالغالي مطعون ٠٠ ساكن بالعيون
٠٠٠٠٠٠٠٠٠٠٠٠
شيضل عنده اليروح بعشكه دفان
يرد من الكبر للبيت خسران
خساره و ماخسرها ابعمره انسان
يغيب الجان حلمه وجنه ماجان
ضوه عيونه شيب يشوفه ٠٠ عزيزه ولا بيه يعوفه
عله غيابه يفرك جفوفه ٠٠ يريده
٠٠٠٠٠٠٠٠٠٠٠٠
يالطم ع عيونه ويريد الغالي
وكلمن يفوت يشوف دمعه يلالي
بشفافه الشلون ٠٠ ساكن بالعيون
٠٠٠٠٠٠٠٠٠٠٠
رجفت ايده من يفوت تنشاف
مثل عصرة فراك الغالي ماشاف
علي المثل النسيم المار شفاف
رجع يرجف مثل رجفت الصفصاف
حبيبة حياته وخسرها ٠٠ يروحه شيبرد جمرها
بقه بثوبه يشتم عطرها ٠٠ ويكسره
٠٠٠٠٠٠٠٠٠٠٠٠
هوه الدفن محبوبه دافن روحه
كبرت جروحه ولا دوه لجروحه
يافركه لتهون ٠٠ ساكن بالعيون
٠٠٠٠٠٠٠٠٠٠٠٠٠
الحلم اليموت دفنه بصدر الغروب
تره وفكد العزيز يشيب الكلوب
تحس اهلك بوجهك سدو البوب
اذا منك رحل للموت محبوب
حزينه تضل كل حياتك ٠٠ تضل تدعي توصل وفاتك
غريبه وحزينه أمنياتك ٠٠ عجيبه
٠٠٠٠٠٠٠٠٠٠٠٠٠٠٠٠
كل مغربيه تروح عنده تزوره
كوه عليها ارويحتك مجبوره
تكضيها محزون ٠٠ ساكن بالعيون
٠٠٠٠٠٠٠٠٠٠٠
ابو الأيتام صاير مثل الايتام
سكن بالمكبره وبالبيت مانام
اذا شاف العقيله اتذكر الشام
وتصب دموعه عالخد ترسم خيام
يفكر علي بل عقيله ٠٠ ينوح وهمومه تجيله
ع الزهره مايغفه ليله ٠٠ دفنها
٠٠٠٠٠٠٠٠٠٠٠٠٠٠٠٠
يدري بحبيبة امها من يسبوها
ماعدها والي وعالهزيله اخذوها
ياويلي يم عون ٠٠ ساكن بالعيون
٠٠٠٠٠٠٠
عبد الجليل المالكي
